અમદાવાદના બોપલ-ઘુમા વિસ્તારમાં દીપડાની હાજરીને કારણે સ્થાનિક રહીશોમાં ભારે ફફડાટ ફેલાયો છે. સળંગ બીજા દિવસે પણ સમગ્ર વિસ્તારમાં ભયનો માહોલ જોવા મળી રહ્યો છે. ખાસ કરીને બોપલની શરણદીપ સોસાયટીમાં અઘોષિત કર્ફ્યૂ જેવી સ્થિતિ સર્જાઈ છે. દીપડાના ડરથી લોકો ઘરમાં જ રહેવાનું પસંદ કરી રહ્યા છે અને મંગળવારે સવારે અનેક રહીશોએ મોર્નિંગ વોક પર જવાનું પણ ટાળ્યું હતું.
ઘટનાને 30 કલાક કરતાં વધુ સમય વીતી ગયો હોવા છતાં દીપડાનો કોઈ પત્તો લાગ્યો નથી. જોકે, બોપલ-ઘુમા વિસ્તારમાં દીપડો આવ્યો હોવાના ચોક્કસ પુરાવા અને પગનાં નિશાન વનવિભાગને મળી આવ્યા છે. તેના આધારે વનવિભાગ દ્વારા દિવસ-રાત સઘન સર્ચ અને રેસ્ક્યૂ ઓપરેશન ચલાવવામાં આવી રહ્યું છે.
25થી વધુ અનુભવી કર્મચારીઓ મેદાનમાં
દીપડાને શોધવા અને સુરક્ષિત રીતે રેસ્ક્યૂ કરવા માટે સાણંદ, માંડલ અને દેત્રોજની વનવિભાગની ટીમોને તૈનાત કરવામાં આવી છે. આ ઉપરાંત ગીર ફાઉન્ડેશન અને બોડકદેવ રેસ્ક્યૂ સેન્ટરના અનુભવી કર્મચારીઓની પણ મદદ લેવામાં આવી રહી છે.
કુલ 25થી વધુ કર્મચારીઓનો કાફલો બોપલ-ઘુમા વિસ્તારના અલગ-અલગ સ્થળોએ તપાસ કરી રહ્યો છે. ટીમો દ્વારા દીપડાની સંભવિત હિલચાલના માર્ગ, પગનાં નિશાન અને સ્થાનિક લોકો પાસેથી મળતી માહિતીને આધારે સર્ચ ઓપરેશન આગળ વધારવામાં આવી રહ્યું છે.
પાંજરા ગોઠવી તપાસ તેજ કરાઈ
વનવિભાગની ટીમોએ આસપાસનાં અવાવરું સ્થળો, ખેતરો, ખુલ્લા પ્લોટ અને ઝાડી-ઝાંખરાવાળા વિસ્તારોમાં પાંજરા ગોઠવ્યાં છે. દીપડો ખોરાક અથવા પાણીની શોધમાં બહાર આવે તેવી શક્યતાને ધ્યાનમાં રાખીને સંવેદનશીલ સ્થળો પર વિશેષ નજર રાખવામાં આવી રહી છે.
વનવિભાગ દ્વારા રાત્રિના સમયે પણ પેટ્રોલિંગ અને દેખરેખ ચાલુ રાખવામાં આવી છે. જોકે, અત્યાર સુધી દીપડો પાંજરામાં આવ્યો નથી અને તેની ચોક્કસ સ્થિતિ અંગે કોઈ માહિતી મળી નથી.
શરણદીપ સોસાયટીમાં અઘોષિત કર્ફ્યૂ જેવી સ્થિતિ
દીપડો જોવા મળ્યાની ઘટના બાદ શરણદીપ સોસાયટી સહિત આસપાસના રહેણાંક વિસ્તારોમાં લોકોમાં ભયનો માહોલ છે. સોસાયટીના રહીશો બાળકોને એકલા બહાર મોકલી રહ્યા નથી અને રાત્રે બહાર નીકળવાનું પણ ટાળી રહ્યા છે.
સામાન્ય રીતે વહેલી સવારે મોર્નિંગ વોક માટે નીકળતા લોકો પણ દીપડાના ભયને કારણે ઘરમાં જ રહ્યા હતા. સોસાયટીના સિક્યુરિટી ગાર્ડ અને સ્થાનિક રહીશો દ્વારા પણ આસપાસની હિલચાલ પર નજર રાખવામાં આવી રહી છે.
રહીશોને વનવિભાગની ખાસ અપીલ
દીપડો હજુ સુધી પકડાયો નથી, તેથી તંત્રએ બોપલ-ઘુમા અને આસપાસની સોસાયટીના રહીશોને સાવચેત રહેવા જણાવ્યું છે. રાત્રિના સમયે બિનજરૂરી બહાર ન નીકળવા, બાળકોને એકલા ન મોકલવા અને પાલતુ પ્રાણીઓને ખુલ્લામાં ન રાખવા ખાસ અપીલ કરવામાં આવી છે.
વનવિભાગે લોકોને દીપડો જોવા મળે તો તેની નજીક જવાનો, પીછો કરવાનો કે વીડિયો બનાવવાનો પ્રયાસ ન કરવા જણાવ્યું છે. દીપડાની કોઈપણ હિલચાલ જોવા મળે તો તાત્કાલિક વનવિભાગ અથવા પોલીસને જાણ કરવા સૂચના આપવામાં આવી છે.
હાલ વનવિભાગની ટીમો દ્વારા બોપલ-ઘુમા વિસ્તારમાં સર્ચ ઓપરેશન ચાલુ છે. દીપડો ઝડપાય નહીં ત્યાં સુધી સ્થાનિક લોકોને સતર્ક રહેવા અને તંત્રની સૂચનાઓનું પાલન કરવા અપીલ કરવામાં આવી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
