દેશભરમાં ચર્ચામાં રહેલા NEET પેપર લીક મુદ્દે કોંગ્રેસ દ્વારા દિલ્હીમાં વડાપ્રધાન નરેન્દ્ર મોદીના નિવાસસ્થાન બહાર કરાયેલા વિરોધના જવાબમાં ગુજરાત ભાજપે અમદાવાદમાં આક્રમક પરંતુ સંગઠિત રીતે પોતાનો વિરોધ નોંધાવ્યો હતો. ગુજરાત પ્રદેશ ભારતીય જનતા પાર્ટી દ્વારા કોંગ્રેસના પ્રદેશ કાર્યાલય ‘રાજીવ ગાંધી ભવન’ બહાર ધરણાં અને વિરોધ પ્રદર્શન યોજીને કોંગ્રેસની રાજનીતિ સામે સવાલો ઉઠાવવામાં આવ્યા હતા.
પ્લે કાર્ડ સાથે કોંગ્રેસ સામે સૂત્રોચ્ચાર
આ વિરોધ પ્રદર્શનમાં ભાજપના પ્રદેશ પ્રમુખ, પ્રદેશ પદાધિકારીઓ, વરિષ્ઠ નેતાઓ અને મોટી સંખ્યામાં કાર્યકરો જોડાયા હતા. ભાજપના કાર્યકરો હાથમાં પ્લે કાર્ડ્સ લઈને કોંગ્રેસ કાર્યાલય બહાર પહોંચ્યા અને કોંગ્રેસ તથા રાહુલ ગાંધી વિરુદ્ધ સૂત્રોચ્ચાર કર્યા હતા.
ભાજપના નેતાઓએ આરોપ લગાવ્યો હતો કે કોંગ્રેસ NEET જેવા સંવેદનશીલ મુદ્દાનો રાજકીય લાભ મેળવવાનો પ્રયાસ કરી રહી છે. કાર્યકરોએ રોડ પર બેસીને શાંતિપૂર્ણ ધરણાં યોજ્યાં અને વિદ્યાર્થીઓના ભવિષ્ય સાથે રાજકારણ ન કરવાની કોંગ્રેસને અપીલ કરી હતી.
કોંગ્રેસના જવાબી સૂત્રોચ્ચારથી માહોલ ગરમાયો
ભાજપના વિરોધને પગલે કોંગ્રેસના નેતાઓ અને કાર્યકરો પણ કાર્યાલયના પગથિયાં પર એકત્ર થયા હતા. કોંગ્રેસના કાર્યકરો દ્વારા વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહ વિરુદ્ધ સૂત્રોચ્ચાર કરવામાં આવ્યા હતા.
બંને પક્ષ તરફથી સામસામે નારાબાજી થતાં થોડા સમય માટે વાતાવરણ તંગ બન્યું હતું. જોકે, ભાજપના નેતાઓએ કાર્યકરોને શિસ્ત જાળવવા અને પોલીસને સહકાર આપવા સૂચના આપી હતી.
ચુસ્ત પોલીસ બંદોબસ્ત વચ્ચે શાંતિપૂર્ણ વિરોધ
કાયદો અને વ્યવસ્થા જળવાઈ રહે તે માટે પોલીસ દ્વારા સમગ્ર વિસ્તારમાં ચુસ્ત સુરક્ષા વ્યવસ્થા કરવામાં આવી હતી. ઝોન-7 સહિત વિવિધ પોલીસ સ્ટેશનોની ટીમો સાથે JCP, DCP, ACP, PI અને PSI કક્ષાના અધિકારીઓ ઘટનાસ્થળે હાજર રહ્યા હતા.
કોંગ્રેસ કાર્યાલય તરફ જતા મુખ્ય રસ્તાઓ પર ડબલ લેયર બેરિકેડિંગ કરવામાં આવ્યું હતું. ભાજપ અને કોંગ્રેસના કાર્યકરો વચ્ચે સીધો સંપર્ક ન થાય તે માટે પોલીસે બંને પક્ષને અલગ રાખ્યા હતા. સમગ્ર વિસ્તાર પર ડ્રોન કેમેરાની મદદથી નજર રાખવામાં આવી હતી.
કોંગ્રેસની રાજનીતિ સામે ભાજપનો સવાલ
ભાજપના નેતાઓએ જણાવ્યું હતું કે વિદ્યાર્થીઓ અને સ્પર્ધાત્મક પરીક્ષાઓ સાથે જોડાયેલા મુદ્દાઓ પર જવાબદાર ચર્ચા થવી જોઈએ, પરંતુ કોંગ્રેસ આવા મુદ્દાઓને રાજકીય નાટકમાં ફેરવી રહી છે. ભાજપે દાવો કર્યો કે કેન્દ્ર સરકાર પરીક્ષા વ્યવસ્થામાં પારદર્શિતા લાવવા અને વિદ્યાર્થીઓના હિતોની રક્ષા માટે જરૂરી પગલાં લઈ રહી છે.
અમદાવાદમાં યોજાયેલા આ વિરોધ પ્રદર્શન દ્વારા ભાજપે કોંગ્રેસ સામે સંગઠિત શક્તિપ્રદર્શન કર્યું હતું. ચુસ્ત પોલીસ બંદોબસ્ત વચ્ચે કાર્યક્રમ પૂર્ણ થયો હતો અને સ્થિતિ નિયંત્રણ હેઠળ રહી હતી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
