ગુજરાત પ્રદેશ ભાજપના પ્રભારી તથા રાજ્યસભાના સાંસદ તરુણ ચુઘજીના ખેડા જિલ્લાના નડિયાદ ખાતે આગમન પ્રસંગે નડિયાદના યોગીફાર્મ ખાતે ખેડા જિલ્લા ભાજપ સંગઠનની મહત્વપૂર્ણ બેઠક યોજાઈ હતી.
બેઠકમાં ગુજરાત પ્રદેશ સંગઠન મહામંત્રી રત્નાકારજી, પ્રદેશ મહામંત્રી અજયભાઈ બ્રહ્મભટ્ટ, હિતેન્દ્રસિંહ ચૌહાણ, ખેડા જિલ્લા ભાજપ પ્રમુખ નયનાબેન પટેલ સહિત જિલ્લા ભાજપ સંગઠનના આગેવાનો અને કાર્યકરો ઉપસ્થિત રહ્યા હતા.
બેઠક દરમિયાન ખેડા જિલ્લા ભાજપના સંગઠનાત્મક મુદ્દાઓ, આગામી કાર્યક્રમો તથા સંગઠનને વધુ મજબૂત બનાવવા અંગે વિસ્તૃત ચર્ચા કરવામાં આવી હતી. આ ઉપરાંત, નરેન્દ્રભાઈ મોદીજીની સરકારના 25 વર્ષના સેવા કાર્યકાળના ઐતિહાસિક અને ગૌરવશાળી પ્રસંગને નિમિત્તે યોજાનારા 12 વિવિધ કાર્યક્રમોની યોજના અંગે પ્રદેશ પ્રભારી તરુણ ચુઘજીએ માહિતી આપી હતી.
તેમજ વડાપ્રધાન નરેન્દ્રભાઈ મોદીજીના લોકપ્રિય ‘મન કી બાત’ કાર્યક્રમને લઈને પણ બેઠકમાં વિસ્તૃત ચર્ચા કરવામાં આવી હતી અને કાર્યકરોને આગામી આયોજન અંગે માર્ગદર્શન આપવામાં આવ્યું હતું.
જિલ્લા સંગઠન સાથેની બેઠક બાદ પ્રદેશ પ્રભારી તરુણ ચુઘજીએ ચૂંટાયેલા પ્રતિનિધિઓ સાથે પણ સંવાદ કર્યો હતો. આ સંવાદ કાર્યક્રમમાં જિલ્લાના ધારાસભ્યો, સાંસદો તેમજ તાલુકા અને જિલ્લા પંચાયતના સભ્યો તથા નગરપાલિકાના ચૂંટાયેલા સભ્યો ઉપસ્થિત રહ્યા હતા.
આ બેઠક અને સંવાદ કાર્યક્રમ દરમિયાન જિલ્લાના સંગઠનાત્મક કાર્યો, જનસંપર્ક, આગામી કાર્યક્રમો તથા સરકારની વિવિધ જનકલ્યાણકારી યોજનાઓનો લાભ વધુમાં વધુ લોકો સુધી પહોંચાડવા અંગે પણ ચર્ચા કરવામાં આવી હતી.
પ્રદેશ પ્રભારી તરુણ ચુઘજીના નડિયાદ આગમનને પગલે ખેડા જિલ્લા ભાજપ સંગઠનના આગેવાનો અને ચૂંટાયેલા પ્રતિનિધિઓમાં ઉત્સાહ જોવા મળ્યો હતો.
રિપોર્ટર – યેશા શાહ (ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
