અમદાવાદના ગુજરાત યુનિવર્સિટી વિસ્તાર પાસે આવેલી GLS કોલેજ નજીક વિદ્યાર્થી પર થયેલા હુમલા મામલે પોલીસે મોટી સફળતા મેળવી છે. નવરંગપુરા પોલીસે મુખ્ય આરોપી આદિત્ય રાઠોડને ધરપકડ કરી લીધી છે. આરોપીને ઝડપી પાડ્યા બાદ પોલીસે ઘટનાસ્થળે તેનું રિકન્સ્ટ્રક્શન પંચનામું કરીને વધુ કાયદેસરની કાર્યવાહી હાથ ધરી છે.
મળતી માહિતી અનુસાર, આ ઘટના ગત 9 ફેબ્રુઆરીના રોજ બપોરના સમયે બની હતી. પીડિત વિદ્યાર્થી પોતાની કારમાં બેઠો હતો ત્યારે 19 વર્ષીય આદિત્ય રાઠોડ અને તેના બે સાથીઓ કાર અને મોપેડ પર આવી અચાનક હુમલો કર્યો હતો. આરોપીઓએ હથિયારો વડે કારના કાચ તોડી નાખ્યા હતા અને પીડિતના ગળા પર ચાકુથી હુમલો કરવાનો પ્રયાસ કર્યો હતો. સદનસીબે, આ હુમલામાં મોટી જાનહાનિ ટળી હતી.
પોલીસની પ્રાથમિક તપાસ મુજબ, આ હુમલો સામાન્ય બોલાચાલી બાદ ઉશ્કેરાઈને કરવામાં આવ્યો હતો અને કોઈ જૂની દુશ્મનાવટ હજુ સુધી સામે આવી નથી. ઘટનાના બાદ મુખ્ય આરોપી છેલ્લા બે મહિનાથી ફરાર હતો.
ઝોન-1 LCBની ટીમને મળેલી બાતમીના આધારે પોલીસે ઓપરેશન હાથ ધર્યું હતું. માહિતી મુજબ, આરોપી ગાંધીનગરના PDPU કેમ્પસ નજીક આવતો હતો. આ માહિતીના આધારે પોલીસે ઘેરાબંધી કરીને આદિત્ય રાઠોડને ઝડપી પાડ્યો હતો.
ઈન્ચાર્જ PI જે. પી. ચૌધરીએ જણાવ્યું કે ઘટનાની ગંભીરતાને ધ્યાનમાં રાખીને આરોપી સામે હત્યાના પ્રયાસનો ગુનો નોંધવામાં આવ્યો છે. હાલમાં આરોપી પોલીસ કસ્ટડીમાં છે અને તેના રિકન્સ્ટ્રક્શન પંચનામાની કાર્યવાહી ચાલી રહી છે. આ કેસમાં સંડોવાયેલા અન્ય બે ફરાર આરોપીઓને ઝડપી પાડવા માટે પોલીસ તંત્ર સક્રિય બન્યું છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
