કોંગ્રેસ સાંસદની ટર્મ પૂરી થઇ નથી ને આદિવાસી નેતા નારણ રાઠવાએ કેસરી ખેસ ધારણ કરી લીધો

લોકસભાની ચૂંટણી પૂર્વે માર્ચના બીજા સપ્તાહમાં કોંગ્રેસના રાષ્ટ્રીય નેતા રાહુલ ગાંધીનો ગુજરાતના આદિવાસી પટ્ટામાં ન્યાય યાત્રા સાથેનો પ્રવાસ શરૂ થાય એ પહેલાં છોટાઉદેપુરમાં લાંબા સમય સુધી લોકસભા અને પછી રાજ્યસભાના સાંસદ, કેન્દ્રીય રેલવેમંત્રી રહી ચૂકેલા આદિવાસી આગેવાન નેતા નારણ રાઠવા તેમના પુત્ર સંગ્રામ રાઠવા સાથે મોટી સંખ્યાામાં કાર્યકરોને લઇ ભાજપમાં જોડાયા હતા. કોંગ્રેસી આગેવાન રાઠવાનું રાજ્યસભાનું સંસદસભ્ય પદ હજુ યથાવત છે ને હવે પોતાના પુત્રને ભાજપમાં ગોઠવવાના મોહમાં કેસરીયો ખેસ પહેર્યો છે. આ ઉપરાંત અમદાવાદમાંથી કોંગ્રેસના અનેક આગેવાનો પણ ભાજપમાં જોડાયા હતા. આ તમામને ભાજપ પ્રમુખ સી.આર. પાટીલે ખેસ પહેરાવી સ્વાગત કર્યું હતું. એક ઔપચારિક વાતચીતમાં પાટીલે સ્પષ્ટ કર્યું કે, હમણાં ભાજપમાં સામેલ થયેલા કોઇ આગેવાનને ભાજપ કોઇપણ ચૂંટણીની ટિકિટ આપશે એવું કમિટમેન્ટ અપાયું નથી.

૧૯૮૯થી છોટાઉદેપુર લોકસભા મતવિસ્તારના સાંસદ પદે સતત પાંચ ટર્મ સુધી ચૂંટાયેલા તથા ૨૦૦૪થી ૨૦૦૯ સુધી કેન્દ્રમાં રાજ્યકક્ષાના રેલવે મંત્રી પદે કામગીરી કરનાર નારણ રાઠવા છ વર્ષ સુધી રાજ્યસભાના સભ્ય રહ્યા હતા. આ ટર્મ હમણાં જ પૂરી થઇ છે. ૨૦૨૨ની વિધાનસભા ચૂંટણીમાં છોટાઉદેપુરમાં ૧૧ ટર્મ સુધી વિધાનસભામાં પ્રતિનિધિત્વ કરનાર મોહનસિંહ રાઠવાએ પોતાના પુત્ર રાજુ રાઠવા માટે ટિકિટ માગી હતી, પરંતુ કોંગ્રેસ હાઇકમાન્ડે નારણ રાઠવાના પુત્ર સંગ્રામ રાઠવાને ઉમેદવાર બનાવવાનો નિર્ણય કર્યો હતો. આ ઝગડાના લીધે મોહનસિંહ રાઠવાએ ભાજપનો ખેસ પહેરી પુત્રને ધારાસભ્ય બનાવવામાં સફળતા મેળવી હતી. હવે કોંગ્રેસમાં નવુ કોઇ ભવિષ્ય નહીં જણાતા નારણ રાઠવાએ પણ પુત્ર સંગ્રામ રાઠવા માટે ભાજપનો ખેસ પહેર્યો છે એમ એમના સમર્થકો માની રહ્યા છે.