વાણિજ્ય વિભાગની સંસદીય સ્થાયી સમિતિના સભ્યઓએ તેમના ગુજરાત પ્રવાસ દરમિયાન નર્મદા જિલ્લાના એકતાનગર સ્થિત વિશ્વવિખ્યાત સ્ટેચ્યુ ઓફ યુનિટી તથા સરદાર સરોવર નર્મદા ડેમની મુલાકાત લીધી હતી. ડોલા સેનની અધ્યક્ષતામાં બનેલી ૧૫ સભ્યોની પાર્લામેન્ટરી સ્ટેન્ડિંગ કમિટીના સભ્યો પૈકી સાંસદ બિસ્વજીત સિન્હા, સાંસદ અતુલ ગર્ગ, સાંસદ અનિતા શુભ્રદાશીની અને નાયબ સચિવ રોઝી શેઈલો દામોદર એ વિવિધ વિકાસલક્ષી પ્રકલ્પો અને પર્યટન સુવિધાઓ અંગે વિસ્તૃત માહિતી મેળવી હતી.
મુલાકાત દરમિયાન કમિટીના સભ્યઓએ સ્ટેચ્યુ ઓફ યુનિટી ખાતે પહોંચીને લોખંડી પુરુષ સરદાર વલ્લભભાઈ પટેલના ચરણોમાં પુષ્પાંજલિ અર્પણ કરી હતી. તેમણે રાષ્ટ્રની એકતા અને અખંડિતતા માટે સરદાર સાહેબે આપેલા અમૂલ્ય યોગદાનને યાદ કરી તેમના પ્રત્યે કૃતજ્ઞતા વ્યક્ત કરી હતી.
ત્યારબાદ કમિટીના સભ્યઓએ સ્ટેચ્યુ ઓફ યુનિટીની હૃદયસ્થળે આવેલી વ્યૂઇંગ ગેલેરીની મુલાકાત લીધી હતી. અહીંથી તેમણે પવિત્ર નર્મદા નદી, સાતપુડા અને વિંધ્યાચળની ગિરિમાળાઓ તેમજ સરદાર સાહેબના સ્વપ્ન સમાન સરદાર સરોવર નર્મદા ડેમના મનોહર અને વિહંગમ દૃશ્યોનું અવલોકન કર્યું હતું. આ અદભૂત દૃશ્યો નિહાળી સભ્યઓ અત્યંત પ્રભાવિત અને ગદગદિત બન્યા હતા.
બાદમાં કમિટીના સભ્યઓએ સરદાર સરોવર નર્મદા ડેમની મુલાકાત લઈ ડેમની વિશાળતા, જળસંગ્રહ ક્ષમતા, રાજ્ય તથા દેશના વિવિધ વિસ્તારોમાં પીવાના પાણી અને સિંચાઈ માટે તેની ઉપયોગિતા તેમજ નર્મદા યોજનાના સર્વાંગી વિકાસલક્ષી પ્રભાવ અંગે વિગતવાર માહિતી મેળવી હતી. અધિકારીઓ દ્વારા ડેમના સંચાલન, જળવ્યવસ્થાપન અને પ્રદેશના આર્થિક-સામાજિક વિકાસમાં તેની મહત્વપૂર્ણ ભૂમિકા અંગે માર્ગદર્શન આપવામાં આવ્યું હતું.
આ મુલાકાત દરમિયાન સ્ટેચ્યુ ઓફ યુનિટીના અધિક કલેક્ટર ગોપાલ બામણીયા, નાયબ કલેક્ટર સર્વ પ્રિતેશ પટેલ અને અભિષેક સિન્હા તથા જિલ્લા વહીવટી તંત્રના વરિષ્ઠ અધિકારીઓ ઉપસ્થિત રહ્યા હતા. તેમણે કમિટીના સભ્યઓને વિવિધ સુવિધાઓ, પર્યટન વિકાસ, પર્યાવરણ સંરક્ષણ અને વિસ્તારના સર્વાંગી વિકાસ અંગે માહિતગાર કર્યા હતા.
પાર્લામેન્ટરી સ્ટેન્ડિંગ કમિટીના સભ્યઓએ એકતા નગર ખાતે વિકસાવવામાં આવેલી વિશ્વસ્તરીય પર્યટન સુવિધાઓ, સુવ્યવસ્થિત આયોજન તથા વિકાસ કાર્યોની પ્રશંસા કરી હતી. તેમણે સ્ટેચ્યુ ઓફ યુનિટી અને સરદાર સરોવર ડેમને રાષ્ટ્રીય ગૌરવના પ્રતિકો ગણાવી દેશના વિકાસ અને એકતાના સંદેશને વધુ મજબૂત બનાવતા પ્રકલ્પો તરીકે બિરદાવ્યા હતા.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
