દેશમાં છેલ્લા કેટલાક સમયથી ચાલી રહેલી LPG ગેસની અછત વચ્ચે રાહતના સમાચાર સામે આવ્યા છે. ‘શિવાલિક’ જહાજ બાદ હવે વિશાળ LPG કેરિયર ‘નંદા દેવી’ જામનગરના વાડીનાર પોર્ટ નજીક પહોંચી ગયું છે. આ જહાજના આગમન સાથે ગુજરાત સહિત દેશભરમાં રાંધણ ગેસ અને કોમર્શિયલ ગેસના પુરવઠામાં નોંધપાત્ર સુધારો થવાની શક્યતા વ્યક્ત કરવામાં આવી રહી છે.
મળતી માહિતી અનુસાર ‘નંદા દેવી’ જહાજમાં આશરે 46 હજાર મેટ્રિક ટન લિક્વિફાઇડ પેટ્રોલિયમ ગેસ (LPG) ભરાયેલો છે. છેલ્લા બે દિવસમાં બે મોટા જહાજો LPG લઈને ભારત પહોંચ્યા છે, જે ગેસ સપ્લાય માટે મહત્વપૂર્ણ સાબિત થઈ શકે છે. ‘નંદા દેવી’ જહાજ જામનગરના વાડીનાર પોર્ટ પર પહોંચી ગયું છે અને ટૂંક સમયમાં ગેસ વિતરણની પ્રક્રિયા શરૂ થશે.
#WATCH | Gujarat: Latest visuals from Vadinar Port. LPG tanker Nanda Devi, which crossed the Hormuz Strait, will arrive here later today. pic.twitter.com/WFWmSuy2yx
— ANI (@ANI) March 17, 2026
આ પહેલા, 46 હજાર મેટ્રિક ટન LPG લઈને આવેલું ‘શિવાલિક’ જહાજ 16 માર્ચે મુન્દ્રા પોર્ટ પર સુરક્ષિત રીતે પહોંચી ગયું હતું. આ બંને જહાજો વ્યૂહાત્મક રીતે અત્યંત મહત્વપૂર્ણ ‘સ્ટ્રેટ ઑફ હોર્મુઝ’માંથી પસાર થઈને ગુજરાતના દરિયાકાંઠે પહોંચ્યા છે, જેનાથી દેશના ગેસ પુરવઠાને લઈ ઉભી થયેલી ચિંતા હવે ઓછી થતી જોવા મળી રહી છે.
‘સ્ટ્રેટ ઑફ હોર્મુઝ’ વિશ્વનો સૌથી મહત્વપૂર્ણ ઊર્જા કોરિડોર માનવામાં આવે છે, જ્યાંથી વિશ્વના આશરે 20 ટકા તેલ અને ગેસનો વેપાર થાય છે. તાજેતરમાં અમેરિકા અને ઇઝરાયલ દ્વારા ઈરાન પર કરવામાં આવેલા હુમલાઓ અને તેના જવાબમાં ઈરાન દ્વારા આપવામાં આવેલી ચેતવણીઓને કારણે આ માર્ગમાં જહાજોની અવરજવર જોખમમાં આવી ગઈ હતી. જેના કારણે વૈશ્વિક સ્તરે ટેન્કર ટ્રાફિકમાં ઘટાડો નોંધાયો હતો.
આ તણાવપૂર્ણ પરિસ્થિતિ છતાં ઈરાનના સત્તાવાળાઓએ ભારતીય ધ્વજ ધરાવતા બે મોટા ગેસ કેરિયર્સ ‘શિવાલિક’ અને ‘નંદા દેવી’ને પસાર થવાની વિશેષ મંજૂરી આપી હતી. આ બંને જહાજો મળી કુલ 92,700 મેટ્રિક ટન LPG ભારત લાવી રહ્યા છે. જેમાંથી ‘શિવાલિક’ પહેલેથી જ મુન્દ્રા પોર્ટ પર પહોંચી ગયું છે અને હવે ‘નંદા દેવી’ના આગમનથી ગેસ સપ્લાય ચેઇનમાં વધુ મજબૂતી આવવાની સંભાવના છે.
આ વિકાસને કારણે ઘરેલુ તેમજ ઔદ્યોગિક ગેસની માંગ પૂરી કરવામાં રાહત મળશે અને બજારમાં સ્થિરતા આવવાની આશા વ્યક્ત કરવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
