ગુજરાતમાં સ્થાનિક સ્વરાજ્યની ચૂંટણીને લઈને રાજકીય ચિત્ર હવે સ્પષ્ટ બન્યું છે. ઉમેદવારી ફોર્મ પરત ખેંચવાની અંતિમ તારીખ 15 એપ્રિલ પૂર્ણ થતાં રાજ્યભરમાં મોટા પ્રમાણમાં ઉમેદવારોએ પોતાની દાવેદારી પાછી ખેંચી લીધી હતી. જેના કારણે અનેક બેઠકો પર બિનહરીફ ઉમેદવારોની સંખ્યા નોંધપાત્ર રીતે વધી ગઈ છે.
700થી વધુ બેઠકો પર ભાજપ બિનહરીફ
મળતી માહિતી મુજબ, શરૂઆતમાં જ 300થી વધુ બેઠકો પર ભાજપના ઉમેદવારો સામે કોઈ ઉમેદવાર ઊભા રહ્યા નહોતા. ત્યારબાદ ફોર્મ પરત ખેંચવાની પ્રક્રિયા દરમિયાન કોંગ્રેસ અને આમ આદમી પાર્ટીના ઉમેદવારોના પીછેહઠ કરતાં આ આંકડો 700 પાર પહોંચી ગયો છે.
આ રીતે ભાજપના 700થી વધુ ઉમેદવારો બિનહરીફ રીતે વિજેતા બની ગયા છે.
કુલ બેઠકો અને અંતિમ આંકડા
ચૂંટણી પંચ દ્વારા રાજ્યની મહાનગરપાલિકા, નગરપાલિકા, જિલ્લા પંચાયત અને તાલુકા પંચાયતની કુલ 9,992 બેઠકો પર ચૂંટણી જાહેર કરવામાં આવી હતી.
ફોર્મ ચકાસણી અને પરત ખેંચવાની પ્રક્રિયા પૂર્ણ થયા બાદ:
- 724 બેઠકો પર ઉમેદવારો બિનહરીફ
- 9,270 બેઠકો પર મતદાન યોજાશે
આ 724 બેઠકોમાં મોટા ભાગના ઉમેદવારો ભાજપના હોવાનું માનવામાં આવે છે.
ક્યાં-કેટલી બેઠકો પર બિનહરીફ જીત?
વિગત મુજબ વિવિધ સ્તરે બિનહરીફ બેઠકોનું વિતરણ:
- મહાનગરપાલિકા: 1044માંથી 43 બેઠકો
- નગરપાલિકા: 2626માંથી 377 બેઠકો
- જિલ્લા પંચાયત: 1090માંથી 52 બેઠકો
- તાલુકા પંચાયત: 5234માંથી 252 બેઠકો
કેટલાક વિસ્તારોમાં ભાજપનો પહેલેથી જ દબદબો
કડી નગરપાલિકામાં ભાજપે મતદાન પહેલાં જ બે તૃતીયાંશ બહુમતી મેળવી લીધી છે. ઉપરાંત બાયડ અને ગણદેવી જેવી નગરપાલિકાઓમાં પણ બિનહરીફ બેઠકોના કારણે પાર્ટી સત્તાની નજીક પહોંચી ગઈ છે.
કુલ 260 તાલુકા પંચાયતોમાંથી 6 તાલુકા પંચાયતોમાં ભાજપ પાસે મતદાન પહેલાં જ બહુમતી છે.
મહાનગરપાલિકાઓમાં સ્થિતિ
મહાનગરપાલિકાઓમાં પણ ભાજપનો દબદબો જોવા મળ્યો છે:
- પોરબંદર: 11 ઉમેદવાર બિનહરીફ
- આણંદ: 12 ઉમેદવાર બિનહરીફ
- મહેસાણા: 5 ઉમેદવાર બિનહરીફ
- અમદાવાદ અને વડોદરા: 2-2 ઉમેદવાર બિનહરીફ
હવે 26 એપ્રિલે મતદાન
બાકીની બેઠકો પર 26 એપ્રિલના રોજ મતદાન યોજાશે, જ્યારે 28 એપ્રિલે પરિણામો જાહેર કરવામાં આવશે. આ ચૂંટણી રાજ્યના રાજકીય સમીકરણો માટે મહત્વપૂર્ણ માનવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
