આદિપુર ખાતે આજે વહેલી સવારથી જ તંત્ર દ્વારા ગેરકાયદે દબાણો સામે કડક કાર્યવાહી હાથ ધરવામાં આવી છે. શહેરના વ્યસ્ત આદિપુર GIDC વિસ્તારમાં લાંબા સમયથી ઉભા થયેલા ગેરકાયદે કેબિનો, કાચા-પાકા બાંધકામો અને રસ્તા પરના ઓટલાઓને દૂર કરવા માટે મનપા દ્વારા મેગા દબાણ હટાવો ઝુંબેશ શરૂ કરવામાં આવી. સવારે જ ભારે મશીનરી અને બુલડોઝરો સાથે ટીમ પહોંચી હતી અને લગભગ 100 થી 120 જેટલા ગેરકાયદે દબાણોને તોડી પાડવામાં આવ્યા હતા. આ કાર્યવાહી દરમિયાન વર્ષોથી કબજો જમાવી બેઠેલા દબાણકર્તાઓમાં ભારે દોડધામ જોવા મળી હતી અને કેટલાક લોકો પોતાના સામાનને બચાવવા માટે ઉતાવળમાં સ્થળ પરથી હટાવતા જોવા મળ્યા હતા.
આ સમગ્ર ઓપરેશન માટે તંત્રએ બહુવિધ વિભાગોનો સંકલન કર્યો હતો. મનપાની ટીમ સાથે PGVCL ના અધિકારીઓ પણ જોડાયા હતા, જેમણે ગેરકાયદે વીજ જોડાણો કાપવાની કાર્યવાહી હાથ ધરી હતી. ઉપરાંત આરોગ્ય વિભાગની ટીમે આસપાસના વિસ્તારોમાં સ્વચ્છતા અને આરોગ્ય સંબંધિત મુદ્દાઓની પણ તપાસ કરી હતી. કોઈપણ પ્રકારની અપ્રિય ઘટના ન બને અને કાયદો-વ્યવસ્થા જળવાઈ રહે તે માટે મોટા પ્રમાણમાં પોલીસ કાફલો તૈનાત કરવામાં આવ્યો હતો, જેના કારણે સમગ્ર વિસ્તાર થોડા સમય માટે પોલીસ છાવણીમાં ફેરવાઈ ગયો હતો.
ઉલ્લેખનીય છે કે, ગઈકાલે દબાણ હટાવવાની નોટિસ મળતા સ્થાનિક વેપારીઓ અને રહેવાસીઓએ ભારે વિરોધ નોંધાવ્યો હતો અને મોટી સંખ્યામાં લોકો ભેગા થઈ મનપા કચેરીનો ઘેરાવ કર્યો હતો. છતાં તંત્રએ કડક વલણ અપનાવતા આજે વહેલી સવારે જ બુલડોઝર એક્શન શરૂ કર્યું હતું. અધિકારીઓનું કહેવું છે કે રસ્તા પરના ગેરકાયદે બાંધકામો અને કબજાઓને કારણે ટ્રાફિક, સફાઈ અને જાહેર સુવિધાઓમાં મોટી મુશ્કેલીઓ ઉભી થતી હતી, તેથી આ કાર્યવાહી જરૂરી બની હતી. તંત્રએ સ્પષ્ટ કર્યું છે કે આવનારા દિવસોમાં પણ શહેરના અન્ય વિસ્તારોમાં ગેરકાયદે દબાણો સામે આવી જ કાર્યવાહી ચાલુ રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
