અમદાવાદના હૃદયસમાન સી.જી. રોડ પર મોડી રાત્રે સ્પીડ અને સ્ટંટના ઘાતક ક્રેઝે એક આશાસ્પદ યુવકનો જીવ લઈ લીધો છે. પૂરપાટ ઝડપે દોડતી મોંઘેરી બાઈકે રસ્તો ઓળંગી રહેલા 25 વર્ષીય શ્રમિક યુવકને એટલી જોરદાર ટક્કર મારી કે તેનું ઘટનાસ્થળે જ પ્રાણપંખેરું ઉડી ગયું. આ ભયાનક અકસ્માતથી સમગ્ર વિસ્તારમાં અરેરાટી વ્યાપી ગઈ છે.
મળતી માહિતી મુજબ, સી.જી. રોડ વિસ્તારમાં મજૂરી કામ કરીને ગુજરાન ચલાવતો પ્રકાશ ડિંડોર ગત રાત્રે તેના મિત્ર મહેન્દ્ર ચૌહાણ સાથે જમ્યા બાદ ટહેલવા નીકળ્યો હતો. બંને મિત્રો મરડિયા પ્લાઝા પાસે સાવચેતીપૂર્વક રસ્તો ક્રોસ કરી રહ્યા હતા, તે દરમિયાન ગોતા તરફથી આવતી એક હાઈ-સ્પીડ બાઈકે પ્રકાશને અડફેટે લીધો.
પ્રત્યક્ષદર્શીઓના જણાવ્યા અનુસાર ટક્કર એટલી પ્રચંડ હતી કે પ્રકાશ બાઈક નીચે કચડાઈ ગયો અને તેના માથામાં ગંભીર ઇજાઓ પહોંચી હતી. ઈજાઓ એટલી ગંભીર હતી કે તેને કોઈ તાત્કાલિક મદદ મળે તે પહેલા જ તેનું ઘટનાસ્થળે મોત નિપજ્યું હતું. અકસ્માત બાદ ત્યાં હાજર લોકોમાં ભય અને અફરાતફરીનો માહોલ સર્જાઈ ગયો હતો.
તેને ઈજાઓ થતાં તાત્કાલિક સારવાર માટે હોસ્પિટલ ખસેડવામાં આવ્યો છે.
પોલીસે મૃતક પ્રકાશ ડિંડોરના મૃતદેહને પોસ્ટમોર્ટમ માટે સિવિલ હોસ્પિટલ મોકલી આપ્યો છે અને સમગ્ર ઘટનાની તપાસ શરૂ કરી છે. સાથે સાથે આસપાસના વિસ્તારમાંથી સીસીટીવી ફૂટેજ મેળવવાની કાર્યવાહી પણ હાથ ધરવામાં આવી છે.
સી.જી. રોડ પર મોડી રાત્રે ખેલાતા આવા મોતના તાંડવોએ ફરી એકવાર શહેરની ટ્રાફિક વ્યવસ્થા અને રોડ સેફ્ટી પર ગંભીર સવાલો ઊભા કર્યા છે. ઝડપ અને સ્ટંટના શોખના કારણે નિર્દોષ લોકોના જીવ જતા હોવાની ઘટનાઓ રોકવા માટે કડક કાર્યવાહી જરૂરી બની છે.
અમારી યુટ્યુબ ચેનલને લાઈક કરો, શેર કરો અને સબ્સ્ક્રાઇબ કરો
Like, Share and Subscribe our YouTube channel
