રોડ પર કચરો ફેંકતા કે થૂંકતા અમદાવાદીઓ સુધરી જજો, આસપાસના લોકો જ ફોટો પાડીને મોકલી દેશે…

ગિફ્ટ વાઉચર આપવામાં આવશે

રસ્તામાં કચરો ફેંકનારા કે કાર-બાઇકમાંથી થૂંકનારા લોકોનો ફોટો કોઈપણ નાગરિક ખેંચી લઈ કોર્પોરેશનની અમદાવાદ કેમ એપ્લિકેશનમાં અપલોડ કરી શકશે. શહેરને સ્વચ્છ રાખવામાં યોગદાન આપનારા લોકોને પ્રોત્સાહન મળે તે માટે ફોટો અપલોડ કરનારા લોકોને જાણીતી બ્રાન્ડના ગિફ્ટ વાઉચર અપાશે. આ ગિફ્ટ વાઉચરના ઉપયોગથી લોકો નક્કી કરેલા માર્કેટમાંથી વાઉચરની રકમ મુજબ ફ્રીમાં ખરીદી કરી શકશે. આ એપ્લિકેશન અંતિમ તબક્કામાં છે અને આગામી મહિને લોન્ચ કરવામાં આવશે. ચાલુ કારમાંથી પણ કોઈ થૂંકશે તો નંબર પ્લેટના આધારે તેના ઘરે કોર્પોરેશન નોટિસ મોકલશે અને દંડ વસૂલ કરશે.

✅ નાગરિકો હવે રસ્તામાં કચરો ફેંકનારા અથવા જાહેરમાં થૂંકનારા લોકોના ફોટા એપમાં અપલોડ કરી શકશે.
✅ શહેરને સ્વચ્છ રાખવામાં યોગદાન આપનારા લોકોને જાણીતી બ્રાન્ડના ગિફ્ટ વાઉચર અપાશે.
✅ ગિફ્ટ વાઉચર દ્વારા નક્કી કરેલા માર્કેટમાંથી ફ્રીમાં ખરીદી કરવાની તક.
✅ કોઈ કાર કે બાઈકમાંથી થૂંકશે તો, નંબર પ્લેટના આધારે નોટિસ મોકલાશે અને દંડ વસૂલ થશે.

આ એપ્લિકેશન ટૂંક સમયમાં લોન્ચ થશે, અને શહેરના સ્વચ્છતા અભિયાનમાં નાગરિકો મહત્વની ભૂમિકા ભજવી શકશે.

મોટી શોપિંગ કંપનીઓ સાથે કોર્પોરેશન કરશે એમઓયુ

હાલ કોર્પોરેશન દ્વારા જાહેરમાં ગંદકી કરનારા લોકો સામે ખાસ અભિયાન શરૂ કરવામાં આવ્યું છે. જેના ભાગરૂપે વિવિધ વિસ્તારોમાં ગંદકી કરતી દુકાનો, રેસ્ટોરંટ કે હોટેલોને દંડ કરવામાં આવે છે. આ ઉપરાંત જાહેરમાં ગંદકી કરતા લોકો પાસેથી પણ સ્થળ પર જ દંડ વસૂલવામાં આવે છે. પરંતુ આ અભિયાનમાં જનભાગીદારી વધે તે માટે ટેકનોલોજીનો ઉપયોગ કરવામાં આવશે. લોકોને પણ આ પ્રવૃત્તિથી ફાયદો થાય તે માટે વિવિધ મોટી શોપિંગ કંપનીઓ સાથે પણ કોર્પોરેશન એમઓયુ કરી શકે છે.

રોંગ સાઈડમાં આવતા વાહનો, ગંદકી, કચરો સહિતના મુદ્દાઓ આવરી લેવામાં આવ્યા છે. લોકો જ્યાંથી પણ ફોટો લેશે તેમાં જીઓ ટેગિંગથી ઓટોમેટિક લોકેશન આવશે. જેથી લોકોએ અલગથી એડ્રેસ આપવાની જરૂર રહેશે નહીં. દંડની રકમ માટે આરટીઓને પણ આ અભિયાનમાં જોડવામાં આવશે. જેથી નિયમનો ભંગ કરનારા વાહન ચાલકોના ઘરે નોટિસ મોકલી શકાશે.