અમદાવાદમાંથી એક ગંભીર અને ચિંતાજનક મામલો સામે આવ્યો છે, જેમાં ઓનલાઇન ગેમિંગના માધ્યમથી એક 16 વર્ષીય સગીરાને પ્રેમજાળમાં ફસાવીને દુષ્કર્મ અને અપહરણ કરવાનો આરોપ સામે આવ્યો છે. આ કેસમાં પશ્ચિમ બંગાળના યુવક આશિક ઉર્ફે અરમાન મોહમ્મદ અઝગર (ઉંમર 21 વર્ષ)ની ધરપકડ કરવામાં આવી છે. આરોપી ઓનલાઇન મોબાઇલ ગેમ ‘ફ્રી ફાયર’ દરમિયાન સગીરાના સંપર્કમાં આવ્યો હતો અને દોઢ વર્ષથી વધુ સમયથી તેની સાથે ફોન અને વોટ્સએપ પર સંપર્કમાં હતો. ગેમ રમતા રમતા બંને વચ્ચે મિત્રતા થઈ હતી, જે બાદમાં ચેટિંગ અને વાતચીત પ્રેમસબંધમાં બદલાઈ ગઈ હતી.
પીડિતા અમદાવાદના વેજલપુર વિસ્તારમાં રહે છે અને હાલ 12 સાયન્સમાં અભ્યાસ કરી રહી છે. તપાસમાં સામે આવ્યું છે કે આરોપી અગાઉ પણ બે વખત અમદાવાદ આવ્યો હતો અને સગીરાના ઘરે કોઈ ન હોય ત્યારે તેને મળ્યો હતો. તાજેતરમાં 22 જાન્યુઆરી 2026ના રોજ આરોપી પશ્ચિમ બંગાળથી અમદાવાદ આવ્યો હતો અને પીડિતાના ઘરે પહોંચ્યો હતો. આરોપ છે કે ઘરમાં કોઈ હાજર ન હોય તે સમયે તેણે સગીરા પર દુષ્કર્મ આચર્યું હતું. ત્યારબાદ તેણે સગીરાને ફોસલાવીને પોતાના સાથે પશ્ચિમ બંગાળ લઈ જવા માટે તૈયાર કરી હતી.
23 જાન્યુઆરીએ આરોપી અને સગીરા બંને અમદાવાદના કાલુપુર રેલવે સ્ટેશનથી ટ્રેનમાં બેસીને પશ્ચિમ બંગાળ જવા રવાના થયા હતા. બીજી તરફ દીકરી અચાનક ગાયબ થતાં પરિવાર ચિંતામાં મુકાયો હતો. શોધખોળ છતાં કોઈ ભાળ ન મળતાં પરિવારે વેજલપુર પોલીસ સ્ટેશનમાં સગીરા ગુમ થયાની ફરિયાદ નોંધાવી હતી. ફરિયાદ મળતાં જ વેજલપુર પોલીસે તાત્કાલિક તપાસ શરૂ કરી અને મોબાઇલ લોકેશન, કોલ ડીટેઇલ્સ તથા ટેકનિકલ સર્વેલન્સની મદદથી આરોપી અને સગીરાની હિલચાલ અંગે માહિતી મેળવી.
પોલીસને જાણ થઈ કે બંને ટ્રેન મારફતે પશ્ચિમ બંગાળ તરફ જઈ રહ્યા છે, જેના આધારે ખડગપુર રેલવે પોલીસને તરત જ એલર્ટ કરવામાં આવી હતી. ટ્રેન ખડગપુર રેલવે સ્ટેશન પહોંચતાં જ રેલવે પોલીસે બંનેને ઝડપી લીધા હતા. ત્યારબાદ વેજલપુર પોલીસની ટીમ ખડગપુર પહોંચી આરોપીની કસ્ટડી લઈને અમદાવાદ પરત આવી હતી, જ્યારે સગીરાને સુરક્ષિત રીતે તેના પરિવારને સોંપવામાં આવી છે.
વેજલપુર પોલીસે આરોપી વિરુદ્ધ અપહરણ અને દુષ્કર્મ સહિતની ગંભીર કલમો હેઠળ ગુનો નોંધ્યો છે. આરોપીનો મેડિકલ રિપોર્ટ બાકી હોવાનું જણાવવામાં આવ્યું છે, ત્યારબાદ આગળની કાનૂની કાર્યવાહી હાથ ધરવામાં આવશે. એ.એમ. ડિવિઝનના એસીપી એ.બી. વાળંદે જણાવ્યું હતું કે ટેકનિકલ સર્વેલન્સના આધારે આરોપી ટ્રેન મારફતે પશ્ચિમ બંગાળ તરફ જઈ રહ્યો હોવાનું સામે આવતા ખડગપુર રેલવે પોલીસને એલર્ટ કરવામાં આવી હતી અને સમયસર કાર્યવાહી કરીને પીડિતાને સુરક્ષિત રીતે બચાવી લેવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
