વડાપ્રધાન નરેન્દ્ર મોદીની અમેરિકા મુલાકાતને લઈને તૈયારીઓ જોરશોરથી ચાલી રહી છે. પીએમ મોદીની આ મુલાકાત ઘણી રીતે ખાસ રહેવાની છે. પીએમ મોદીને આવકારવા માટે ત્યાં સાંસ્કૃતિક કાર્યક્રમો રજૂ કરવામાં આવશે, વ્હાઈટ હાઉસ પહોંચતા તેમનું સ્વાગત કેવી રીતે કરવામાં આવશે, આ તમામ બાબતો માટે પ્લાનિંગ શરૂ કરી દેવામાં આવ્યું છે. પીએમ મોદીનું સ્વાગત એન્ડ્રુઝ એરફોર્સ બેઝથી જ શરૂ થશે. જ્યાં પીએમ મોદીનું એર ઈન્ડિયા વન પ્લેન લેન્ડ થશે.
લગભગ 600 ભારતીય અમેરિકન સભ્યો વોશિંગ્ટન ડીસીમાં વ્હાઈટ હાઉસ નજીક વિલાર્ડ ઈન્ટરકોન્ટિનેન્ટલની સામે ફ્રીડમ પ્લાઝા ખાતે એકઠા થવાની યોજના બનાવી રહ્યા છે. પીએમ મોદી તેમના અમેરિકન પ્રવાસ દરમિયાન આ ફ્રીડમ પ્લાઝામાં રોકાશે. ફ્રીડમ પ્લાઝા ખાતે ભારતીય સમુદાય દ્વારા આવા કેટલાક સાંસ્કૃતિક કાર્યક્રમો રજૂ કરવામાં આવશે, જેમાં કાશ્મીરથી કન્યાકુમારી અને પશ્ચિમથી પૂર્વ સુધીની ઝલક જોવા મળશે.
ઓવરસીઝ ફ્રેન્ડ્સ ઓફ બીજેપી-યુએસએના પ્રમુખ અદાપા પ્રસાદે ANIને જણાવ્યું કે કાર્યક્રમ દ્વારા ભારતનો વિકાસ બતાવવામાં આવશે. વિવિધ સંસ્કૃતિ આધારિત કાર્યક્રમો રજૂ કરવામાં આવશે. તેમણે કહ્યું કે અમારી પાસે કાશ્મીરથી કેરળ અને ઉત્તરપૂર્વમાં મહારાષ્ટ્રનું પ્રતિનિધિત્વ કરતી લગભગ 25 ઇવેન્ટ છે. તેમાં લગભગ 160 કલાકારો ભાગ લે છે.
તેમણે વધુમાં કહ્યું કે, ભારતીય અમેરિકન સમુદાયને લાગે છે કે તેઓ પીએમ મોદીની આ ઐતિહાસિક મુલાકાતનો હિસ્સો હોવા જોઈએ. તેમનું માનવું છે કે આ એક મહત્વપૂર્ણ પ્રસંગ છે, ખાસ કરીને જ્યારે ભારત વિશ્વની પાંચમી સૌથી મોટી અર્થવ્યવસ્થા બની ગયું છે. સમુદાયને તેમના દેશ પર ખૂબ ગર્વ છે.
લગભગ 7000 ભારતીય અમેરિકનો 22 જૂને સાઉથ લૉનમાં હાજર રહેવાની યોજના બનાવી રહ્યા છે, જ્યારે યુએસ પ્રમુખ જો બાઈડન અને તેમની પત્ની વ્હાઇટ હાઉસમાં પીએમ મોદીનું 21 તોપોની સલામી સાથે સ્વાગત કરશે. જો કે, સ્વાગત કાર્યક્રમમાં હાજરી આપવા માટે નોંધણીની પ્રક્રિયા હવે અંતિમ તબક્કામાં છે અને ટૂંક સમયમાં બંધ કરવામાં આવશે.
પીએમ મોદી તેમના પ્રવાસ દરમિયાન બીજી વખત યુએસ કોંગ્રેસની સંયુક્ત બેઠકને સંબોધિત કરશે. પીએમની મુલાકાતને લઈને અમેરિકામાં રહેતા એક ભારતીયે કહ્યું કે તેમને યુએસ કોંગ્રેસને સંબોધિત કરવા માટે મોકલવામાં આવેલ આમંત્રણ અમેરિકા અને ભારત વચ્ચેના સંબંધોનું ઐતિહાસિક મહત્વ દર્શાવે છે. આ સિવાય પીએમ મોદી અમેરિકાની ટોચની કંપનીઓના સીઈઓને પણ સંબોધિત કરશે.
