ઈન્ડિયન પ્રીમિયર લીગ 2023 પહેલા સતત એવી અટકળો હતી કે ચેન્નાઈ સુપર કિંગ્સના કેપ્ટન એમએસ ધોનીની આ છેલ્લી સિઝન છે. ધોનીએ વર્ષ 2020માં જ આંતરરાષ્ટ્રીય ક્રિકેટને અલવિદા કહી દીધું છે. આવી સ્થિતિમાં, 41 વર્ષીય ધોની સાથે સંબંધિત કોઈપણ તસવીર અથવા વીડિયો સોશિયલ મીડિયા પર વાયરલ થતાં જ આશંકા વ્યક્ત કરવામાં આવે છે કે તે સંન્યાસ લઈ શકે છે. ચેન્નાઈ સુપર કિંગ્સની ટીમે હાલમાં જ ધોનીનો એક વીડિયો શેર કર્યો છે, જેને જોઈને ફેન્સના દિલની ધડકન વધી ગઈ છે.
ચેન્નાઈ સુપર કિંગ્સે પોતાના સોશિયલ મીડિયા એકાઉન્ટ પર એમએસ ધોનીનો એક ઈમોશનલ વીડિયો શેર કર્યો છે, જેના પછી ફેન્સના શ્વાસ અટકી ગયા છે. આ વીડિયોમાં માહી સીડીઓ ચડતો જોવા મળી રહ્યો છે. વીડિયોમાં ધોની બેટિંગ અને વિકેટકીપિંગ પણ કરતો જોવા મળી રહ્યો છે. ચેન્નાઈ સુપર કિંગ્સે કેપ્શનમાં લખ્યું, ‘ઓહ કેપ્ટન, માય કેપ્ટન.’ આ વીડિયોમાં એક સેડ સોંગ વાગી રહ્યું છે, જેના પછી ફેન્સના મનમાં સવાલો ઉઠવા લાગ્યા છે કે શું એમએસ ધોની IPLમાંથી નિવૃત્તિ લઈ રહ્યો છે? જોકે, હજુ સુધી આ મુદ્દે ધોની કે CSKની ટીમ તરફથી કોઈ નિવેદન આવ્યું નથી.
Oh Captain, My Captain! 🥹#WhistlePodu #Yellove 🦁💛 @msdhoni pic.twitter.com/whJeUjWUVd
— Chennai Super Kings (@ChennaiIPL) June 13, 2023
ચેન્નાઈ સુપર કિંગ્સને પાંચમું ટાઇટલ અપાવ્યા બાદ IPLમાંથી નિવૃત્તિ લેવાની અટકળોને નકારી કાઢતાં મહેન્દ્ર સિંહ ધોનીએ કહ્યું હતું કે તે ફેન્સના પ્રેમનું ઋણ ચૂકવવા માટે તે આગામી સિઝનમાં ફરી રમશે. જે રીતે પ્રેક્ષકોએ દરેક મેદાન પર તેના પર પ્રેમનો વરસાદ વરસાવ્યો હતો, તેનાથી નિવૃત્તિની શક્યતા પ્રબળ બની રહી હોય તેવું લાગી રહ્યું હતું. તેણે કહ્યું હતું કે, ‘જો આપણે સંજોગો પર નજર કરીએ તો મારા માટે નિવૃત્તિ લેવાનો આ શ્રેષ્ઠ સમય છે. મારા માટે તે કહેવું ખૂબ જ સરળ છે કે હું હવે જતો રહ્યો છું પરંતુ આગામી નવ મહિના સુધી સખત મહેનત કરીને વધુ એક સિઝન રમીને પરત ફરવું મુશ્કેલ છે. શરીરને ટેકો આપવો પડે છે.
મહેન્દ્ર સિંહ ધોનીની આગેવાની હેઠળની ચેન્નાઈ સુપર કિંગ્સે IPL 2023ની ફાઈનલ મેચમાં ગુજરાત ટાઇટન્સને 5 વિકેટે હરાવીને પાંચમી વખત IPL ટ્રોફી પર કબજો કર્યો હતો. આઈપીએલના ઈતિહાસમાં ચેન્નાઈ સુપર કિંગ્સનો સ્ટાર મહેન્દ્ર સિંહ ધોની 5 આઈપીએલ ટાઈટલ જીતનાર બીજો કેપ્ટન છે. ચેન્નાઈ સુપર કિંગ્સે વર્ષ 2010, 2011, 2018, 2021 અને 2023 માટે IPL ટાઇટલ જીત્યા છે.
