અમદાવાદ જિલ્લાના સાણંદ તાલુકામાં ફાયર સેફ્ટીના નિયમો અને પરવાના વગર ચાલી રહેલા ફટાકડાના ગોડાઉન સામે પોલીસે મોટી કાર્યવાહી હાથ ધરી છે. મોડાસર ગામ ચાર રસ્તાથી અમથાપુરા તરફ જતા માર્ગ પર આવેલી ‘અંબિકા ટ્રેડ લિન્ક’ નામની ફટાકડા ફેક્ટરીના બે ગોડાઉનમાં દરોડો પાડી પોલીસે અંદાજે 39.57 કરોડ રૂપિયાથી વધુ કિંમતનો ફટાકડાનો જથ્થો જપ્ત કર્યો છે.
મળતી માહિતી અનુસાર, અંબિકા ટ્રેડ લિન્કના સંચાલકો દ્વારા ફટાકડાના વેચાણ અને સંગ્રહ માટેનો પરવાનો સમયસર રિન્યૂ કરાવવામાં આવ્યો નહોતો. આ ઉપરાંત ગોડાઉન માટે જરૂરી ફાયર વિભાગની એન.ઓ.સી. પણ મેળવવામાં આવી ન હોવાનું તપાસમાં સામે આવ્યું છે.
પોલીસ તપાસ દરમિયાન જાણવા મળ્યું કે ગોડાઉનમાં મોટી માત્રામાં ફટાકડાનો જથ્થો સંગ્રહિત કરવામાં આવ્યો હતો, પરંતુ આગ જેવી દુર્ઘટના સમયે ઉપયોગી બને તેવા પૂરતા ફાયર સેફ્ટી સાધનો ઉપલબ્ધ નહોતા. રહેણાંક અને અવરજવરવાળા વિસ્તાર નજીક આટલી મોટી માત્રામાં જ્વલનશીલ સામગ્રીનો સંગ્રહ કરવામાં આવતાં માનવ જિંદગીને ગંભીર જોખમ ઊભું થયું હોવાનું પોલીસે નોંધ્યું છે.
પરવાના અને ફાયર સેફ્ટીની શરતોનું ઉલ્લંઘન
બંને ગોડાઉનના ફટાકડા વેચાણ અને સંગ્રહના લાયસન્સની સમયમર્યાદા પૂર્ણ થઈ ગઈ હોવા છતાં સંચાલકો દ્વારા લાયસન્સ રિન્યૂ કરાવવામાં આવ્યું નહોતું. તેમ છતાં ગોડાઉનમાં કરોડો રૂપિયાનો ફટાકડાનો જથ્થો રાખવામાં આવ્યો હતો.
આ ઉપરાંત ફાયર NOC વગર ગોડાઉન ચાલુ રાખવું, પૂરતા અગ્નિશામક સાધનો ન રાખવા અને સુરક્ષાનાં જરૂરી ધોરણોનું પાલન ન કરવું જેવા ગંભીર નિયમભંગ પણ સામે આવ્યા છે. પોલીસે આ કૃત્યને ગોડાઉનના સંચાલકો સહિત આસપાસના લોકોની જિંદગી જોખમમાં મૂકનારું ગણાવ્યું છે.
₹39.57 કરોડનો ફટાકડાનો જથ્થો જપ્ત
પોલીસે દરોડા દરમિયાન ગોડાઉનમાંથી કુલ ₹39,57,90,000ની કિંમતનો વિવિધ પ્રકારના ફટાકડાનો મુદ્દામાલ જપ્ત કર્યો છે. કાર્યવાહી સમયે ઘટનાસ્થળેથી બે વ્યક્તિઓ હાજર મળી આવી હતી. પોલીસે તેમની પૂછપરછ હાથ ધરી ગોડાઉનના માલિકો, સંચાલકો અને પરવાનાં સંબંધિત દસ્તાવેજોની તપાસ શરૂ કરી છે.
આરોપીઓ સામે ગુનો નોંધાયો
પરવાના વગર ફટાકડાનો સંગ્રહ કરવા, ફાયર સેફ્ટીના નિયમોનું ઉલ્લંઘન કરવા, પરવાનાની શરતોનો ભંગ કરવા અને માનવ જિંદગીને જોખમમાં મૂકવા બદલ જવાબદાર વ્યક્તિઓ સામે પોલીસે ગુનો નોંધ્યો છે. પોલીસે સમગ્ર મામલે વધુ તપાસ હાથ ધરી છે અને આ ગોડાઉનમાં ફટાકડાનો જથ્થો ક્યાંથી લાવવામાં આવ્યો હતો તેમજ તેનું વેચાણ ક્યાં કરવામાં આવવાનું હતું તે દિશામાં પણ તપાસ શરૂ કરવામાં આવી છે.
આ કાર્યવાહી બાદ સાણંદ તાલુકામાં ફટાકડાના ગોડાઉન, ફેક્ટરી અને વેચાણ એકમોમાં ફાયર સેફ્ટી તથા લાયસન્સના નિયમોના પાલન અંગે ફરી સવાલો ઊભા થયા છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
