ભારતીય જનતા પાર્ટી (BJP) દ્વારા રાજ્યભરમાં શહેર અને જિલ્લા સ્તરે સંગઠન મજબૂત બનાવવા માટે નવી ટીમોની જાહેરાત ચાલી રહી છે. આ ક્રમમાં આજે 14 ફેબ્રુઆરીએ અમદાવાદ શહેર ભાજપ સંગઠનની નવી ટીમ જાહેર કરવામાં આવી છે. શહેર પ્રમુખ પ્રેરક શાહે નવા હોદ્દેદારોના નામોની સત્તાવાર જાહેરાત કરી હતી. નવી રચનામાં વિવિધ સમાજોને પ્રતિનિધિત્વ આપતા નેતાઓને સ્થાન આપવામાં આવ્યું છે અને સંગઠનને વધુ સક્રિય બનાવવા પર ખાસ ભાર મૂકાયો છે.
નવી ટીમમાં શહેરના મહામંત્રી તરીકે યુવા નેતા દર્શક ઠાકર, પૂર્વ કોર્પોરેટર ગૌતમભાઈ કથીરિયા અને શાહીબાગ વોર્ડના કોર્પોરેટર જશુભાઈ ઠાકોરને જવાબદારી સોંપવામાં આવી છે. મહામંત્રી પદે બ્રાહ્મણ, લેઉવા પાટીદાર અને ઓબીસી સમાજના પ્રતિનિધિત્વને સ્થાન આપીને સામાજિક સંતુલન જાળવવાનો પ્રયાસ કરવામાં આવ્યો છે. સંગઠનની રચનામાં 8 ઉપપ્રમુખોની નિમણૂક કરવામાં આવી છે, જેમાં બે મહિલાઓનો સમાવેશ થાય છે, જે મહિલાઓના વધતા પ્રતિનિધિત્વ તરફ ઈશારો કરે છે.
મહિલા મોરચામાં પણ મહત્વપૂર્ણ ફેરફારો સાથે નંદિનીબેન પંડ્યાને પ્રમુખ તરીકે અને ચંદાબેન પટેલ તથા નીકીબેન શાહને મહામંત્રી તરીકે જવાબદારી આપવામાં આવી છે. યુવા મોરચાના પ્રમુખ તરીકે કેતુ પટેલ અને મહામંત્રી તરીકે આકાશ ગેહલોત તથા મહર્ષિ પાઠકની નિમણૂક કરવામાં આવી છે. બક્ષીપંચ મોરચાના પ્રમુખ તરીકે ગૌરાંગ પ્રજાપતિ, અનુસૂચિત મોરચાના પ્રમુખ તરીકે ઉમંગ સરવૈયા, અનુસૂચિત જનજાતિ મોરચાના પ્રમુખ તરીકે રમેશ રાણા અને કિસાન મોરચાના પ્રમુખ તરીકે પ્રવીણ જોગાણીને જવાબદારી સોંપવામાં આવી છે.
સંગઠનના પ્રચાર અને માહિતી વ્યવસ્થાને વધુ મજબૂત બનાવવા માટે મીડિયા ઇન્ચાર્જ તરીકે ડો. નિલય શુકલ અને સોશિયલ મીડિયા ઇન્ચાર્જ તરીકે ઝલકિત પટેલની નિમણૂક કરવામાં આવી છે. નવી ટીમમાં વર્તમાન કોર્પોરેટરો તેમજ પૂર્વ હોદ્દેદારોને ફરી તક આપવામાં આવી છે, જેનો મુખ્ય હેતુ સંગઠનની સતતતા જાળવીને શહેર સ્તરે ભાજપની રાજકીય કામગીરીને વધુ અસરકારક બનાવવાનો છે.
નવી રચનાથી અમદાવાદ શહેર ભાજપ સંગઠન વધુ સક્રિય બની આવનારા રાજકીય કાર્યક્રમો અને ચૂંટણીને ધ્યાનમાં રાખીને કાર્ય કરશે તેવી આશા વ્યક્ત કરવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
