ભારતમાં ઓનલાઈન કેબ બુકિંગ અને ટેક્સી સેવા ક્ષેત્રે અત્યાર સુધી અમુક મોટી ખાનગી અને બહુરાષ્ટ્રીય કંપનીઓનો દબદબો રહ્યો છે. આ મોડલમાં ડ્રાઇવરો પાસેથી ઊંચા કમિશન, મોડા પેમેન્ટ અને આર્થિક શોષણ જેવી ફરિયાદો વારંવાર સામે આવતી રહી છે. હવે આ જ ક્ષેત્રમાં સહકારિતા આધારિત એક નવો વિકલ્પ તરીકે ‘ભારત ટેક્સી’ સેવાનો ગુજરાતથી પ્રારંભ કરવામાં આવ્યો છે.
ગાંધીનગરના મહાત્મા મંદિર ખાતે આયોજિત કાર્યક્રમમાં કેન્દ્રીય ગૃહ અને સહકાર મંત્રી અમિત શાહે ‘ભારત ટેક્સી’ સેવાનું ડિજિટલ લોન્ચિંગ કર્યું. આ સેવાને દેશની પ્રથમ સહકારિતા આધારિત ટેક્સી સેવા તરીકે રજૂ કરવામાં આવી રહી છે, જેમાં ડ્રાઇવર માત્ર કામદાર નહીં રહે, પરંતુ સેવા વ્યવસ્થાનો ભાગીદાર અને માલિક બનશે.
ડ્રાઇવરોને મજૂર નહીં, દેશના ‘સારથી’ ગણાવ્યા
લૉન્ચિંગ પ્રસંગે અમિત શાહે જણાવ્યું કે ગાડી, ટેક્સી કે રિક્ષા ચલાવતા લોકો માત્ર સામાન્ય મજૂર નથી, પરંતુ દેશના ‘સારથી’ છે. તેમના જણાવ્યા મુજબ, અત્યાર સુધીની કેટલીક ખાનગી એપ આધારિત કંપનીઓમાં ડ્રાઇવરોની રજૂઆતો સાંભળાતી નહોતી, નફામાંથી મોટો હિસ્સો કમિશન તરીકે કાપવામાં આવતો હતો અને ઘણીવાર મહેનતાણું પણ સમયસર મળતું નહોતું.
અમિત શાહે કહ્યું કે ‘ભારત ટેક્સી’ સહકારિતા મોડલ પર આધારિત હોવાથી તેમાં ડ્રાઇવરોના હિતને કેન્દ્રમાં રાખવામાં આવ્યું છે. આ મોડલમાં નફાનો લાભ થોડા માલિકો સુધી મર્યાદિત રહેવાના બદલે સેવા સાથે જોડાયેલા ડ્રાઇવર-સારથીઓ સુધી પહોંચે તેવી વ્યવસ્થા કરવાનો પ્રયાસ છે.
માનનીય વડાપ્રધાન શ્રી નરેન્દ્રભાઈ મોદીજીના સક્ષમ નેતૃત્વમાં તેમજ કેન્દ્રીય ગૃહ અને સહકાર મંત્રી શ્રી અમિતભાઈ શાહજીના કુશળ માર્ગદર્શનમાં આજે દેશનું સહકારી ક્ષેત્ર સતત સફળતા સાથે અસંખ્ય પરિવારોની આત્મનિર્ભરતા માધ્યમ બન્યું છે.
અત્યાર સુધી સહકાર ક્ષેત્ર માત્ર કૃષિ અને પશુપાલન જેવા… pic.twitter.com/d8EGc4B5vz
— Bhupendra Patel (@Bhupendrapbjp) June 27, 2026
‘સારથી હી માલિક’ મોડલથી બદલાશે કેબ સર્વિસનો માળખો
‘ભારત ટેક્સી’નું મુખ્ય સૂત્ર ‘સારથી હી માલિક’ છે. એટલે કે જે ડ્રાઇવર સેવા આપે છે, તે જ આ વ્યવસ્થાનો માલિક અને હિસ્સેદાર પણ બની શકે. આ મોડલ પરંપરાગત ખાનગી કેબ એગ્રિગેટર મોડલથી અલગ છે, જેમાં નીતિ, કમિશન અને આવકનો મોટો નિયંત્રણ કંપનીઓ પાસે રહે છે.
સહકારિતા માળખામાં ડ્રાઇવરોને માત્ર રાઈડ પૂરી પાડનારા તરીકે નહીં, પરંતુ વ્યવસ્થાના સહભાગી તરીકે જોવામાં આવશે. સરકારનો દાવો છે કે આથી ડ્રાઇવરોની આવક વધુ સ્થિર બનશે, કમિશનનો ભાર ઓછો થશે અને ગ્રાહકોને પણ વાજબી દરે સેવા મળી શકશે.
અમૂલ અને ઇફકોનું ઉદાહરણ આપી સમજાવ્યું સહકારિતા મોડલ
અમિત શાહે પોતાના સંબોધનમાં અમૂલ, ઇફકો અને કૃભકો જેવી સહકારી સંસ્થાઓના ઉદાહરણ આપ્યા. તેમણે કહ્યું કે અમૂલના સહકારિતા મોડલે દેશના પશુપાલકો અને ખાસ કરીને મહિલાઓને આર્થિક રીતે મજબૂત બનાવ્યા છે. નાના ખેડૂતો અને પશુપાલકોની ભાગીદારીથી અમૂલ આજે લાખો પરિવારોની આવકનો આધાર બની છે.
તેમણે ઉમેર્યું કે ઇફકો અને કૃભકો જેવી સહકારી સંસ્થાઓએ કૃષિ અને ખાતર ક્ષેત્રમાં મહત્વપૂર્ણ યોગદાન આપ્યું છે. તેવી જ રીતે હવે ટ્રાન્સપોર્ટ અને મોબિલિટી સેક્ટરમાં પણ સહકારિતાની ક્રાંતિ લાવવાનો પ્રયાસ ‘ભારત ટેક્સી’ દ્વારા કરવામાં આવી રહ્યો છે.
गांधीनगर से देश की पहली सहकारिता आधारित टैक्सी सेवा 'भारत टैक्सी' के गुजरात में शुभारंभ कार्यक्रम से लाइव…
ગાંધીનગરથી દેશની પ્રથમ સહકારિતા આધારિત ટેક્સી સેવા 'ભારત ટેક્સી'ના ગુજરાતમાં શુભારંભ કાર્યક્રમથી લાઈવ… https://t.co/9qNNayXX2W
— Amit Shah (@AmitShah) June 27, 2026
ખાનગી કંપનીઓની મોનોપોલી સામે નવો વિકલ્પ
ભારતમાં છેલ્લા ઘણા વર્ષોથી એપ આધારિત કેબ સેવાઓમાં ખાનગી કંપનીઓનું વર્ચસ્વ રહ્યું છે. શરૂઆતમાં ઓછા ભાડા અને આકર્ષક ઓફરો દ્વારા ગ્રાહકોને જોડ્યા બાદ કમિશન માળખું, ભાડાના દર અને ડ્રાઇવરોની આવકને લઈને અનેક ફરિયાદો સામે આવી છે.
અમિત શાહે કહ્યું કે બજારમાં અફવા ફેલાવવામાં આવી રહી છે કે ‘ભારત ટેક્સી’ના દર વધારે હશે, પરંતુ વાસ્તવમાં આ સેવા વાજબી અને ઓછા દરે ઉપલબ્ધ કરાવવાનો પ્રયાસ છે. તેમના જણાવ્યા મુજબ, હરીફ કંપનીઓએ ‘ભારત ટેક્સી’ના પ્રવેશ પહેલાં જ પોતાના દર ઘટાડવાની શરૂઆત કરી છે. તેમણે કહ્યું કે આવી માર્કેટ ટેકનિક હવે ભારતમાં લાંબા સમય સુધી ચાલશે નહીં.
ડ્રાઇવરોના આર્થિક શોષણ પર રોક લગાવવાનો દાવો
‘ભારત ટેક્સી’ સેવાનો સૌથી મોટો દાવો એ છે કે તે ડ્રાઇવરોના આર્થિક શોષણને રોકશે. ખાનગી કંપનીઓમાં ઊંચું કમિશન કાપ્યા બાદ ડ્રાઇવરોને મર્યાદિત આવક રહેતી હોવાના આરોપો લાંબા સમયથી લાગતા રહ્યા છે. ઘણા ડ્રાઇવરોનું કહેવું રહ્યું છે કે પેટ્રોલ-ડીઝલ, વાહન લોન, મેન્ટેનન્સ અને એપ કમિશન બાદ તેમની બચત ઓછી રહે છે.
સહકારિતા મોડલમાં ડ્રાઇવરોને માલિકી અને નફાની ભાગીદારી સાથે જોડવાનો પ્રયાસ કરવામાં આવશે. આથી ડ્રાઇવરોને પોતાની મહેનતનો વધુ ન્યાયસંગત હિસ્સો મળી શકે તેવો સરકારનો દાવો છે.
ભારત ટેક્સી એટલે સારથી અને ગ્રાહક બંનેને ફાયદો.. @BharatTaxi pic.twitter.com/d9sdpcvBba
— Bhupendra Patel (@Bhupendrapbjp) June 27, 2026
ઓટોરિક્ષાથી ટેક્સી સુધી, ટ્રાન્સપોર્ટ સેક્ટરમાં મોટો ફેરફાર
અમિત શાહે કહ્યું કે આજે ટેક્સી સેવા માત્ર કાર સુધી મર્યાદિત નથી રહી. સામાન્ય ઓટોરિક્ષા પણ શહેરી પરિવહન વ્યવસ્થાનો મહત્વપૂર્ણ ભાગ છે. શહેરોમાં રોજિંદી મુસાફરી માટે લોકો ટેક્સી, ઓટો અને એપ આધારિત વાહનોનો મોટા પ્રમાણમાં ઉપયોગ કરે છે.
આવી સ્થિતિમાં સહકારિતા આધારિત ટેક્સી સેવા ડ્રાઇવરો, મુસાફરો અને શહેરી પરિવહન વ્યવસ્થા માટે નવો વિકલ્પ બની શકે છે. જો આ મોડલ સફળ થાય, તો ભવિષ્યમાં તે અન્ય રાજ્યોમાં પણ વિસ્તાર પામી શકે છે.
ગુજરાતથી શરૂ થયેલી સેવા દેશવ્યાપી મોડલ બની શકે
ગુજરાતને સહકારિતા ક્ષેત્રમાં મજબૂત પરંપરા ધરાવતું રાજ્ય માનવામાં આવે છે. અમૂલ જેવી સહકારી ક્રાંતિનું જન્મસ્થળ પણ ગુજરાત જ છે. તેથી ‘ભારત ટેક્સી’ જેવી સહકારિતા આધારિત મોબિલિટી સેવા ગુજરાતથી શરૂ કરવી પ્રતીકાત્મક અને વ્યૂહાત્મક રીતે મહત્વપૂર્ણ માનવામાં આવે છે.
સરકાર અને સહકારી ક્ષેત્ર સાથે જોડાયેલા લોકોનું માનવું છે કે ‘ભારત ટેક્સી’ જો ગુજરાતમાં સફળતા મેળવે, તો તે દેશના અન્ય રાજ્યોમાં પણ પ્રેરણાદાયી મોડલ બની શકે છે. આથી પરિવહન ક્ષેત્રમાં ખાનગી મોનોપોલી સામે સહકારી, પારદર્શક અને ડ્રાઇવર-કેન્દ્રિત વિકલ્પ ઊભો થઈ શકે છે.
ભારત ટેક્સી એટલે સારથીઓનું શોષણ અટકાવીને તેમના સન્માન અને સમૃદ્ધિ માટેની નવતર પહેલ. #BharatTaxi pic.twitter.com/VZkuQ8FtKE
— Bhupendra Patel (@Bhupendrapbjp) June 27, 2026
‘સહકારથી સમૃદ્ધિ’ હવે ટ્રાન્સપોર્ટ સેક્ટરમાં
‘ભારત ટેક્સી’ સેવા PM મોદીના ‘સહકારથી સમૃદ્ધિ’ના વિઝનને ટ્રાન્સપોર્ટ અને મોબિલિટી ક્ષેત્ર સુધી પહોંચાડવાનો પ્રયાસ છે. અત્યાર સુધી સહકારિતાનું મોટું યોગદાન દૂધ, કૃષિ, ખાતર અને બેંકિંગ ક્ષેત્રમાં જોવા મળ્યું છે. હવે ટેક્સી અને કેબ સર્વિસ જેવા શહેરી પરિવહન ક્ષેત્રમાં પણ સહકારિતાને આગળ લાવવામાં આવી રહી છે.
આ મોડલથી ડ્રાઇવરોને આર્થિક સુરક્ષા, ગ્રાહકોને વાજબી સેવા અને પરિવહન ક્ષેત્રને વધુ પારદર્શક માળખું મળી શકે તેવી આશા છે. જોકે, તેની સફળતા અમલીકરણ, ટેકનોલોજી, સેવા ગુણવત્તા, દરોની પારદર્શિતા અને ડ્રાઇવરોની વાસ્તવિક ભાગીદારી પર નિર્ભર રહેશે.
ખાનગી કેબ માર્કેટને મળશે સીધી ટક્કર
‘ભારત ટેક્સી’ના લોન્ચિંગ સાથે જ ખાનગી કેબ કંપનીઓ માટે નવો પડકાર ઊભો થયો છે. અત્યાર સુધી ગ્રાહકો પાસે મર્યાદિત વિકલ્પો હતા, પરંતુ સહકારિતા આધારિત નવી સેવા બજારમાં સ્પર્ધા વધારી શકે છે. આથી ભાડા, કમિશન અને સેવા ગુણવત્તા અંગે કેબ માર્કેટમાં નવી સ્પર્ધા શરૂ થવાની શક્યતા છે.
જો ‘ભારત ટેક્સી’ ડ્રાઇવરોને વધુ લાભ અને મુસાફરોને વાજબી દરે વિશ્વસનીય સેવા આપી શકશે, તો તે માત્ર એક નવી એપ નહીં, પરંતુ ભારતના પરિવહન ક્ષેત્રમાં સહકારિતા આધારિત મોટા પરિવર્તનનું પ્રતિક બની શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
