ગુજરાતમાં દારૂબંધીના કાયદાનો કડક અમલ કરાવવા પોલીસ સતત કાર્યવાહી કરી રહી છે. ત્યારે અમદાવાદ જિલ્લાના સાણંદ પોલીસને પ્રોહીબિશનના ગુનાઓ સામે વધુ એક મોટી સફળતા મળી છે. સાણંદ ટાઉન પોલીસે કડી-સાણંદ રોડ પર આવેલી ભાવનપુરા ચેકપોસ્ટ નજીકથી વિદેશી દારૂની હેરાફેરી કરતી એક લક્ઝુરિયસ ફોર્ચ્યુનર કાર ઝડપી પાડી હતી. પોલીસે કારમાંથી જુદી જુદી બ્રાન્ડની કુલ 1,524 વિદેશી દારૂની બોટલો અને કાર સહિત ₹14.78 લાખથી વધુનો મુદ્દામાલ જપ્ત કર્યો છે.
પોલીસ પાસેથી મળતી માહિતી અનુસાર, સાણંદ ટાઉન પોલીસ સ્ટેશનની ટીમને ચોક્કસ બાતમી મળી હતી કે એક લક્ઝુરિયસ કારમાં મોટા પ્રમાણમાં વિદેશી દારૂની હેરાફેરી કરવામાં આવી રહી છે. બાતમીના આધારે પોલીસે તાત્કાલિક કડી-સાણંદ રોડ પર આવેલી ભાવનપુરા ચેકપોસ્ટ ખાતે નાકાબંધી ગોઠવી હતી.
આ દરમિયાન શંકાસ્પદ ફોર્ચ્યુનર કાર ચેકપોસ્ટ પરથી પસાર થતાં પોલીસે તેને રોકવાનો ઈશારો કર્યો હતો. જોકે, કારચાલકે પોલીસના સંકેતની અવગણના કરી વાહનને પૂરઝડપે દોડાવી ફરાર થવાનો પ્રયાસ કર્યો હતો. ત્યારબાદ પોલીસે ફિલ્મી ઢબે કારનો પીછો કરીને થોડે અંતરે તેને આંતરી લીધી હતી.
કારની તપાસ દરમિયાન પોલીસે અંદરથી જુદી જુદી બ્રાન્ડની કુલ 1,524 વિદેશી દારૂની બોટલો મળી આવી હતી, જેની અંદાજિત કિંમત ₹4,78,640 હોવાનું સામે આવ્યું છે. ઉપરાંત પોલીસે ₹10 લાખની કિંમતની ફોર્ચ્યુનર કાર સહિત અન્ય સામાન જપ્ત કરીને કુલ ₹14,78,640નો મુદ્દામાલ કબજે કર્યો છે.
જો કે, કાર રોકાયા બાદ તેનો ડ્રાઇવર અને તેનો સાગરીત અંધારાનો લાભ લઈને ઘટનાસ્થળેથી ફરાર થઈ ગયા હતા. સાણંદ પોલીસે બંને અજાણ્યા આરોપીઓ સામે પ્રોહીબિશન એક્ટ હેઠળ ગુનો નોંધી તેમની શોધખોળ શરૂ કરી છે. પોલીસે ફરાર આરોપીઓને ઝડપી પાડવા માટે વિવિધ ટીમો બનાવી તપાસ તેજ કરી છે.
રાજ્યમાં દારૂબંધીના કાયદાનું કડક પાલન કરાવવા ગુજરાત પોલીસ દ્વારા સતત કાર્યવાહી કરવામાં આવી રહી છે. સાણંદ પોલીસની આ સફળ કાર્યવાહી ગેરકાયદેસર દારૂની હેરાફેરી સામે વધુ એક મહત્વપૂર્ણ પગલું માનવામાં આવી રહી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
