પાલઘર જિલ્લાના નાલાસોપારા પોલીસે ૪૩ વર્ષના એક એવા ‘વરરાજા’ને પકડી પાડયો છે જેણે છેલ્લા થોડા વર્ષોમાં ૨૦ મહિલાઓ સાથે લગ્ન કરી તેમના પાસેથી પૈસા અને કિંમતી વસ્તુ પડાવી તેમની સાથે વિશ્વાસઘાત અને છેતરપિંડી કરી હતી. એમબીવીવી પોલીસે જણાવ્યું હતું કે નાલાસોપારામાં રહેતી એક મહિલાની ફરિયાદના આધારે ફિરોઝ નિયાઝ શેખની કલ્યાણથી ધરપકડ કરવામાં આવી હતી.
આ સંદર્ભે વધુ વિગત આપતા સિનિયર પોલીસ ઈન્સ્પેક્ટર વિજયસિંહ ભાગલે જણાવ્યું હતું કે ફરિયાદી મહિલાના જણાવ્યાનુસાર તેની આરોપી સાથે એક મેટ્રીમોનિયલ સાઈટ પરથી ઓળખાણ અને મિત્રતા થઈ હતી ત્યારબાદ બન્નેએ લગ્ન કરી લીધા હતા. મહિલાની ફરિયાદ અનુસાર શેખે મહિલા પાસેથી લાખોની રોકડ અને લેપટોપ પડાવી લીધું હતું. આરોપી શેખે ઓક્ટોબર અને નવેમ્બર, ૨૦૨૩માં મહિલા પાસેથી રૂ.૬.૫ લાખની રોકડ લીધી હતી અને ત્યારબાદ તેનું લેપટોપ પણ પડાવ્યું હતું.
મહિલાની ફરિયાદના આધારે પોલીસે આરોપી સામે ગુનો નોંધી વધુ તપાસ આદરતા પોલીસને ચોંકાવનારી માહિતી મળી હતી. આ કેસની તપાસ દરમિયાન પોલીસને જાણવા મળ્યું હતું કે શેખે મેટ્રીમોનિયલ સાઈટ પરથી છૂટાછેડાવાળી અને વિધવા મહિલાઓને લક્ષ્ય બનાવતો અને આ રીતે તેણે ઘણા લગ્નો કરી તેમને નિશાન બનાવી હતી અને તેમના પાસેથી રોકડ રકમ તેમની કિંમતી સામાન પડાવ્યો હતો. પોલીસે આરોપી શેખ પાસેથી એક લેપટોપ, મોબાઈલ ફોન, ડેબિટ અને ક્રેડિટ કાર્ડ, ચેકબુક અને અમુક દાગીનાઓ જપ્ત કર્યા હતા.
આ સંદર્ભે વધુ વિગત આપતા ભાગલએ જણાવ્યું હતું કે શેખે વર્ષ ૨૦૧૫થી અત્યાર સુધીમાં મહારાષ્ટ્ર, મધ્યપ્રદેશ, ઉત્તર પ્રદેશ, દિલ્હી અને ગુજરાત સહિત દેશના વિવિધ શહેરોમાંથી ૨૦ મહિલાઓને છેતરી તેમની સાથે લગ્ન કર્યા હતા.
