છોટા ઉદેપુર જિલ્લાના પાવીજેતપુર તાલુકાના ગ્રામ્ય વિસ્તારોમાં દીપડાના હુમલાની ઘટનાઓ સતત વધી રહી છે. તાજેતરમાં મોટી રાસલી ગામે 6 વર્ષની માસૂમ બાળકી પર દીપડાએ હુમલો કર્યો હોવાની ચોંકાવનારી ઘટના સામે આવી છે.
મળતી માહિતી અનુસાર, બાળકી ઉનાળુ વેકેશન દરમિયાન પોતાના મામાના ઘરે મોટી રાસલી ગામે આવી હતી. સાંજના સમયે તે ઘરના આંગણામાં રમી રહી હતી ત્યારે નજીકની ઝાડીઓમાંથી અચાનક દીપડો બહાર આવીને તેના પર તૂટી પડ્યો હતો.
બાળકીના ચીસાચીસ સાંભળીને પરિવારજનો તાત્કાલિક લાકડીઓ લઈને બહાર દોડી આવ્યા હતા. લોકોનો હોબાળો અને વિરોધ જોતા દીપડો બાળકીને છોડીને જંગલ તરફ ભાગી ગયો હતો. હુમલામાં બાળકી લોહીલુહાણ થઈ ગઈ હતી.
ઇજાગ્રસ્ત બાળકી ને તરત જ પાવીજેતપુરના સામૂહિક આરોગ્ય કેન્દ્ર (CHC) ખાતે ખસેડવામાં આવી હતી, જ્યાં તેને પ્રાથમિક સારવાર આપવામાં આવી હતી. સદનસીબે બાળકીને સામાન્ય ઈજાઓ જ થતાં તેનો બચાવ થઈ ગયો છે અને હાલ તેની સ્થિતિ સ્થિર હોવાનું જાણવા મળ્યું છે.
ઘટનાની જાણ થતાં જ વન વિભાગની ટીમ સ્થળ પર પહોંચી ગઈ હતી અને ગામમાં સુરક્ષા વધારવામાં આવી છે. હુમલાખોર દીપડાને પકડવા માટે વિવિધ સ્થળોએ પાંજરા ગોઠવવાની કાર્યવાહી હાથ ધરવામાં આવી છે.
સ્થાનિક ગ્રામજનોના જણાવ્યા મુજબ, પાવીજેતપુરના જંગલ વિસ્તાર નજીક દીપડાઓની સંખ્યા વધી રહી છે, જેના કારણે માનવ વસાહતમાં આવી ઘટનાઓ વધી રહી છે. થોડા દિવસો પહેલા પણ આ વિસ્તારમાં એક માનવભક્ષી દીપડાને પાંજરે પૂરવામાં આવ્યો હતો.
આ ઘટનાને પગલે ગ્રામજનોમાં વન વિભાગ સામે રોષ અને ભયનો માહોલ જોવા મળી રહ્યો છે. લોકો દ્વારા તાત્કાલિક અસરકારક પગલાં લેવા માંગ કરવામાં આવી રહી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
