અમદાવાદના ચાંદખેડા વિસ્તારમાં ખાદ્ય પદાર્થોની ગુણવત્તા સામે ગંભીર સવાલો ઊભા કરતી ઘટના સામે આવી છે. ઢોસાના ખીરામાંથી બનેલી વાનગી ખાધા બાદ ફૂડ પોઈઝનિંગ થવાના કારણે એક જ પરિવારની બે નાની દીકરીઓના મોત થયાનો પરિવાર દ્વારા દાવો કરવામાં આવ્યો છે. આ ઘટનાથી સમગ્ર વિસ્તારમાં ચકચાર મચી ગઈ છે.
એક પછી એક પરિવારના સભ્યો બીમાર
મળતી માહિતી અનુસાર, મારુતિ પ્લાઝા રેસિડેન્સીમાં રહેતા ગૌરીશંકર પ્રજાપતિના પરિવારમાં આ ઘટના બની હતી. તેમના જણાવ્યા મુજબ, તેમના દીકરાએ પહેલી એપ્રિલની સાંજે ઘનશ્યામ ડેરી માંથી ઢોસાનું ખીરું લાવ્યું હતું.
રાત્રે ઢોસા બનાવ્યા બાદ ખાધા પછી બીજા દિવસે સવારે તેમના દીકરાને ઉલ્ટીઓ શરૂ થઈ અને તેને હોસ્પિટલમાં દાખલ કરવો પડ્યો. શરૂઆતમાં ફૂડ પોઈઝનિંગ અંગે જાણ ન હોવાથી પરિવારના અન્ય સભ્યોએ પણ તે જ ખીરામાંથી બનેલી વાનગી ખાધી, જેના કારણે તેઓ પણ બીમાર થઈ ગયા.
બે માસૂમ દીકરીઓના મોત
પરિવારના જણાવ્યા મુજબ, આ ગંભીર અસરને કારણે અઢી મહિનાની નાની પૌત્રી અને ત્યારબાદ સાડા ત્રણ વર્ષની મોટી પૌત્રીનું સારવાર દરમિયાન મોત થયું છે. હાલ પરિવારના માતા-પિતા બંને હોસ્પિટલના ICUમાં સારવાર હેઠળ છે, જેની સ્થિતિ ગંભીર જણાવાઈ રહી છે.
પરિવારની ન્યાય માટેની માંગ
દુઃખમાં ગરકાવ દાદા ગૌરીશંકર પ્રજાપતિએ પોલીસ સમક્ષ ન્યાયની ગુહાર લગાવી છે. તેમણે માંગ કરી છે કે સંબંધિત ડેરીની સઘન તપાસ કરવામાં આવે અને જવાબદાર લોકો સામે કડક કાર્યવાહી કરવામાં આવે, જેથી ભવિષ્યમાં આવી ઘટના ફરી ન બને.
પોલીસ તપાસ શરૂ, સેમ્પલ ફોરેન્સિકમાં
પોલીસ અધિકારીઓએ જણાવ્યું કે આ મામલે ફરિયાદ નોંધવામાં આવી છે અને વધુ તપાસ ચાલુ છે. ઢોસાના ખીરાના સેમ્પલ લેવામાં આવ્યા છે અને તેને ફોરેન્સિક વિશ્લેષણ માટે મોકલવામાં આવ્યા છે. રિપોર્ટ આવ્યા બાદ આગળની કાર્યવાહી કરવામાં આવશે.
ડેરી માલિકનો ઇન્કાર
આ સમગ્ર મામલે ઘનશ્યામ ડેરીના માલિક કેતન પટેલે તમામ આરોપોને નકારી કાઢ્યા છે. તેમણે જણાવ્યું કે તે દિવસે અનેક ગ્રાહકોને એ જ ખીરું આપવામાં આવ્યું હતું અને કોઈ અન્ય વ્યક્તિએ આવી કોઈ ફરિયાદ કરી નથી.
તેમણે દાવો કર્યો કે ખીરું તેમની ડેરીમાં જ તૈયાર કરવામાં આવે છે અને ગુણવત્તાનો સંપૂર્ણ ખ્યાલ રાખવામાં આવે છે.
આ ઘટના ખાદ્ય સુરક્ષા અને ગુણવત્તા અંગે ગંભીર ચિંતાઓ ઊભી કરે છે. હાલ પોલીસ અને ફોરેન્સિક રિપોર્ટ પર સૌની નજર છે, જેનાથી સ્પષ્ટ થશે કે આ ઘટનાનું સાચું કારણ શું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
