જીએસટી કાઉન્સિલે 3 સપ્ટેમ્બરની બેઠકમાં કરેલા નિર્ણયોને કારણે ભારતના ટેક્સ સ્ટ્રક્ચરમાં મોટો બદલાવ આવ્યો છે. કાઉન્સિલે હવે બે જ સ્લેબ – 5% અને 18% – અમલમાં મૂક્યા છે, જ્યારે હાલના 12% અને 28% ના સ્લેબને રદ કરવામાં આવ્યા છે. આ ફેરફારથી એક તરફ સામાન્ય વપરાશકર્તાઓને રાહત મળશે તો બીજી તરફ લક્ઝરી અને હાનિકારક ચીજવસ્તુઓ પર ભારે ટેક્સ લગાડીને સરકાર આવક વધારશે અને જાહેર આરોગ્યને પણ પ્રોત્સાહન આપશે. ખાસ કરીને તમાકૂ સંબંધિત વસ્તુઓ પર 40% સુધીનો જી.એસ.ટી. લગાડવાનો નિર્ણય લેવાયો છે, જેનાથી ગુટખા, સિગારેટ, પાન મસાલા અને જરદા જેવી વસ્તુઓ મોંઘી થશે. સાથે જ સુપર લક્ઝરી ચીજવસ્તુઓ, ફાસ્ટ ફૂડ, કાર્બોનેટેડ ડ્રિંક્સ, લક્ઝરી કાર અને વ્યક્તિગત ઉપયોગ માટેના એરક્રાફ્ટ પર પણ 40% ટેક્સ લાગશે. આ ઉપરાંત, આવક વધારવા માટે આ વસ્તુઓ પર વધારાનો સેસ પણ લગાડવામાં આવી શકે છે.
બીજી તરફ, રોજિંદા જીવનમાં વપરાતી વસ્તુઓ હવે સસ્તી થશે. વપરાશકર્તાઓ માટે મોટી રાહતરૂપે હેયર ઓઇલ, શેમ્પૂ, ટૂથપેસ્ટ, સાબુ, ટૂથબ્રશ અને શેવિંગ ક્રીમ જેવા પ્રોડક્ટ્સ પર ટેક્સ 18% માંથી ઘટાડી 5% કરવામાં આવ્યો છે. ડેરી ઉત્પાદનો જેમ કે માખણ, ઘી, ચીઝ પર હવે 12%ના બદલે ફક્ત 5% ટેક્સ લાગશે. પ્રી-પેકેજ્ડ નમકીન, ચવાણું, વાસણો, ફીડિંગ બોટલ, બાળકોના નેપકિન્સ અને ડાયપર જેવી વસ્તુઓ પર પણ હવે માત્ર 5% જ ટેક્સ રહેશે. સીવણ મશીન અને તેના ભાગો પણ આ કેટેગરીમાં આવશે, જેના કારણે ઘરગથ્થુ ઉદ્યોગોને મોટી રાહત મળશે.
આ ચીજવસ્તુઓ પર 40 ટકા GST
- સુપર લક્ઝરી ચીજવસ્તુઓ
- પાન મસાલા
- સિગારેટ ગુટખા
- ચાવવાની તમાકુ
- જરદા
- એડેડ શુગર, કાર્બોનેટેડ ડ્રિંક્સ
- વ્યક્તિગત ઉપયોગ માટે એરક્રાફ્ટ
- લક્ઝરી કાર
- ફાસ્ટ ફૂડ
જીવન જરૂરિયાતની કઈ કઈ વસ્તુઓ થશે સસ્તી, જુઓ આખી યાદી
- હેયર ઓઇલ, શેમ્પૂ, ટૂથપેસ્ટ, સાબુ, ટૂથબ્રશ, શેવિંગ ક્રીમ 18% થી 5%
- માખણ, ઘી, ચીઝ અને અન્ય ડેરી ઉત્પાદનો 12% થી 5%
- પ્રી-પેકેજ્ડ નમકીન અને ચવાણું 12% થી 5%
- વાસણો 12% થી 5%
- ફીડિંગ બોટલ, બાળકોના નેપકિન્સ અને ડાયપર 12% થી 5%
- સીવણ મશીન અને તેના ભાગો 12% થી 5%
આરોગ્ય ક્ષેત્રે રાહત
- હેલ્થ અને લાઇફ ઇન્સ્યોરન્સ 18% થી શૂન્ય
- થર્મોમીટર 18% થી 5%
- મેડિકલ ગ્રેડ ઓક્સિજન 12% થી 5%
- ગ્લુકોમીટર અને ટેસ્ટ સ્ટ્રીપ્સ 12% થી 5%
- ચશ્મા 12% થી 5%
સ્ટેશનરી વસ્તુઓ ટેક્સ ફ્રી
- નકશા, ચાર્ટ અને ગ્લોબ્સ 12% થી શૂન્ય
- પેન્સિલ, શાર્પનર્સ, ક્રેયોન્સ-પેસ્ટલ્સ કલર્સ 12% થી શૂન્ય
- પાઠ્ય પુસ્તકો અને નોટબુક્સ 12% થી શૂન્ય
- ઇરેઝર 5% થી શૂન્ય
ખેડૂતોને રાહત
- ટ્રેક્ટર 12% થી 5%
- ટ્રેક્ટર ટાયર અને ભાગો 18% થી 5%
- જંતુનાશકો અને સૂક્ષ્મ પોષકતત્ત્વો 12% થી 5%
- જમીન ખેડવા, લણણી અને થ્રેશિંગ માટેના મશીનો 12% થી 5%
વાહનો થશે સસ્તા
- પેટ્રોલ, LPG અને CNG કાર (1200 CC અને 4000 MM સુધીના) 28% થી 18%
- ડીઝલ કાર (1500 CC અને 4000 MM સુધીના) 28% થી 18%
- થ્રી-વ્હીલર વાહનો 28% થી 18%
- 350 CC સુધીના બાઇક 28% થી 18%
- માલ પરિવહન માટેના વાહનો 28% થી 18%
ઈલેક્ટ્રોનિક ઉપકરણો પર ટેક્સ ઘટાડો
- એર કંડિશનર 28% થી 18%
- 32 ઇંચથી મોટા ટીવી 28% થી 18%
- મોનિટર અને પ્રોજેક્ટર 28% થી 18%
- ડીશ વોશિંગ મશીન 28% થી 18%
