પંજાબ હાલમાં ગંભીર પૂરની પરિસ્થિતિમાંથી પસાર થઈ રહ્યો છે. હિમાચલ પ્રદેશ, જમ્મુ-કાશ્મીર અને પંજાબના ઉપરવાસના વિસ્તારોમાં થયેલા તીવ્ર વરસાદના કારણે સતલુજ, બિયાસ અને રાવી નદીઓમાં પાણી ભયજનક સ્તરે પહોંચી ગયું છે. તેના પરિણામે પંજાબના 12 જિલ્લાઓમાં 1,312થી વધુ ગામડાં પૂરના પાણીમાં ગરકાવ થઈ ગયા છે. આ આપત્તિમાં અત્યાર સુધી 39 લોકોના મોત થયા છે અને અંદાજે 2.56 લાખથી વધુ લોકો સીધા અસરગ્રસ્ત થયા છે. પઠાણકોટ જિલ્લામાં સૌથી વધારે 6 લોકોના મૃત્યુ થયા છે, જ્યારે અમૃતસર, બરનાલા, હોશિયારપુર, લુધિયાણા, માનસા અને રૂપનગર જેવા જિલ્લાઓમાં ત્રણ-ત્રણ લોકોના મોત નોંધાયા છે. ગુરદાસપુર, કપૂરથલા, તરનતારન, ફિરોઝપુર અને ફાઝિલ્કા જેવા વિસ્તારોમાં પણ ભારે જાનમાલહાનિ થઈ છે.
આ પૂરે પંજાબના કૃષિ ક્ષેત્રને પણ ભારે ઝાટકો આપ્યો છે. રાજ્યના લગભગ 50,000 એકરમાં ઊભેલા ધાન, શેરડી અને અન્ય પાકો પૂરના કારણે નષ્ટ થઈ ગયા છે. ખેડૂતો માટે આ એક મોટું આર્થિક નુકસાન છે, કારણ કે પાકની સાથે જ તેમની રોજીરોટી અને આવકનો મુખ્ય સ્ત્રોત પાણીમાં વહેતો ગયો છે. રસ્તાઓ, ઘરો અને વિજળીના ઈન્ફ્રાસ્ટ્રક્ચર પર પણ ગંભીર અસર થઈ છે.
રાહત અને બચાવ કામગીરી માટે NDRF, SDRF, ભારતીય સેના, BSF અને રાજ્ય પોલીસ સંયુક્ત રીતે મેદાનમાં ઉતરી છે. અત્યાર સુધીમાં 15,688 લોકોને સુરક્ષિત સ્થળોએ ખસેડવામાં આવ્યા છે, જ્યાં તેમને ખોરાક, પીવાનું પાણી અને તબીબી સુવિધાઓ ઉપલબ્ધ કરાવવામાં આવી રહી છે. ખાસ કરીને બાળકો, વૃદ્ધો અને મહિલાઓને સુરક્ષિત સ્થાનો પર પ્રાથમિકતા આપી રહી છે.
સરકાર પણ પરિસ્થિતિ પર સતત નજર રાખી રહી છે. વડા પ્રધાન નરેન્દ્ર મોદીએ 1 સપ્ટેમ્બર, 2025ના રોજ ચીનની SCO સમિટમાંથી પરત ફર્યા બાદ તાત્કાલિક પંજાબના મુખ્યમંત્રી ભગવંત માન સાથે ટેલિફોન પર વાતચીત કરી અને પૂરની સ્થિતિ અંગે વિસ્તૃત સમીક્ષા કરી હતી. તેમણે પંજાબને કેન્દ્ર તરફથી તમામ પ્રકારની મદદ અને સહાય આપવાની ખાતરી આપી છે. સાથે જ ગૃહમંત્રી અમિત શાહે પણ સીએમ માન સાથે સંપર્ક કર્યો હતો અને તાત્કાલિક નાણાકીય સહાય પૂરી પાડવાની ખાતરી આપી છે.
આવી સ્થિતિમાં પંજાબ માત્ર કુદરતી આફત સામે જ નહીં, પરંતુ તેના પરિણામે ઉભા થનારા આર્થિક અને સામાજિક સંકટ સામે પણ ઝઝૂમી રહ્યો છે. રાજ્ય સરકાર અને કેન્દ્ર સરકાર બંને મળીને રાહત અને પુનર્વસન કાર્ય ઝડપથી આગળ વધારશે, જેથી અસરગ્રસ્ત લોકો ફરીથી સ્વસ્થ અને સુરક્ષિત જીવન જીવી શકે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
