પૂર્વ વડાપ્રધાન મનમોહન સિંહના સ્મારકને લઈને રાજનીતિ શરૂ કરી દેવામાં આવી છે. કોંગ્રેસે કેન્દ્ર સરકાર પાસે સ્મારક બનાવવા જમીન ફાળવવાની માંગ કરી છે. જો કે હવે કેન્દ્ર સરકાર પૂર્વ વડાપ્રધાન મનમોહન સિંહના સ્મારક માટે જગ્યા ફાળવવા માટે સંમત થઈ ગઈ છે. એટલે કે સરકારે કોંગ્રેસની માંગણીનો સ્વીકાર કર્યો છે.
મનમોહન સિંહને સન્માન આપવા સરકાર પ્રતિબદ્ધ
આ અંગે મીડિયા સાથે વાત કરતા, ભાજપના પ્રવક્તા અને રાજ્યસભાના સાંસદ સુધાંશુ ત્રિવેદીએ જણાવ્યું હતું કે “વડાપ્રધાન મોદીના નેતૃત્વમાં ભાજપ અને એનડીએ સરકાર દેશના આર્થિક વિકાસ માટે મુખ્ય પાયો નાખનાર મનમોહન સિંહને યોગ્ય સન્માન આપવા માટે સંપૂર્ણપણે પ્રતિબદ્ધ છે. જેને ધ્યાનમાં રાખીને, ગઈકાલે કેબિનેટે તેની બેઠકમાં નિર્ણય લીધો હતો કે મનમોહન સિંહની યાદમાં એક સ્મારક બનાવવામાં આવશે અને આ અંગેની જાણ કોંગ્રેસ પાર્ટીને પણ કરવામાં આવી હતી.
અમિત શાહે ખડગેને પણ જાણ કરી
તેમણે ઉમેર્યું હતું કે કેન્દ્રીય ગૃહ પ્રધાન અમિત શાહે કોંગ્રેસ અધ્યક્ષ મલ્લિકાર્જુન ખડગેને એ વાતની જાણ કરી હતી કે સરકારે સ્મારક બનાવવાનું નક્કી કર્યું છે અને જમીન સંપાદન, ટ્રસ્ટની રચના અને જમીન ટ્રાન્સફર જેવી પ્રક્રિયાઓ પૂર્ણ થવામાં થોડો સમય લાગશે પણ કાર્ય યોગ્ય રીતે અને શક્ય તેટલું જલ્દી કરવામાં આવશે. કોંગ્રેસે કહ્યું છે કે તે ડો. મનમોહન સિંહના અંતિમ સંસ્કાર એવા સ્થળે કરવા માંગે છે જ્યાં સ્મારક બનાવવામાં આવવાનું છે. જો કે તેમના અંતિમ સંસ્કાર નિગમબોધ ઘાટ પર સાર્વજનિક સ્મશાન ગૃહમાં કરવામાં આવવાના છે.
2013માં જ સરકારે કરી હતી જાહેરાત
અત્રે ઉલ્લેખનીય છે કે મનમોહન સિંહના નેતૃત્વમાં યુપીએ સરકારે જ વર્ષ 2013માં કહ્યું હતું કે વ્યક્તિગત સ્મારકોને બદલે રાજઘાટ ખાતેના રાષ્ટ્રીય સ્મૃતિ સ્થળ પર તમામ ભાવિ વડા પ્રધાનો અને નેતાઓ માટે એક સામાન્ય સ્મારક મેદાન હશે.
