ગુજરાતમાં સાયબર ક્રાઇમ સામે કડક કાર્યવાહી કરતા રાજ્ય પોલીસને મોટી સફળતા મળી છે. મુખ્યમંત્રી ભૂપેન્દ્ર પટેલના નેતૃત્વ અને નાયબ મુખ્યમંત્રી હર્ષ સંઘવીના માર્ગદર્શન હેઠળ ચલાવવામાં આવેલા વિશેષ ઓપરેશનમાં ₹2289 કરોડના સાયબર ફ્રોડનો પર્દાફાશ કરવામાં આવ્યો છે.
ગુજરાત પોલીસના સાયબર સેન્ટર ઓફ એક્સલન્સ (CCOE) દ્વારા “ઓપરેશન મ્યૂલ હન્ટ 1.0” અંતર્ગત રાજ્યભરમાં મ્યૂલ અકાઉન્ટ સામે વ્યાપક અભિયાન હાથ ધરાયું હતું. મ્યૂલ અકાઉન્ટ એવા બેંક ખાતા હોય છે, જેનો ઉપયોગ સાયબર ગુનેગારો ગેરકાયદે નાણાં ટ્રાન્સફર અને લૉન્ડરિંગ માટે કરે છે.
આ ઓપરેશન દરમિયાન કુલ 565 FIR નોંધાઈ, 638 આરોપીઓની ધરપકડ કરવામાં આવી અને 913 મ્યૂલ અકાઉન્ટ સામે કાર્યવાહી કરવામાં આવી. કુલ 4052 ગુનાઓની ઓળખ કરવામાં આવી જેમાં ગુજરાતમાં 491 કેસ નોંધાયા હતા.
સાયબર ક્રાઇમ સામેની આ કામગીરીમાં ઇન્ડિયન સાયબર ક્રાઇમ કોઓર્ડિનેશન સેન્ટર (I4C), NCRP પોર્ટલ, 1930 હેલ્પલાઇન અને વિવિધ બેન્કો સાથે સંકલન કરીને ડેટા ઇન્ટેલિજન્સનો ઉપયોગ કરવામાં આવ્યો હતો. નોડલ અધિકારીઓની નિમણૂક કરીને દરેક જિલ્લામાં ટીમો તહેનાત કરવામાં આવી હતી.
આ ઓપરેશનના પરિણામે ચેક અને ATM દ્વારા થતી શંકાસ્પદ નાણાકીય લેવડદેવડમાં નોંધપાત્ર ઘટાડો જોવા મળ્યો છે. ચેક દ્વારા ઉપાડમાં 75% સુધી ઘટાડો થયો છે જ્યારે માસિક ચેક ઉપાડ ₹126 કરોડથી ઘટીને ₹25 કરોડ થયો છે. એટીએમ ઉપાડમાં પણ 66%નો ઘટાડો નોંધાયો છે.
સાયબર સુરક્ષાને વધુ મજબૂત બનાવવા માટે રિઝર્વ બેન્ક ઓફ ઇન્ડિયા (RBI) દ્વારા આર્ટિફિશ્યલ ઇન્ટેલિજન્સ આધારિત રિસ્ક સ્કોરિંગ સિસ્ટમ અમલમાં મુકવાની તૈયારી ચાલી રહી છે. ઇન્ડિયન ડિજિટલ પેમેન્ટ ઇન્ટેલિજન્સ કોર્પોરેશન (IDPIC) દ્વારા mulehunter.ai પ્લેટફોર્મ મારફતે શંકાસ્પદ ટ્રાન્ઝેક્શન પર નજર રાખવામાં આવશે.
વડાપ્રધાન નરેન્દ્ર મોદીના નેતૃત્વમાં દેશમાં ડિજિટલ ક્ષેત્રે ઝડપી વિકાસ થયો છે, જેના કારણે સાયબર સુરક્ષા હવે રાષ્ટ્રીય સુરક્ષા સાથે સીધી રીતે જોડાઈ ગઈ છે. કેન્દ્રીય ગૃહમંત્રી અમિત શાહે પણ સાયબર સુરક્ષાને દેશની સુરક્ષાનો મહત્વનો ભાગ ગણાવ્યો છે.
ગુજરાત પોલીસ દ્વારા હાથ ધરાયેલા આ અભિયાનને દેશના સાયબર ક્રાઇમ સામેના લડતમાં એક મહત્વપૂર્ણ પગલું માનવામાં આવી રહ્યું છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
