નર્મદા જિલ્લામાં કાયદો અને વ્યવસ્થાની પરિસ્થિતિ શાંતિપૂર્ણ જળવાઈ રહે તે હેતુસર આજે જિલ્લા કલેક્ટર ગંગા સિંગની અધ્યક્ષતામાં કલેક્ટર કચેરીના કોન્ફરન્સ હોલ ખાતે કાયદો અને વ્યવસ્થાની માસિક સમીક્ષા બેઠક યોજાઈ હતી. બેઠકમાં વિવિધ વિભાગોના અધિકારીઓ તથા પોલીસ વિભાગના ઉચ્ચ અધિકારીઓ ઉપસ્થિત રહ્યા હતા.
બેઠક દરમિયાન જિલ્લામાં કાયદો અને વ્યવસ્થાની સ્થિતિ અંગે વિસ્તૃત સમીક્ષા કરવામાં આવી હતી. પોલીસ વિભાગ દ્વારા ભારતીય નાગરિક સુરક્ષા સંહિતા (BNSS)ની વિવિધ કલમો હેઠળ હાથ ધરાતી કામગીરી અંગે વિગતવાર માહિતી રજૂ કરવામાં આવી હતી. જેમાં અટકાયતી પગલાં, સભા-સરઘસ દરમિયાન કાયદો અને વ્યવસ્થા જળવાઈ રહે તે માટે કરવામાં આવતી કાર્યવાહી, ચેપ્ટર કેસ, જમીન માપણી દરમિયાન ઉભા થતા વિવાદો, પાણીની તકરાર તેમજ માનવ અધિકાર ભંગ સંબંધિત પ્રશ્નોની સમીક્ષા કરવામાં આવી હતી.
ઉપરાંત જિલ્લામાં દારૂબંધી અધિનિયમ હેઠળ કરવામાં આવતી કાર્યવાહી, અકસ્માતે મોતના બનાવોમાં હાથ ધરાતી કાયદેસરની પ્રક્રિયા, તડીપારના કેસો, નવીન હથિયારના પરવાના તેમજ પેટ્રોલ અને એક્સપ્લોઝિવ્સના લાઈસન્સ બાબતો અંગે પણ ચર્ચા કરવામાં આવી હતી. ઔદ્યોગિક વિસ્તારોમાં મજૂરો સંબંધિત પ્રશ્નો, વોરંટ બજવણીની કામગીરી તથા વિવિધ કેસોની હાલની સ્થિતિ અંગે અધિકારીઓએ માહિતી આપી હતી.
બેઠક દરમિયાન જિલ્લામાં વસવાટ કરતા પાકિસ્તાન અને બાંગ્લાદેશના નાગરિકોની વિગતો તથા તેમની સંદર્ભિત કાર્યવાહી, પાસા હેઠળની દરખાસ્તોની સ્થિતિ અને સંવેદનશીલ વિસ્તારોમાં કાયદો અને વ્યવસ્થા જાળવવા માટેના પગલાં અંગે પણ ચર્ચા કરવામાં આવી હતી.
જિલ્લા કલેક્ટર ગંગા સિંગે બેઠક દરમિયાન સ્પષ્ટ સૂચના આપી હતી કે, સમગ્ર જિલ્લામાં સુલેહ-શાંતિ અને સામાજિક સૌહાર્દનું વાતાવરણ જળવાઈ રહે તે માટે તમામ વિભાગોએ સંકલનથી કામગીરી કરવી જરૂરી છે. જ્યાં કાયદેસરની કાર્યવાહી કરવાની જરૂર જણાય ત્યાં ત્વરિત અને અસરકારક પગલાં લેવામાં આવે તેમજ લોકોમાં સુરક્ષાની ભાવના મજબૂત બને તે દિશામાં કામગીરી કરવા પર ભાર મૂક્યો હતો.
ઉક્ત બેઠકમાં નિવાસી અધિક કલેક્ટર સી.કે.ઉંધાડ, નાંદોદના પ્રાંત અધિકારી પરસનજીત કૌર, નાયબ પોલીસ અધિક્ષક સર્વ પી.આર.પટેલ, રાજેન્દ્ર દેવધા, સંજય શર્મા સહિત સંબંધિત વિભાગોના અધિકારીઓ ઉપસ્થિત રહ્યા હતા.
શૈશવ રાવ નર્મદા
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
