અમદાવાદ SOG (સ્પેશિયલ ઓપરેશન ગ્રુપ)ને વધુ એક મોટી સફળતા મળી છે. પોલીસે દુબઈમાં રહીને સાઈબર ફ્રોડ ચલાવતા દિલીપ ઉર્ફે મોનુ સિંધીને પકડી પાડ્યો છે. મોનુ સિંધી લાંબા સમયથી દુબઈમાં રહીને સાઈબર ગેંગ ચલાવતો હતો અને ભારતમાં લોકોને લાલચ આપી તેમના નામે બેંક એકાઉન્ટ ખોલાવતો હતો. આ એકાઉન્ટનો ઉપયોગ છેતરપિંડી માટે કરવામાં આવતો હતો. મળતી માહિતી મુજબ અમદાવાદ SOGની ટીમે ચોક્કસ સૂત્રોના આધારે એરપોર્ટ સર્કલ પાસેની એક હોટલમાંથી મોનુ સિંધીને ઝડપી લીધો. મોનુ સિંધી માત્ર પોતે જ નહીં પરંતુ તેના ભાઈ અને અન્ય સાથીઓ સાથે મળી એક સંગઠિત રીતે આ સાઈબર સ્કેમ ચલાવતો હતો.
મોનુ સિંધીની કામગીરીની રીત પણ અત્યંત ચોંકાવનારી સામે આવી છે. તે દુબઈથી ભારત આવી લોકોને મોટાં નફાના સપના બતાવી તેમના નામે બેંક એકાઉન્ટ ખોલાવતો. તે બાદ તે બેંક કીટ લઈને મુંબઈથી નવા સિમકાર્ડ મેળવીને તે એકાઉન્ટ સાથે લિંક કરાવતો. ત્યારબાદ ગુગલ મેસેન્જર મારફતે QR કોડ સ્કેન કરીને તે બેંક એકાઉન્ટોને કન્ટ્રોલ કરતો. આ રીતે વિવિધ એકાઉન્ટ મારફતે મોટા પાયે ટ્રાન્ઝેક્શન કરાતા હતા. પ્રાથમિક તપાસમાં ખુલ્યું છે કે મોનુ સિંધી અને તેના સાથીદારો દ્વારા આશરે 19 બેંકોમાંથી કુલ 13.55 કરોડ રૂપિયાનું ગેરકાયદેસર ટ્રાન્ઝેક્શન થયું છે.
આ મામલે પહેલેથી જ કચ્છના આદિપુર પોલીસ મથકમાં ફરિયાદ નોંધાઈ હતી, જેના આધારે પોલીસે તપાસ શરૂ કરી હતી. ત્યારબાદ અમદાવાદ SOGની ટીમે ટેકનિકલ સર્વેલન્સ અને સૂત્રોના આધારે આ ગેંગની ગતિવિધિઓને ટ્રેસ કરી અને આખરે મુખ્ય આરોપી મોનુ સિંધીને કાબૂમાં લીધો. હાલ પોલીસે મોનુ સિંધીને રિમાન્ડ પર લઈને તેની પૂછપરછ શરૂ કરી છે. પોલીસને આશા છે કે આ સાઈબર ફ્રોડ ગેંગના બીજા સભ્યો વિશે પણ મહત્વપૂર્ણ માહિતી બહાર આવશે. આ ઘટનાએ ફરી એકવાર સાબિત કર્યું છે કે સાઈબર ક્રાઇમ ગેંગો દેશ અને વિદેશમાંથી સંગઠિત રીતે કામ કરે છે અને આવા ગુનાહિત નેટવર્કને નાબૂદ કરવા માટે સઘન તપાસ તથા આંતરરાષ્ટ્રીય સ્તરે કાયદાકીય સહકાર જરૂરી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
