બોલીવુડ અભિનેત્રી શિલ્પા શેટ્ટી અને તેના પતિ રાજ કુન્દ્રા પર ₹60.4 કરોડની છેતરપિંડી કરવાનો ગંભીર આરોપ લાગ્યો છે, જેના પગલે મુંબઈ પોલીસની આર્થિક ગુના શાખા (EOW) એ તપાસ શરૂ કરી છે. આ મામલો ત્યારે પ્રકાશમાં આવ્યો જ્યારે મુંબઈના જાણીતા ઉદ્યોગપતિ દીપક કોઠારી એ ફરિયાદ નોંધાવી હતી. આ ફરિયાદમાં શિલ્પા શેટ્ટી, રાજ કુન્દ્રા અને એક અજાણ્યા વ્યક્તિ સામે કાનૂની કાર્યવાહી કરવાની માંગ કરવામાં આવી છે. ફરિયાદ મુજબ, આરોપીઓએ તેમના હવે બંધ થયેલા બેસ્ટ ડીલ ટીવી પ્રાઇવેટ લિમિટેડ નામના હોમ શોપિંગ અને ઓનલાઈન રિટેલ પ્લેટફોર્મ મારફતે આ છેતરપિંડી કરી.
કોઠારીના જણાવ્યા પ્રમાણે, આ સમગ્ર કથાની શરૂઆત 2015માં થઈ હતી, જ્યારે રાજેશ આર્ય નામના વ્યક્તિએ તેમને શિલ્પા શેટ્ટી અને રાજ કુન્દ્રા સાથે પરિચય કરાવ્યો હતો. તે સમયે બંને બેસ્ટ ડીલ ટીવીના ડિરેક્ટર હતા. આર્યએ કોઠારીને કંપની માટે ₹75 કરોડની લોન આપવા વિનંતી કરી હતી, જેમાં વાર્ષિક 12% વ્યાજ ચૂકવવાની વાત હતી. જોકે, કરવેરાનો બોજ ઓછો કરવા માટે આ રકમને ‘લોન’ તરીકે નહીં પણ ‘રોકાણ’ તરીકે દર્શાવવાની યોજના બનાવી. આ પ્રસ્તાવ પર સંમત થયા બાદ કોઠારીએ એપ્રિલ 2015માં ₹31.95 કરોડ ટ્રાન્સફર કર્યા, જ્યારે બાકી રકમ ₹28.54 કરોડ જુલાઈ 2015 થી માર્ચ 2016 વચ્ચે હપ્તાવાર ટ્રાન્સફર કરવામાં આવી.
કુલ મળીને કોઠારીએ ₹60.48 કરોડથી વધુ રકમ રોકાણ સ્વરૂપે કંપનીને આપી, સાથે જ સ્ટેમ્પ ડ્યુટી તરીકે ₹3.19 લાખ ચૂકવ્યા. પરંતુ રોકાણ બાદ થોડા જ સમયમાં તેમને ખબર પડી કે કંપની સામે ₹1.28 કરોડની નાદારી (ઇન્સોલ્વન્સી) સંબંધિત કાર્યવાહી ચાલી રહી છે, જે અંગે તેમને પહેલાં કોઈ માહિતી આપવામાં આવી નહોતી. આ જાણકારી મળતાં કોઠારીએ પોતાના મૂડીની પરતફેર માટે માંગ કરી, પરંતુ તેમની વિનંતી સ્વીકારવામાં આવી નહોતી.
કોઠારીનો આરોપ છે કે સમગ્ર સોદો શરૂથી જ ખોટી મનોવૃત્તિ સાથે ગોઠવાયો હતો, જેમાં કંપનીના વાસ્તવિક આર્થિક પરિસ્થિતિને છુપાવીને તેમને મોટા પાયે છેતરવામાં આવ્યા. કારણ કે આ રકમ ₹10 કરોડથી ઘણી વધારે હતી, કાયદાકીય પ્રક્રિયા મુજબ કેસને આર્થિક ગુના શાખાને સોંપવામાં આવ્યો છે. હાલ EOW આ મામલાની વિગતવાર તપાસ કરી રહી છે, જેમાં નાણાંના પ્રવાહ, ટ્રાન્ઝેક્શન રેકોર્ડ, કંપનીના બોર્ડના નિર્ણયો અને સંકળાયેલા તમામ વ્યક્તિઓની ભૂમિકા પર ધ્યાન કેન્દ્રિત કરવામાં આવી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
