આજે ઇન્ટરનેશનલ ક્રિકેટ કાઉન્સિલ (ICC) એ નવું રેન્કિંગ જાહેર કર્યું છે. જેમાં ભારતીય ઝડપી બોલર જસપ્રીત બુમરાહે નવા વર્ષના પહેલા દિવસે જ ઈતિહાસ રચી દીધો છે. બુમરાહ હવે ICC ટેસ્ટ બોલિંગ રેન્કિંગમાં ટોચના સ્થાન પર પહોંચી ગયો છે. આ સિવાય તેના રેટિંગ પોઈન્ટ પણ વધીને 907 થઈ ગયા છે. આ પોતાનામાં એક ઐતિહાસિક રેકોર્ડ છે. બુમરાહ આટલા રેટિંગ પોઈન્ટ મેળવનાર પહેલો ભારતીય બોલર બની ગયો છે.
India star smashes rankings record after Boxing Day Test exploits 💪https://t.co/EzHceJFkxZ
— ICC (@ICC) January 1, 2025
પૂર્વ સ્પીનર રવિચંદ્રન અશ્વિનનો રેકોર્ડ તોડી નાખ્યો છે. આ પહેલા અશ્વિને ડિસેમ્બર 2016માં સૌથી વધુ 904 રેટિંગ પોઈન્ટ હાંસલ કર્યા હતા. બુમરાહે ઓસ્ટ્રેલિયા સામેની ટેસ્ટ સીરિઝમાં શાનદાર પ્રદર્શન કરતા તેને હવે ICC રેન્કિંગમાં ફાયદો થયો છે. આ સિવાય 907 રેટિંગ પોઈન્ટ સાથે બુમરાહ ઓલ ટાઈમ લિસ્ટમાં ઈંગ્લેન્ડના સ્પીનર ડેરેક અંડરવુડ સાથે સંયુક્ત 17માં સ્થાને પહોંચી ગયો છે. આ યાદીમાં ઈંગ્લેન્ડના ઝડપી બોલર સિડની બાર્ન્સ (932) અને જ્યોર્જ લોહમેન (931) ટોચ પર છે. જ્યારે ઈમરાન ખાન (922) અને મુથૈયા મુરલીધરન (920) ત્રીજા અને ચોથા સ્થાને છે.
ઓસ્ટ્રેલીયા સામે બુમરાહનું શાનદાર પ્રદર્શન
બુમરાહ અત્યાર સુધી સીરિઝમાં સૌથી વધુ વિકેટ લેનાર બોલર છે. તેણે 4 ટેસ્ટ મેચની 8 ઇનિંગ્સમાં સૌથી વધુ 30 વિકેટ ઝડપી હતી. જેમાં તેની સરેરાશ 12.83 રહી હતી. તેના પછી પેટ કમિન્સ બીજા સ્થાને છે જેણે 20 વિકેટ લીધી હતી. બુમરાહને આ પ્રદર્શનનો મજબૂત ફાયદો મળ્યો છે. બુમરાહે સીરિઝની ત્રીજી ગાબા ટેસ્ટમાં પણ શાનદાર પ્રદર્શન કર્યું હતું. તેણે પહેલી ઇનિંગમાં 76 રન આપીને 6 વિકેટ અને બીજી ઇનિંગમાં 18 રનમાં 3 વિકેટ લીધી હતી. બુમરાહે સીરિઝની પહેલી ટેસ્ટમાં 8 અને બીજી ટેસ્ટમાં 4 વિકેટ ઝડપી હતી.
અહીં તમને જણાવી દઈએ કે હાલ ભારતીય ટીમ ઓસ્ટ્રેલિયાના પ્રવાસ પર છે. જ્યાં બોર્ડર-ગાવસ્કર ટ્રોફી હેઠળ બંને ટીમો વચ્ચે 5 મેચની ટેસ્ટ સીરિઝ રમાઈ રહી છે. જેમાંથી ચોથી મેચ મેલબર્નમાં રમાઈ હતી. આ ચોથી મેચમાં ઓસ્ટ્રેલિયાનો 184 રને વિજય થયો હતો. હાલ ઓસ્ટ્રેલિયન ટીમ સીરિઝમાં 2-1થી આગળ છે. હવે છેલ્લી ટેસ્ટ 3 જાન્યુઆરીથી સિડનીમાં રમાશે.
