રાજપીપલા
નર્મદા જિલ્લામાં ગેરકાયદેસર પ્રવૃત્તિઓ અને માદક પદાર્થોની હેરાફેરી અટકાવવા પોલીસ વિભાગ સતત સતર્ક બની અસરકારક કામગીરી કરી રહ્યો છે. તેના ભાગરૂપે આમલેથા પોલીસ સ્ટેશન વિસ્તારના વરખડ ગામે મુંબઈ પોલીસ અને નર્મદા પોલીસની સંયુક્ત ટીમ દ્વારા સફળ રેઇડ કામગીરી હાથ ધરવામાં આવી હતી.
મહારાષ્ટ્રના સાકીનાકા પોલીસ સ્ટેશન ખાતે નોંધાયેલા એન.ડી.પી.એસ. ગુનાની તપાસ દરમિયાન મળેલી માહિતીના આધારે મુંબઈ પોલીસની ટીમ નર્મદા જિલ્લામાં પહોંચી હતી. ત્યારબાદ આમલેથા પોલીસ, એલ.સી.બી. અને એસ.ઓ.જી.ની ટીમ સાથે મળીને વરખડ ગામે સુધીરભાઈ મનુભાઈ પટેલના ઘરે સંયુક્ત તપાસ હાથ ધરવામાં આવી હતી.
તપાસ દરમિયાન કેટલાક અલગ-અલગ પ્રકારના કેમિકલ મળી આવતા એફ.એસ.એલ. તથા એ.ટી.એસ.ની ટીમને સ્થળ પર બોલાવવામાં આવી હતી. આધુનિક Raman Spectrometer કીટ મારફતે કરવામાં આવેલી વૈજ્ઞાનિક તપાસમાં ઇથાઇલ પ્રિપેરેજીન, યુરિયા નાઈટ્રેટ, પાલમેટિક એસિડ, પેઈન્ટ સ્ટ્રીપર અને નાઇટ્રો ગ્લીશરીન જેવા કેમિકલ મળી આવ્યા હતા.
પરંતુ સૌથી મહત્વની બાબત એ રહી કે સમગ્ર તપાસ દરમિયાન કોઈપણ પ્રકારના નશીલા અથવા માદક પદાર્થ મળી આવ્યા નહોતા. જેના કારણે સ્થાનિક ગ્રામજનો અને વિસ્તારમાં રાહતનો માહોલ જોવા મળ્યો હતો.
પોલીસ દ્વારા તમામ કેમિકલ કબજે લઇ વધુ તપાસ હાથ ધરવામાં આવી છે. સમગ્ર કામગીરી પોલીસ મહાનિરીક્ષક શ્રી સંદિપ સિંહ તથા નર્મદાના ઇન્ચાર્જ પોલીસ અધિક્ષક શ્રી પી.આર. પટેલના માર્ગદર્શન હેઠળ પારદર્શક અને અસરકારક રીતે પૂર્ણ કરવામાં આવી હતી.
જિલ્લા પોલીસની આ ઝડપી અને સતર્ક કામગીરીથી ગેરકાયદેસર પ્રવૃત્તિઓ સામે કડક સંદેશો ગયો છે, સાથે જ નિર્દોષ લોકોમાં વિશ્વાસ પણ મજબૂત બન્યો છે.
શૈશવ રાવ નર્મદા
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
