અમદાવાદમાં વર્ષ 2026–27ના શૈક્ષણિક વર્ષ માટે રાઈટ ટુ એજ્યુકેશન (RTE) હેઠળની પ્રવેશ પ્રક્રિયાની પૂર્વ તૈયારીઓ અત્યારથી જ શરૂ કરી દેવામાં આવી છે. જિલ્લા શિક્ષણ અધિકારી દ્વારા શહેરની તમામ ખાનગી શાળાઓ પાસેથી વિદ્યાર્થીઓની સંખ્યા અને વર્ગોની વિગત માંગવામાં આવી છે. પ્રાથમિક શિક્ષણ નિયામકની સૂચના મુજબ આ સમગ્ર પ્રક્રિયા સમયસર પૂર્ણ કરવા માટે વહીવટી તંત્ર સક્રિય બન્યું છે, જેથી પ્રવેશની જાહેરાત વખતે વાલીઓ અને વિદ્યાર્થીઓને કોઈ પ્રકારની મુશ્કેલી ન પડે.
આ પ્રક્રિયા અંતર્ગત અમદાવાદ શહેરની અંદાજે 1300 જેટલી ખાનગી શાળાઓમાં RTE હેઠળ પ્રવેશ પ્રક્રિયા હાથ ધરવામાં આવશે. જિલ્લા શિક્ષણ અધિકારી દ્વારા આ કામગીરી માટે તમામ CRCને જવાબદારી સોંપવામાં આવી છે. શાળાઓને ખાસ વેરિફિકેશન ફોર્મ આપવામાં આવ્યા છે, જેમાં ધોરણ 1ના વર્ગોની સંખ્યા, RTE હેઠળ અભ્યાસ કરતા વિદ્યાર્થીઓ તથા કુલ વિદ્યાર્થીઓની વિગત માંગવામાં આવી છે.
નિયમ મુજબ, શાળાઓમાં ધોરણ 1ના નોન-RTE વિદ્યાર્થીઓની સંખ્યાના આધારે જ RTE હેઠળની બેઠકો નક્કી કરવામાં આવે છે. તેથી આ તમામ વિગતો એકત્રિત કરવી અનિવાર્ય બની છે. વેરિફિકેશન પ્રક્રિયા દ્વારા શાળાઓમાં ઉપલબ્ધ વાસ્તવિક બેઠકોની ચોક્કસ માહિતી મેળવવાનો હેતુ રાખવામાં આવ્યો છે.
આંકડાકીય વિગતો પર નજર કરીએ તો અમદાવાદ શહેરમાં દર વર્ષે અંદાજે 12,000 જેટલી બેઠકો પર RTE હેઠળ ધોરણ 1માં પ્રવેશ આપવામાં આવે છે. હાલની સ્થિતિ મુજબ શહેરની વિવિધ શાળાઓમાં ધોરણ 1થી 8માં કુલ મળીને અંદાજે 90,000 જેટલા વિદ્યાર્થીઓ RTE હેઠળ મફત શિક્ષણ મેળવી રહ્યા છે.
હાલ ચાલી રહેલી વેરિફિકેશનની કામગીરી પૂર્ણ થયા બાદ શાળાઓની આખરી બેઠકોની સંખ્યા જાહેર કરવામાં આવશે. ત્યારબાદ RTE હેઠળ પ્રવેશ માટે ઓનલાઈન ફોર્મ ભરવાની પ્રક્રિયાની સત્તાવાર જાહેરાત કરવામાં આવશે.
અમારી યુટ્યુબ ચેનલને લાઈક કરો, શેર કરો અને સબ્સ્ક્રાઇબ કરો
Like, Share and Subscribe our YouTube channel
