સ્વાતંત્ર્ય દિવસ પહેલાં દેશમાં સંભવિત આતંકવાદી અને વિધ્વંસક પ્રવૃત્તિઓને નિષ્ફળ બનાવવાના પ્રયાસોમાં ભારતીય સુરક્ષા એજન્સીઓને મોટી સફળતા મળી છે. કેન્દ્ર સરકારના જણાવ્યા મુજબ પાકિસ્તાન સ્થિત અને ISI સમર્થિત ‘શહઝાદ ભટ્ટી નેટવર્ક’ (SBN) સામે 14 રાજ્યોમાં સંકલિત કાર્યવાહી હાથ ધરવામાં આવી હતી. 12 ઑગસ્ટ, 2026ના રોજ હાથ ધરાયેલા આ ઑપરેશન દરમિયાન કુલ 253 લોકોને અટકાયતમાં લેવામાં આવ્યા હતા, જ્યારે અત્યાર સુધી નેટવર્ક સાથે જોડાયેલા 200થી વધુ લોકોની ધરપકડ કરવામાં આવી છે.
કેન્દ્રીય ગૃહમંત્રી અમિત શાહે આ કાર્યવાહી અંગે માહિતી આપતાં જણાવ્યું કે સીમાપારના આતંકવાદ સામે કેન્દ્ર સરકારની ‘ઝીરો ટોલરન્સ’ નીતિ અંતર્ગત સુરક્ષા એજન્સીઓએ રાજ્ય પોલીસ દળો સાથે મળીને આ નેટવર્ક સામે વ્યાપક કાર્યવાહી કરી છે. સરકારના સત્તાવાર નિવેદન મુજબ, દેશના અલગ-અલગ ભાગોમાં સક્રિય નેટવર્કના સભ્યો અને તેમના સંપર્કોની ઓળખ કરવા માટે રિયલ-ટાઇમ ઇન્ટેલિજન્સ શેરિંગનો ઉપયોગ કરવામાં આવ્યો હતો.
શું છે ‘શહઝાદ ભટ્ટી નેટવર્ક’?
કેન્દ્ર સરકારના જણાવ્યા પ્રમાણે, ‘શહઝાદ ભટ્ટી નેટવર્ક’ પાકિસ્તાન સ્થિત અને ISI સમર્થિત આતંકી સિન્ડિકેટ છે. તેના પર ભારતમાં ગ્રેનેડ અને IED હુમલા, પેટ્રોલ બૉમ્બ હુમલા તથા ટાર્ગેટેડ કિલિંગ જેવી પ્રવૃત્તિઓ સાથે જોડાણ હોવાનો આરોપ છે. તપાસ એજન્સીઓનો દાવો છે કે આ નેટવર્ક સ્થાનિક સંપર્કો અને મદદગારો મારફતે ભારતના વિવિધ વિસ્તારોમાં પોતાનું નેટવર્ક વિસ્તારી રહ્યું હતું.
સુરક્ષા એજન્સીઓએ એવો પણ દાવો કર્યો છે કે નેટવર્ક દ્વારા સ્થાનિક લોકોનો ઉપયોગ સંવેદનશીલ સ્થળોની માહિતી મેળવવા અને જાસૂસી માટે કરવામાં આવતો હતો. તપાસ દરમિયાન જાસૂસીમાં ઉપયોગમાં લેવાતા CCTV કેમેરા પણ કબજે કરવામાં આવ્યા હોવાનું સત્તાવાર નિવેદનમાં જણાવાયું છે.
Union Home Minister Amit Shah says, "Modi govt destroyed the ISI-backed terror group Shahzad Bhatti Network ahead of Independence Day and thwarted its plans for subversive attacks by arresting more than 200 operatives. Indian security forces ripped apart the network by launching… pic.twitter.com/7dYs6adNat
— ANI (@ANI) August 17, 2026
14 રાજ્યોમાં એકસાથે મોટું ઑપરેશન
12 ઑગસ્ટે હાથ ધરાયેલી કાર્યવાહી દરમિયાન દેશના 14 રાજ્યોમાં કુલ 253 લોકોને અટકાયતમાં લેવામાં આવ્યા હતા. સૌથી વધુ 62 લોકો ઉત્તર પ્રદેશમાંથી અટકાયતમાં લેવાયા હતા. હરિયાણામાંથી 52, દિલ્હીમાં 51 અને પંજાબમાં 44 લોકોને અટકાયતમાં લેવામાં આવ્યા હતા. રાજસ્થાનમાંથી 15 અને મહારાષ્ટ્રમાંથી 8 લોકો સામે કાર્યવાહી કરવામાં આવી હતી.
ઉત્તરાખંડમાંથી 5, જ્યારે ગુજરાત, કર્ણાટક અને બિહારમાંથી 3-3 લોકોની અટકાયત કરવામાં આવી હતી. તેલંગાણા, હિમાચલ પ્રદેશ, જમ્મુ-કાશ્મીર અને કેરળમાંથી 2-2 લોકોને અટકાયતમાં લેવામાં આવ્યા હતા. આ રીતે એક જ સંકલિત કાર્યવાહીમાં 14 રાજ્યો સુધી ફેલાયેલા સંપર્કોને સુરક્ષા એજન્સીઓએ નિશાન બનાવ્યા હતા.
IED અને પાકિસ્તાન ઓર્ડનન્સ ફેક્ટરીના માર્કિંગવાળા ગ્રેનેડ મળ્યાનો દાવો
આ ઑપરેશન દરમિયાન સુરક્ષા એજન્સીઓએ મોટા પ્રમાણમાં શંકાસ્પદ અને ઘાતક સામગ્રી જપ્ત કરી છે. સત્તાવાર માહિતી અનુસાર, કબજે કરવામાં આવેલી સામગ્રીમાં IED, પાકિસ્તાન ઓર્ડનન્સ ફેક્ટરી (POF)ના માર્કિંગ ધરાવતા ગ્રેનેડ, પિસ્તોલ, જીવંત કારતૂસ અને જાસૂસી માટે ઉપયોગમાં લેવાતા CCTV કેમેરાનો સમાવેશ થાય છે.
કેન્દ્ર સરકારનું કહેવું છે કે જપ્ત કરાયેલી સામગ્રી નેટવર્કના સીમાપારના સંપર્કો તરફ સંકેત કરે છે. ખાસ કરીને POF માર્કિંગવાળા ગ્રેનેડ અને અન્ય સામગ્રીને તપાસ એજન્સીઓ મહત્વપૂર્ણ પુરાવા તરીકે જોઈ રહી છે. જોકે સમગ્ર નેટવર્કની કામગીરી, ફંડિંગ અને વ્યક્તિગત આરોપીઓની ભૂમિકા અંગે વધુ તપાસ ચાલી રહી છે.
સંવેદનશીલ સ્થળોની રેકી કરાવાતી હોવાનો આરોપ
તપાસ એજન્સીઓના જણાવ્યા મુજબ નેટવર્ક સ્થાનિક મદદગારોની મદદથી મહત્વપૂર્ણ અને સંવેદનશીલ સ્થળોની માહિતી એકત્ર કરવાનો પ્રયાસ કરતું હતું. સુરક્ષા સંબંધિત સ્થળો સહિત કેટલાક ટાર્ગેટ અંગે રેકી કરાવવામાં આવતી હોવાની પણ તપાસ ચાલી રહી છે.
એજન્સીઓ એ પણ તપાસી રહી છે કે નેટવર્ક સાથે જોડાયેલા લોકોને નાણાકીય મદદ કેવી રીતે પહોંચતી હતી અને ભારતમાં કાર્યરત અલગ-અલગ મોડ્યુલો વચ્ચે સંપર્ક માટે કયા માધ્યમોનો ઉપયોગ થતો હતો.
80થી વધુ FIR, 200થી વધુ ધરપકડ
કેન્દ્ર સરકારના સત્તાવાર નિવેદન પ્રમાણે, શહઝાદ ભટ્ટી નેટવર્ક સામે અત્યાર સુધીમાં 80થી વધુ FIR નોંધવામાં આવી છે અને 200થી વધુ લોકોની ધરપકડ કરવામાં આવી છે. કેસોમાં UAPA, ભારતીય ન્યાય સંહિતા (BNS), આર્મ્સ એક્ટ, NDPS એક્ટ અને Explosive Substances Act સહિતની વિવિધ કાયદાકીય જોગવાઈઓ લાગુ કરવામાં આવી છે.
દિલ્હી અને કર્ણાટક સહિત વિવિધ રાજ્યોમાં તપાસ આગળ વધારવામાં આવી રહી છે. સુરક્ષા એજન્સીઓ નેટવર્કના ફંડિંગ, હથિયારોની સપ્લાય ચેઇન, સ્થાનિક સંપર્કો અને સીમાપારના સંચાલકો વચ્ચેની કડીઓ શોધવા પર ધ્યાન કેન્દ્રિત કરી રહી છે.
સ્વાતંત્ર્ય દિવસ પહેલાં સુરક્ષા એજન્સીઓની મોટી કાર્યવાહી
સ્વાતંત્ર્ય દિવસ પહેલાં 12 ઑગસ્ટે હાથ ધરાયેલું આ ઑપરેશન દેશની આંતરિક સુરક્ષાની દૃષ્ટિએ મહત્વપૂર્ણ માનવામાં આવી રહ્યું છે. કેન્દ્ર સરકારનું કહેવું છે કે સીમાપારથી પ્રેરિત આતંકી નેટવર્ક અને તેના સ્થાનિક માળખાને તોડી પાડવા માટે કેન્દ્ર તથા રાજ્યની એજન્સીઓ વચ્ચે સંકલિત કાર્યવાહી ચાલુ રહેશે.
સરકારે સ્પષ્ટ કર્યું છે કે સીમાપારના આતંકવાદ સામે ‘ઝીરો ટોલરન્સ’ નીતિ હેઠળ આવા નેટવર્ક સામે આગળ પણ કડક કાર્યવાહી કરવામાં આવશે. હાલ અટકાયતમાં લેવાયેલા અને ધરપકડ કરાયેલા લોકોની ચોક્કસ ભૂમિકા અંગે તપાસ ચાલુ છે અને તેના આધારે આગળની કાયદાકીય કાર્યવાહી કરવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
