વિશ્વમાં ફરી એકવાર જીવલેણ ઇબોલા વાયરસનો પ્રકોપ વધતો જોવા મળી રહ્યો છે, ત્યારે ભારતે માનવતાવાદી અભિગમ દાખવી આફ્રિકાના દેશ કાંગોની મદદ માટે મહત્વપૂર્ણ પગલું ભર્યું છે. ભારત સરકારે કાંગોમાં ફેલાયેલા ઇબોલા સંક્રમણને કાબૂમાં લેવા અને તેના પ્રસારને અટકાવવા માટે તાત્કાલિક ધોરણે ઇમરજન્સી દવાઓ અને તબીબી સામગ્રીનો જથ્થો મોકલી આપ્યો છે.
આ સહાય વિશેની સત્તાવાર માહિતી ઇથોપિયા સ્થિત ‘આફ્રિકા સેન્ટર્સ ફોર ડિસીઝ કંટ્રોલ એન્ડ પ્રિવેન્શન’ દ્વારા જાહેર કરવામાં આવી હતી. સંસ્થાના જણાવ્યા અનુસાર ભારત તરફથી મોકલવામાં આવેલી મેડિકલ સહાય યુગાન્ડામાં આવેલા ‘પૂર્વી આફ્રિકા પ્રાદેશિક સંકલન કેન્દ્ર’ ખાતે સફળતાપૂર્વક પહોંચી ગઈ છે. આ કેન્દ્રમાંથી આ સામગ્રીને કાંગોના ઇબોલા પ્રભાવિત વિસ્તારોમાં ઝડપથી વિતરણ કરવામાં આવશે.
ભારત દ્વારા મોકલવામાં આવેલી આ સહાયમાં ઇમરજન્સી દવાઓ, જરૂરી ડાયગ્નોસ્ટિક કિટ્સ, તેમજ સંક્રમણ નિયંત્રણ માટે જરૂરી ઉપકરણોનો સમાવેશ થાય છે. આ તમામ સાધનો ઇબોલાના પ્રસારને અટકાવવા અને દર્દીઓની સારવારમાં મદદરૂપ સાબિત થશે.
હાલમાં કાંગો અને આસપાસના વિસ્તારોમાં ઇબોલાનો ‘બુન્ડીબુગ્યો સ્ટ્રેન’ ફેલાઈ રહ્યો છે, જેને વર્લ્ડ હેલ્થ ઓર્ગેનાઈઝેશન (WHO) દ્વારા ગંભીર ગણાવવામાં આવ્યો છે. આ સ્ટ્રેન માટે હજુ સુધી કોઈ ચોક્કસ માન્ય રસી અથવા અસરકારક એન્ટિવાયરલ દવા ઉપલબ્ધ નથી, જેના કારણે સંક્રમણ નિયંત્રણ અને દર્દીઓની યોગ્ય દેખરેખ જ એકમાત્ર ઉપાય છે.
‘ફાર્મસી ઓફ ધ વર્લ્ડ’ તરીકે ઓળખાતું ભારત હંમેશાં વૈશ્વિક સ્વાસ્થ્ય સંકટમાં આગળ આવીને સહાય કરે છે. આફ્રિકા CDC એ ભારત સરકાર અને અહીંના નાગરિકોનો આભાર વ્યક્ત કરતા જણાવ્યું કે મુશ્કેલ સમયમાં ભારતનો આ સહયોગ આફ્રિકાના લોકોના જીવન બચાવવામાં મહત્વપૂર્ણ સાબિત થશે.
ભારતની આ પહેલ માત્ર દવાઓ પૂરતી મર્યાદિત નથી પરંતુ વૈશ્વિક આરોગ્ય સુરક્ષા માટે તેની પ્રતિબદ્ધતાનું પણ પ્રતિબિંબ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
