ઉત્તરાખંડની ઉત્તરકાશી ટિહરી બોર્ડર પર 15 બજાર ફૂટની ઊંચાઈએ આવેલા સહસ્ત્રતાલ ટ્રેક પર એક મોટી દુર્ઘટના થઈ છે. અત્યાર સુધીમાં લગભગ 9 લોકોના મોતની પુષ્ટિ કરવામાં આવી છે. મળતી માહિતી મુજબ મૃત્યુઆંક વધી શકે છે. દુર્ઘટના બાદ 13 લોકોને બચાવી લેવાયા છે. પાંચ મૃતદેહોને લઈ જવામાં આવ્યા છે, જ્યારે 4 મૃતદેહોને લઈ જવાના બાકી છે. મંગળવારે સાંજે લગભગ 4 વાગ્યે, ઉત્તરકાશી અને ટિહરી ડિઝાસ્ટર મેનેજમેન્ટ સેન્ટરના ફોન રણકવા લાગ્યા અને સમાચાર મળ્યા કે કર્ણાટક અને મહારાષ્ટ્રના 22 ટ્રેકર્સ સહસ્ત્રતાલ ટ્રેક પરથી પાછા ફરતી વખતે કુફરી ટોપ પર ખરાબ હવામાનને કારણે અટવાયા છે.
કર્ણાટક અને મહારાષ્ટ્રથી આવેલા આ ટ્રેકિંગ ગ્રુપે 29મી મેથી ટ્રેકિંગ શરૂ કર્યું હતું અને 7મી જૂન સુધીમાં પરત ફરવાનું હતું. અકસ્માત બાદ ટ્રેકર્સના ગાઈડે તાત્કાલિક સરકારને પત્ર લખીને મદદ માંગી હતી. આ પછી ઉત્તરકાશી અને ટિહરી પ્રશાસને પોતપોતાના જિલ્લાઓમાંથી NDRFની ટીમોને બચાવ કાર્ય માટે સાધનો સાથે બેઝ કેમ્પ પર મોકલી, જ્યાંથી સહસ્ત્રતાલ ટ્રેકનું ચઢાણ શરૂ થાય છે. આ સાથે, 22 ટ્રેકર્સમાંથી બીમાર પડેલા બે ‘કુછ કલ્યાણ બેઝ’ કેમ્પ પર પાછા ફર્યા. રેસ્ક્યુ ટીમની મદદથી 13 લોકોને બેઝ કેમ્પમાં લાવવામાં આવ્યા.
હાલ સ્થળ પર હવામાન ચોખ્ખું છે. નતિન હેલિપેડ પર બચાવ માટે જરૂરી વાહનો અને સ્ટાફ તૈનાત કરવામાં આવ્યો છે. મતલી હેલિપેડ પર એમ્બ્યુલન્સ તૈનાત કરવામાં આવી છે. મતલી હેલિપેડ પર NDRFના જવાનો તૈનાત છે.
અકસ્માત પર CM ધામીએ શું કહ્યું?
મુખ્યમંત્રી પુષ્કર સિંહ ધામીએ કહ્યું કે, ‘આ એક દુ:ખદ ઘટના છે અને અમે SDRF અને રેસ્ક્યુ ટીમને બચાવ માટે મોકલી છે અને અમે જે પણ જરૂરી હશે તે તૈનાત કરીશું, એરફોર્સની મદદ લેવામાં આવી રહી છે. લોકોને બચાવવાના પ્રયાસો કરવામાં આવશે.’
SDRF કમાન્ડન્ટે જણાવ્યું કે, પ્રશાસનને માહિતી મળી હતી કે કુફરી ટોપ પર લગભગ 22 લોકો ફસાયેલા છે. આ પછી ટીમો મોકલવામાં આવી હતી. હવાઈ સેવાની મદદ લેવામાં આવી રહી છે. અત્યાર સુધીમાં 10 લોકોને દેહરાદૂન લાવવામાં આવ્યા છે અને બાકીના ઘાયલોની ઉત્તરકાશીમાં સારવાર ચાલી રહી છે. મૃતકોને પરત લાવવાના પ્રયાસો પણ ચાલુ છે.
ટ્રેકરે ભયાનક દ્રશ્ય જણાવ્યું
હોસ્પિટલમાં હાજર ટ્રેકર સ્મૃતિ ડોલાસે જણાવ્યું કે ઘટનાના દિવસે ટ્રેકર્સ પરત ફરી રહ્યા હતા. જે જગ્યાએ તેઓ અટવાયા હતા ત્યાં હિમવર્ષા થઈ રહી હતી અને અચાનક 90 કિલોમીટર પ્રતિ કલાકની ઝડપે જોરદાર પવન ફૂંકાયો હતો જેના કારણે અમે ત્યાં ફસાઈ ગયા હતા.
સહસ્ત્ર તાલ પર ચઢવું સરળ નથી
સહસ્ત્ર તાલ ટ્રેક એ ઉત્તરાખંડના ગઢવાલ ક્ષેત્રમાં સ્થિત એક લોકપ્રિય ટ્રેક છે. તે તેની પ્રાકૃતિક સુંદરતા અને ભવ્ય વાતાવરણ માટે જાણીતું છે. લગભગ 15 હજાર ફૂટની ઉંચાઈ પર સ્થિત સહસ્ત્ર તાલ ટ્રેક ઋષિકેશથી શરૂ થાય છે. ઋષિકેશથી કામદ ગામનું અંતર લગભગ 130 કિલોમીટર છે. સહસ્ત્ર તાલ ટ્રેકનું ચઢાણ ઉત્તરકાશીમાં ‘કુછ કલ્યાણ બેઝ’થી શરૂ થાય છે. સહસ્ત્ર તાલ સુધી પહોંચવા માટે કુલ ટ્રેકની લંબાઈ વ્યક્તિગત રૂટના આધારે અંદાજે 30-35 કિલોમીટર છે. ટ્રેકને પૂર્ણ કરવામાં સામાન્ય રીતે 7-8 દિવસ લાગે છે.
સહસ્ત્ર તાલ ટ્રેકમાં ઘણી સુંદર તાલનો સમાવેશ થાય છે, જેમ કે દુધી તાલ, દર્શનતાલ, લુમ્બતાલ, લિંગતાલ, કોકલીતાલ, નરસિંગતાલ અને પરિતાલ. આ ટ્રેક હિમાલયના બરફથી ઢંકાયેલા શિખરો, લીલાછમ ઘાસના મેદાનો અને ગાઢ જંગલોમાંથી પસાર થાય છે. પ્રવાસ દરમિયાન વિવિધ પ્રકારના વનસ્પતિ અને પ્રાણીસૃષ્ટિ પણ જોવા મળે છે. આ સ્થળ તેની શાંતિ અને કુદરતી સૌંદર્ય માટે પ્રખ્યાત છે. સહસ્ત્ર તાલ ટ્રેકને મધ્યમથી મુશ્કેલ સ્તરનો ગણવામાં આવે છે અને તેમાં સારી શારીરિક તંદુરસ્તી અને ટ્રેકિંગનો અનુભવ જરૂરી છે.
