પ્રધાનમંત્રી નરેન્દ્ર મોદીના નેતૃત્વમાં દેશમાં શરૂ થયેલી સ્ટાર્ટઅપ ક્રાંતિમાં ગુજરાતે આગવું સ્થાન મેળવ્યું છે. ઇનોવેશન, ટેક્નોલોજી અને ઉદ્યોગસાહસિકતાના ક્ષેત્રમાં ગુજરાત આજે દેશના સૌથી સશક્ત સ્ટાર્ટઅપ ઇકોસિસ્ટમ ધરાવતા રાજ્યોમાં સામેલ છે.
તાજેતરના આંકડા મુજબ ગુજરાતમાં 19,000થી વધુ DPIIT (Department for Promotion of Industry and Internal Trade) માન્ય સ્ટાર્ટઅપ્સ કાર્યરત છે. આ સિદ્ધિ ગુજરાતને દેશના અગ્રણી સ્ટાર્ટઅપ હબ તરીકે સ્થાપિત કરે છે અને રાજ્યની ઉદ્યોગલક્ષી નીતિઓની સફળતાનું પ્રતિબિંબ પણ છે.
સતત પાંચ વર્ષથી ‘બેસ્ટ પર્ફોર્મર’ રાજ્ય
કેન્દ્ર સરકારના ‘સ્ટાર્ટઅપ ઇન્ડિયા’ રેન્કિંગમાં ગુજરાત સતત પાંચ વર્ષથી ‘બેસ્ટ પર્ફોર્મર’ રાજ્ય તરીકે સ્થાન જાળવી રાખવામાં સફળ રહ્યું છે.
આ સિદ્ધિ પાછળ રાજ્ય સરકારની પ્રોત્સાહક નીતિઓ, મજબૂત ઇન્ક્યુબેશન નેટવર્ક અને યુવાનોમાં ઉદ્યોગસાહસિકતા વિકસાવવા માટે કરવામાં આવેલા પ્રયાસો મુખ્ય કારણ માનવામાં આવે છે.
SSIP હેઠળ હજારો વિદ્યાર્થીઓને મળ્યો લાભ
ગુજરાત સરકારની ‘સ્ટુડન્ટ સ્ટાર્ટઅપ એન્ડ ઇનોવેશન પોલિસી’ (SSIP 1.0 અને SSIP 2.0) રાજ્યના યુવાનો માટે ગેમચેન્જર સાબિત થઈ છે.
આ યોજના હેઠળ અત્યાર સુધીમાં 13,047થી વધુ વિદ્યાર્થી પ્રોજેક્ટ્સને આર્થિક સહાય આપવામાં આવી છે. ઉપરાંત 4,043થી વધુ ઇન્ટેલેકચ્યુઅલ પ્રોપર્ટી રાઇટ્સ (IPR) ફાઇલ કરવામાં આવ્યા છે.
રાજ્યભરમાં આયોજિત જાગૃતિ અભિયાન અને તાલીમ કાર્યક્રમો દ્વારા 22.72 લાખથી વધુ વિદ્યાર્થીઓને સ્ટાર્ટઅપ અને ઇનોવેશન અંગે માર્ગદર્શન આપવામાં આવ્યું છે.
i-Hub બન્યું સ્ટાર્ટઅપ્સનું મજબૂત કેન્દ્ર
Gujarat Startup and Innovation Hub (i-Hub) ગુજરાતના સ્ટાર્ટઅપ ઇકોસિસ્ટમનું મહત્વપૂર્ણ કેન્દ્ર બની ગયું છે.
i-Hub દ્વારા અત્યાર સુધીમાં 750થી વધુ સ્ટાર્ટઅપ્સને માર્ગદર્શન, મેન્ટરશિપ અને વ્યવસાયિક સહાય પૂરી પાડવામાં આવી છે. અહીંથી ઇન્ક્યુબેટ થયેલા સ્ટાર્ટઅપ્સે 4,000થી વધુ રોજગારીનું સર્જન કર્યું છે.
આ સ્ટાર્ટઅપ્સની સંયુક્ત માર્કેટ વેલ્યૂ અંદાજે ₹3,569 કરોડ સુધી પહોંચી છે. ઉપરાંત તેઓએ ₹446 કરોડથી વધુનું ખાનગી રોકાણ પણ આકર્ષ્યું છે.
મહિલા ઉદ્યોગસાહસિકોને વિશેષ પ્રોત્સાહન
ગુજરાતમાં મહિલા ઉદ્યોગસાહસિકોને પણ વિશેષ પ્રોત્સાહન આપવામાં આવી રહ્યું છે.
‘WEstart’ અને ‘herSTART’ જેવી પહેલો દ્વારા મહિલાઓને પોતાનો વ્યવસાય શરૂ કરવા માટે જરૂરી માર્ગદર્શન, ફંડિંગ અને સહાય ઉપલબ્ધ કરાવવામાં આવી રહી છે.
‘WEstart’ કાર્યક્રમ હેઠળ અત્યાર સુધીમાં 269 મહિલા સંચાલિત સ્ટાર્ટઅપ્સને સહાય આપવામાં આવી છે. જેના કારણે રાજ્યના સ્ટાર્ટઅપ ક્ષેત્રમાં મહિલાઓની ભાગીદારી સતત વધી રહી છે.
યુવાનોને ‘જોબ સીકર’થી ‘જોબ ક્રિએટર’ બનાવવાનો સંકલ્પ
ભૂપેન્દ્ર પટેલના માર્ગદર્શન હેઠળ ગુજરાત સરકાર યુવાનોને માત્ર નોકરી શોધનાર નહીં પરંતુ રોજગારી સર્જનાર ઉદ્યોગસાહસિક બનાવવા માટે કાર્યરત છે.
સ્ટાર્ટઅપ, ઇનોવેશન અને ટેક્નોલોજી આધારિત વિકાસ મોડલ દ્વારા રાજ્યમાં નવી તકો ઉભી થઈ રહી છે. સરકારનો ઉદ્દેશ યુવાનોને આત્મનિર્ભર બનાવવાનો અને ગુજરાતને વૈશ્વિક ઇનોવેશન ડેસ્ટિનેશન તરીકે વિકસાવવાનો છે.
ગુજરાતની આ સફળતા દર્શાવે છે કે યોગ્ય નીતિઓ, મજબૂત ઇકોસિસ્ટમ અને યુવાનોની પ્રતિભાના સમન્વયથી રાજ્ય સ્ટાર્ટઅપ ક્ષેત્રમાં નવી ઊંચાઈઓ સર કરી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
