નર્મદા જિલ્લા કલેક્ટર એસ.કે. મોદીની અધ્યક્ષતામાં કલેક્ટર કચેરી ખાતે જિલ્લા જળ અને સ્વચ્છતા મિશન (વાસ્મો)ની મહત્વપૂર્ણ બેઠક યોજાઈ હતી. આ બેઠક દરમિયાન ગત બેઠકના નિર્ણયો તથા કાર્યવાહી નોંધને મંજૂરી અપાઈ હતી. બાદમાં જિલ્લાના ગ્રામ્ય વિસ્તારોમાં ચાલતી વિવિધ પાણી પુરવઠા યોજનાઓની સમીક્ષા કરવામાં આવી હતી.
કલેક્ટરએ ગામડાઓમાં વર્ષ દરમિયાન નાગરિકોને શુદ્ધ પીવાના પાણીની કોઈ અગવડ ન સર્જાય તે બાબતને ધ્યાનમાં રાખી તાત્કાલિક પગલાં લેવા પર ભાર મૂક્યો હતો. ખાસ કરીને ઓપરેટરની બાકી રહેલી નિમણૂંકો ઝડપથી પૂર્ણ કરવી, પમ્પીંગ મશીનરીની નિયમિત અને યોગ્ય જાળવણી, પાણીની ગુણવત્તાની નિયમિત ચકાસણી માટે સેમ્પલ ટેસ્ટિંગ, ભુગર્ભ જળને બચાવવા માટે નાગરિકો નદી- કેનાલ જેવા સરફેસ વોટરનો ઉપયોગ કરે તે દિશામાં કાર્ય કરવા તેમજ પ્રાથમિક શાળાઓ અને આંગણવાડીઓમાં સતત પાણીની ઉપલબ્ધિ રહે તેના ઉપર ભાર મૂકી ખાસ તાકીદ કરી હતી.
કલેક્ટર એ વેરા વસુલાત પ્રોત્સાહક યોજનાના અસરકારક અમલીકરણ, પાણી વિતરણ માટે ઓપરેટર તથા સ્વસહાય જૂથોની બહેનોનો સમાવેશ અને તેમને સમયસર મહેનતાણું ચુકવાય તેની સુનિશ્ચિતતા માટે સંબંધિતોને સુચના આપી હતી. તેમણે વધુમાં પાણી વિતરણ બાબતે સેચ્યુરેશન મોડમાં કામ કરવાની જરૂરિયાત પણ જણાવી હતી.
બેઠક દરમિયાન ઈ-ગ્રામ સુવિધા પોર્ટલ, પાણી વેરાની વસૂલાત, ઓપરેટરના વેતન, પાણી પુરવઠાની મરામત અને નિભાવણી પ્રોત્સાહન યોજનાઓ, જૂથ પાણી પૂરવઠા યોજના સહિત વિવિધ મુદ્દાઓ પર વિસ્તૃતમાં ચર્ચા કરવામાં આવી હતી.
સ્વચ્છ ભારત મિશન (ગ્રામીણ) અંતર્ગત થયેલી કામગીરીની પણ સમીક્ષા કરવામાં આવી હતી. જેમાં વ્યક્તિગત શૌચાલયો, કોમ્યુનિટી સોક પિટ, કોમ્યુનિટી કંપોસ્ટ પિટ, સેગ્રિગેશન શેડ અને ઈલેક્ટ્રિક વાહનો મારફત કચરા નિકાલના મુદ્દાઓ પણ ચર્ચામાં લેવાયા હતા.
અત્રે ઉલ્લેખનીય છે કે, નર્મદા જિલ્લાના કુલ ૫૨૨ ગામોમાંથી ૪૮૮ ગામોને જૂથ પાણી પુરવઠા યોજના(સરફેસ વોટર) હેઠળ આવરી લેવામાં આવ્યા છે. ઉપરાંત ઝરવાણી જૂથ યોજના અંતર્ગત ૫૪ ગામો તથા સાગબારા-દેડિયાપાડા ફળિયા કનેક્ટિવિટી યોજના હેઠળ ૬ ગામોને જોડવામાં આવ્યા છે.
આ બેઠકમાં જિલ્લા ગ્રામ વિકાસ એજન્સીના નિયામક વાય. એસ. ચૌધરી, યુનિટ મેનેજરશ્રી વાસ્મો, જિલ્લા પાણી પૂરવઠા અધિકારી, તાલુકા વિકાસ અધિકારી ઓ તથા જિલ્લા જળ અને સ્વચ્છતા મિશનના સભ્યો ઓ ઉપસ્થિત રહ્યા હતા.
શૈશવ રાવ (નર્મદા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
