ગુજરાત પર વાવાઝોડાના ખતરાને લઈને રાજ્ય સરકાર એલર્ટ બની છે. વાસ્તવમાં હવામાન વિભાગે અને હવામાન નિષ્ણાંતોએ રાજ્યમાં વાવાઝોડાની આગાહી કરી છે. આ તરફ હવે રાજ્યના મુખ્યમંત્રી ભૂપેન્દ્ર પટેલે આ અંગે સૂચના આપી છે. CM ભૂપેન્દ્ર પટેલ રાજ્યના જુદા જુદા જિલ્લાઓમાં 24 કલાક કન્ટ્રોલરૂમ કાર્યરત કરવા સૂચના આપી છે. આ સાથે જિલ્લા વહીવટીતંત્રને સતર્ક અને સજાગ રહેવા તાકીદ કરી છે. મહત્વનું છે કે, સુરત, તાપી, વલસાડ, ડાંગ, નવસારીમાં ભારે પવન ફૂંકાવાની આગાહી છે. આ સાથે અમરેલી અને ભાવનગરમાં પણ ભારે પવન ફૂંકાઈ શકે છે.
વાવાઝોડાની આગાહીને લઈ રાજ્ય સરકાર એલર્ટ
અરબી સમુદ્રમાં સર્જાયેલા લો પ્રેશરને પગલે હવામાન વિભાગે ગુજરાતમાં સુરત, તાપી, વલસાડ, ડાંગ, નવસારી, અમરેલી અને ભાવનગર જિલ્લાઓમાં પવન ફૂંકાવાની અને વરસાદની આગાહી કરીને યલો એલર્ટ આપેલું છે. આ તરફ મુખ્યમંત્રી ભૂપેન્દ્ર પટેલે હવામાન વિભાગે કરેલી આગાહીને ધ્યાને લેતા રાજ્યના આ જિલ્લાઓમાં જિલ્લા વહીવટી તંત્રોને સતર્ક અને સજાગ રહેવા તેમજ 24×7 કંટ્રોલરૂમ કાર્યરત કરવા સૂચનાઓ આપી છે.
મુખ્યમંત્રી ભૂપેન્દ્ર પટેલે આ સંભવિત વરસાદ કે ભારે પવન સામે તકેદારી સાથેના સલામતી પગલાઓ માટેના દિશાનિર્દેશો આપ્યા હતા. મુખ્યમંત્રીએ ગાંધીનગરના સ્ટેટ ઇમરજન્સી ઓપરેશન સેન્ટરમાં પણ કંટ્રોલરૂમ 24×7 કાર્યરત રહે અને આ જિલ્લાઓ સાથે સતત સંપર્કમાં રહે તેવી સૂચનાઓ આપી હતી.
