ગુજરાતમાં આતંકવાદી પ્રવૃત્તિઓ સામે મોટી સફળતા પ્રાપ્ત કરતાં ગુજરાત ATSએ એક મહત્વપૂર્ણ ઓપરેશન હાથ ધર્યું છે. આ ઓપરેશન દરમિયાન સિદ્ધપુર અને મુંબઈમાંથી બે કટ્ટરપંથી વિચારધારા ધરાવતા યુવકોની ધરપકડ કરવામાં આવી છે, જે દેશ વિરોધી કાવતરાં રચી રહ્યા હતા.
મળતી માહિતી મુજબ, સિદ્ધપુરમાં રહેતા 22 વર્ષીય ઈરફાન પઠાણ પર ATSની નજર હતી. તપાસમાં બહાર આવ્યું કે તે સોશિયલ મીડિયા પ્લેટફોર્મ દ્વારા સમાન વિચારધારા ધરાવતા લોકો સાથે જોડાઈને દેશમાં “ગઝવા એ હિન્દ” સ્થાપિત કરવાની યોજના બનાવી રહ્યો હતો. આરોપી બોમ્બ બનાવવાની તૈયારી સાથે ફંડ ભેગું કરવાની પ્રવૃત્તિઓમાં પણ સંકળાયેલો હતો.
ATS દ્વારા તપાસ દરમિયાન આરોપીના મોબાઈલ ફોનમાંથી વોટ્સએપ અને ઈન્સ્ટાગ્રામ પર થયેલી ચેટ્સ મળી આવી હતી, જેમાં ISIS જેવા આતંકી સંગઠનો સાથે સંપર્ક હોવાનો ખુલાસો થયો છે. આ ચેટ્સમાં દેશ વિરોધી પ્રવૃત્તિઓ, હુમલાની યોજના અને ધાર્મિક ઉશ્કેરણીજનક ભાષાનો ઉપયોગ થયેલો જોવા મળ્યો હતો.
તપાસમાં વધુમાં સામે આવ્યું કે આરોપી રાજકીય નેતાઓ અને કેટલાક સંગઠનો સાથે જોડાયેલા લોકોને નિશાન બનાવવાની યોજના બનાવી રહ્યો હતો. સાથે જ RDX સહિતના વિસ્ફોટકો બનાવવાની તાલીમ અને હથિયારોની સ્મગલિંગ માટે પાકિસ્તાન અને અફઘાનિસ્તાન સાથે સંપર્ક સ્થાપિત કરવાની પણ ચર્ચા થઈ હતી.
આ તપાસ દરમિયાન મુંબઈના 21 વર્ષીય મુર્શિદ શેખનું નામ પણ સામે આવ્યું હતું, જેને ATSએ મુંબઈમાંથી ઝડપી પાડ્યો હતો. બંને આરોપીઓના મોબાઈલમાંથી કટ્ટરપંથી સાહિત્ય અને દેશ વિરોધી પ્રવૃત્તિઓના પુરાવા મળ્યા છે.
હાલમાં ATS દ્વારા બંને આરોપીઓને 11 દિવસના રિમાન્ડ પર લઇને વધુ તપાસ હાથ ધરવામાં આવી રહી છે. આ કેસ દેશની સુરક્ષા માટે ગંભીર ચિંતાનો વિષય બની રહ્યો છે.
50થી વધુ ચેટ, 3 સ્ટેપની બ્રેઈનવૉશ પેટર્ન પારખીને 90 દિવસમાં નેટવર્ક તોડી પડાયું
ડિજિટલ ટ્રેકિંગથી મોટા નેટવર્કના પુરાવા મળ્યા
એટીએસને એક સામાન્ય ડિજિટલ ટ્રેકિંગ કવાયત દરમિયાન એક મોબાઈલ ફોનમાં ત્રણ સ્ટેપની પેટર્ન મળી. પહેલા સામાન્ય વાતચીત, પછી વૈચારિક કન્ટેન્ટ અને છેલ્લે ગુપ્ત પ્લાનિંગ. આ પેટર્નથી 2-3 મહિનાથી સતત એક્ટિવ બ્રેન વોશિંગના સંકેત મળ્યા.
સોશિયલ મીડિયા મોનિટરિંગ, એન્ક્રિપ્ટેડ ચેટ ટ્રેક
50થી વધુ વોટ્સએપ, ઇન્સ્ટાગ્રામ મેસેજ ટ્રેક કરાયા. એન્ક્રિપ્ટેડ ચેટ અને કેટલાક વિદેશી નંબરો મળી આવ્યા. પછી કોલ ડિટેલ, ચેટ હિસ્ટ્રી, મીડિયા ફાઇલનો ડેટા મેળવાયો.
કોલ, લોકેશન ટ્રેકિંગ, હ્યુમન ઇન્ટેલિજન્સની મદદ
કોલ રેકોર્ડ્સ અને લોકેશન ડેટાથી જાણવા મળ્યું કે કોણ કોને મળી રહ્યું હતું અને ક્યાં પ્રવૃત્તિઓ થઈ રહી હતી. ભીડવાળા સ્થળો અને હાઇ પ્રોફાઇલ લોકો ટાર્ગેટ હતા.
ફંડિગ છુપાવવા નાના ટ્રાન્ઝેક્શનનો સહારો
તપાસમાં પુરાવા મળ્યા કે 500થી 5000 રૂપિયા સુધીના નાના ટ્રાન્ઝેક્શનથી ફંડ એકત્ર કરાયું હતું. ફંડની સીધી શંકા ટાળવા માટે ડિજિટલ ચુકવણી અને રોકડ બંનેનો ઉપયોગ કરાયો હતો. એન્ક્રિપ્ટેડ એપ્લિકેશન્સ, નકલી આઇડી અને વીપીએનથી ઓળખ છુપાવાઈ હતી.
આખા નેટવર્કને મેપ કરવા માટે લાંબુ સર્વેલન્સ
ATSએ ઉતાવળ નહોતી કરી. ઘણા દિવસો-અઠવાડિયા સુધી સંદિગ્ધો પર નજર રાખી, જેથી આખું નેટવર્ક સમજાઇ શકે અને પછી થોડીક માહિતી જ નહીં, આખું ષડયંત્ર પકડાયું. કોણે શું ભૂમિકા ભજવી તે ઓળખવા માટે આખા નેટવર્કનો મેપ બનાવ્યો હતો.
ષડયંત્ર રચાય તે પહેલાં સાચા સમયે રેડ
જ્યારે પૂરતા પુરાવા મળી આવ્યા ત્યારે એટીએસે એકસાથે કાર્યવાહી કરી, જેથી કોઈ છટકી ન શકે. મોટી સફળતા એ હતી કે એટીએસે એ પડયંત્રને હુમલા પહેલાં જ અટકાવી દીધું. પ્લાન અમલમાં આવે તે પહેલાં જ નેટવર્કને ખોરવી નાખવામાં આવ્યું.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
