રશિયા અને યુક્રેન વચ્ચે 24 ફેબ્રુઆરી 2022ના રોજ શરૂ થયેલું યુદ્ધ હવે સાડા ત્રણ વર્ષથી વધુ સમયથી ચાલી રહ્યું છે અને હાલમાં તેનો અંત જોવા મળતો નથી. આ લાંબા યુદ્ધ દરમ્યાન યુક્રેનમાં હજારો નાગરિકોના જીવ ગયા છે, અનેક શહેરો તબાહ થયા છે અને હજારો પરિવારો બેઘર થયા છે. રશિયન સૈનિકોનું પણ ભારે જાનહાનિ થયું છે, છતાં મોસ્કો પોતાના હુમલાઓ અટકાવવા તૈયાર નથી. ગઈકાલે રાત્રે રશિયાએ ફરી એક વખત યુક્રેન પર વિશાળ હવાઈ હુમલો કર્યો હતો, જેમાં 526 ડ્રોન અને મિસાઇલ છોડવામાં આવી હતી – જેમાંથી 502 ડ્રોન અને 24 મિસાઇલનો સમાવેશ થાય છે. યુક્રેન વાયુસેનાએ જણાવ્યું કે આ હુમલાનો મુખ્ય નિશાન પશ્ચિમ યુક્રેન હતો, જ્યાં 69 ડ્રોન અને 3 મિસાઇલોએ 14 અલગ-અલગ વિસ્તારોને ટાર્ગેટ કર્યા હતા. આ હુમલાથી અનેક લોકો ઘાયલ થયા અને અનેક ઇમારતો, રહેણાંક ઘરો તથા જાહેર સંપત્તિને નુકસાન પહોંચ્યું.
તાજેતરના દિવસોમાં બંને બાજુ હવાઈ હુમલાઓમાં નોંધપાત્ર વધારો થયો છે. રશિયા ખાસ કરીને યુક્રેનની વીજ પુરવઠા વ્યવસ્થા અને પરિવહન સુવિધાઓને નિશાન બનાવી રહ્યું છે, જેથી દેશની બેઝિક ઈન્ફ્રાસ્ટ્રક્ચર તોડી શકાય. બીજી તરફ, અમેરિકાના નવા પ્રમુખ ડોનાલ્ડ ટ્રમ્પે જાહેર કર્યું છે કે તેઓ શક્ય તેટલી વહેલી તકે આ યુદ્ધનો અંત લાવવા ઈચ્છે છે. ઑગસ્ટ 2025માં તેમણે યુક્રેનના રાષ્ટ્રપતિ ઝેલેન્સકી અને રશિયન રાષ્ટ્રપતિ વ્લાદિમીર પુતિન સાથે બેઠક યોજી હતી. ઝેલેન્સકીએ ટ્રમ્પ દ્વારા રજૂ કરાયેલી યુદ્ધવિરામ અને સામ-સામેની શાંતિ વાટાઘાટોને સ્વીકાર્યા હતા, પરંતુ પુતિને આ પ્રસ્તાવને નકારી કાઢ્યો હતો.
બીજી તરફ, આંતરરાષ્ટ્રીય રાજકીય ગતિવિધિઓ પણ આ યુદ્ધને વધુ જટિલ બનાવી રહી છે. તાજેતરમાં ચીનમાં યોજાયેલા શાંઘાઈ સહયોગ સંગઠન (SCO)ના સંમેલનમાં પુતિને ચીનના પ્રમુખ શી જિનપિંગ, ઉત્તર કોરિયાના નેતા કિમ જોંગ ઉન અને ભારતના વડાપ્રધાન નરેન્દ્ર મોદી સાથે મુલાકાત કરી હતી. વોશિંગ્ટનનો આક્ષેપ છે કે ચીન અને ભારત રશિયન ક્રૂડ તેલની ખરીદી કરીને પરોક્ષ રીતે રશિયાના યુદ્ધ અર્થતંત્રને મજબૂત કરી રહ્યા છે, જ્યારે ઉત્તર કોરિયા હથિયારોની સપ્લાય દ્વારા રશિયાને સીધી મદદ કરી રહ્યો છે. આ પરિસ્થિતિ વચ્ચે, ઝેલેન્સકીએ પોતાના સંબોધનમાં સ્પષ્ટ જણાવ્યું કે રશિયન હુમલાઓમાં સતત વધારો થઈ રહ્યો છે, જેમાં હવે દિવસ દરમિયાન થતા ડ્રોન હુમલાઓનો પણ સમાવેશ થાય છે. તેમણે પશ્ચિમી દેશો તથા સાથી રાષ્ટ્રોને અપીલ કરી છે કે તેઓ વધુ કડક પ્રતિબંધો અને લશ્કરી સહાયતા દ્વારા યુક્રેનને ટેકો આપે, જેથી રશિયાના આક્રમણનો અસરકારક જવાબ આપી શકાય.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
