છોટાઉદેપુર નગરપાલિકાના રાજકારણમાં છેલ્લા કેટલાક સમયથી સતત ઉથલપાથલ જોવા મળી રહી છે. જાતિ પ્રમાણપત્રની ચકાસણીના મુદ્દે પાલિકા પ્રમુખ સહિતના સભ્યોનું સભ્યપદ રદ થયા બાદ હવે ફેબ્રુઆરી 2025માં યોજાયેલી નગરપાલિકાની ચૂંટણીમાં એક ઉમેદવારી ફોર્મ મંજૂર કરવાની પ્રક્રિયા સામે સવાલો ઊભા થયા છે. આ મામલે રાજ્ય ચૂંટણી પંચે છોટાઉદેપુર જિલ્લા મ્યુનિસિપલ ચૂંટણી અધિકારી અને કલેક્ટર પાસેથી સ્પષ્ટતા માગી હોવાનું સામે આવ્યું છે.
વોર્ડ નંબર 7ના ઉમેદવારી ફોર્મને લઈને વિવાદ
મામલો 16 ફેબ્રુઆરી 2025ના રોજ યોજાયેલી છોટાઉદેપુર નગરપાલિકાની ચૂંટણી સાથે જોડાયેલો છે. વોર્ડ નંબર 7માં એક ઉમેદવારના નામ અને જમીન-મિલકત સંબંધિત દસ્તાવેજોમાં દર્શાવાયેલા નામ વચ્ચે વિસંગતતા હોવાની રજૂઆત રાજ્ય ચૂંટણી પંચ સમક્ષ કરવામાં આવી છે.
રાજ્ય ચૂંટણી પંચને નીરુબેન રાઠવા દ્વારા કરવામાં આવેલી રજૂઆતમાં જણાવ્યા મુજબ, જમીન મિલકતના 7/12ના ઉતારામાં ઉમેદવારનું નામ ‘કોળી મંગીબેન જંગલીયાભાઈ’ દર્શાવવામાં આવ્યું છે, જ્યારે નગરપાલિકાની ચૂંટણી માટે ઉમેદવારી ફોર્મ ‘બારિયા મીનાબેન ભૂપતભાઈ’ના નામે ભરવામાં આવ્યું હતું. આ બંને નામ વચ્ચેની વિસંગતતાને લઈને હવે ઉમેદવારી ફોર્મ કયા દસ્તાવેજો અને પુરાવાના આધારે મંજૂર કરવામાં આવ્યું હતું તે અંગે સવાલો ઊભા થયા છે.
રિટર્નિંગ ઓફિસરે કયા આધારે ફોર્મ મંજૂર કર્યું?
આ મામલે સૌથી મહત્વનો પ્રશ્ન ઉમેદવારી ફોર્મની ચકાસણીની પ્રક્રિયાને લઈને ઊભો થયો છે. ચૂંટણી દરમિયાન ઉમેદવારી ફોર્મની ચકાસણી કરતી વખતે રિટર્નિંગ ઓફિસર (RO) સમક્ષ આ વિસંગતતા આવી હતી કે નહીં તે અંગે સ્પષ્ટતા જરૂરી બની છે.
જો દસ્તાવેજોમાં અલગ-અલગ નામ હોવાની બાબત ધ્યાનમાં આવી હતી, તો ઉમેદવારી ફોર્મ કયા આધારે માન્ય રાખવામાં આવ્યું હતું તે પણ તપાસનો વિષય છે. સાથે જ ઉમેદવાર દ્વારા નામમાં ફેરફાર અંગે કોઈ સત્તાવાર ગેઝેટ નોટિફિકેશન અથવા અન્ય કાયદેસર દસ્તાવેજ રજૂ કરવામાં આવ્યો હતો કે કેમ તે મુદ્દો પણ મહત્ત્વનો બન્યો છે.
રાજ્ય ચૂંટણી પંચે કલેક્ટર પાસેથી માગી સ્પષ્ટતા
રજૂઆતને પગલે રાજ્ય ચૂંટણી પંચે મામલાની નોંધ લઈને છોટાઉદેપુર જિલ્લા મ્યુનિસિપલ ચૂંટણી અધિકારી અને કલેક્ટરને પત્ર મોકલ્યો છે. પંચે સમગ્ર મામલાની તપાસ કરીને હકીકત સ્પષ્ટ કરવા જણાવ્યું છે.
જો તપાસ દરમિયાન ઉમેદવારી ફોર્મની મંજૂરીની પ્રક્રિયામાં નિયમોનું પાલન ન થયું હોવાનું સામે આવે તો નિયમ અનુસાર યોગ્ય કાર્યવાહી કરવાનો મુદ્દો પણ ઊભો થઈ શકે છે. જોકે, ઉમેદવારી ફોર્મ ખરેખર નિયમવિરુદ્ધ રીતે મંજૂર થયું હતું કે કેમ તે અંગે અંતિમ નિષ્કર્ષ સત્તાવાર તપાસ અને કલેક્ટરના રિપોર્ટ બાદ જ આવી શકશે.
પાલિકાના રાજકારણમાં વધુ એક મુદ્દે ગરમાવો
છોટાઉદેપુર નગરપાલિકામાં અગાઉ જાતિ પ્રમાણપત્રની ચકાસણી બાદ પાલિકા પ્રમુખ સહિતના સભ્યોનું સભ્યપદ રદ થવાનો મુદ્દો ચર્ચામાં રહ્યો હતો. હવે આગામી પ્રમુખની ચૂંટણી પહેલાં જ ઉમેદવારી ફોર્મની મંજૂરીનો નવો વિવાદ સામે આવતાં સ્થાનિક રાજકારણ ફરી ગરમાયું છે.
હવે સૌની નજર જિલ્લા કલેક્ટર અને ચૂંટણી તંત્રની તપાસ પર છે. દસ્તાવેજોમાં દર્શાવાયેલા અલગ નામો પાછળનું કારણ શું છે, ઉમેદવારી સમયે કયા પુરાવા રજૂ કરવામાં આવ્યા હતા અને રિટર્નિંગ ઓફિસરે કયા આધારે ફોર્મ મંજૂર કર્યું હતું—આ તમામ પ્રશ્નોના જવાબ તપાસ બાદ સ્પષ્ટ થશે.
ધર્મેશ ચૌહાણ – (છોટાઉદેપુર)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
