અમેરિકાના રાષ્ટ્રપતિ ડોનાલ્ડ ટ્રમ્પે ઓવલ ઑફિસમાંથી આપેલા આક્રમક નિવેદન બાદ અમેરિકા-ઈરાન વચ્ચે તણાવ ફરી ચરમસીમાએ પહોંચી ગયો છે. ટ્રમ્પે ચેતવણી આપી છે કે બંને દેશો વચ્ચેનો યુદ્ધવિરામ હાલ ‘લાઇફ સપોર્ટ’ પર છે અને ગમે ત્યારે તૂટી શકે છે.
8 એપ્રિલથી અમલમાં આવેલા યુદ્ધવિરામને લઈને અનિશ્ચિતતા વધી ગઈ છે. ઈરાને અમેરિકાના પ્રસ્તાવને ફગાવી દીધો હતો અને પાકિસ્તાન મારફતે પોતાનો પ્રસ્તાવ મોકલ્યો હતો. તેમાં લેબનોન સહિતના મોરચાઓ પર યુદ્ધનો અંત લાવવાની માંગ સાથે સ્ટ્રેટ ઑફ હોર્મુઝ પર સાર્વભૌમત્વ, યુદ્ધના નુકસાનનું વળતર અને અમેરિકી નૌકાબંધી દૂર કરવાની શરતો મૂકવામાં આવી હતી.
ટ્રમ્પનો કડક અભિગમ
ટ્રમ્પે ઈરાનના જવાબને ‘તદ્દન અસ્વીકાર્ય’ ગણાવતા કહ્યું કે તેમણે આ પત્ર પૂરો વાંચ્યો પણ નથી. તેમણે કહ્યું, “હું એ કચરો વાંચવામાં મારો સમય બગાડવા માંગતો નથી.” ટ્રમ્પે દાવો કર્યો કે ઈરાન પાસે કોઈ વિકલ્પ નથી અને તેને હરાવી દેવામાં આવ્યું છે.
તેમણે યુદ્ધવિરામની સ્થિતિને સમજાવતા કહ્યું કે આ એવી સ્થિતિ છે જ્યાં બચવાની શક્યતા માત્ર 1% હોય. આ નિવેદનથી સ્પષ્ટ થાય છે કે અમેરિકા હાલ કડક વલણ અપનાવી રહ્યું છે.
પરમાણુ મુદ્દો સૌથી મોટો વિવાદ
અમેરિકાનો મુખ્ય મુદ્દો ઈરાનનો પરમાણુ કાર્યક્રમ છે. ટ્રમ્પે સ્પષ્ટ કર્યું કે ઈરાનને ક્યારેય પરમાણુ હથિયાર બનાવવાની મંજૂરી નહીં આપવામાં આવે અને આ મુદ્દે કોઈ સમાધાન શક્ય નથી.
મધ્યસ્થી પ્રયાસો નિષ્ફળ?
પાકિસ્તાન ઈરાન અને અમેરિકા વચ્ચે મધ્યસ્થી કરવાનો પ્રયાસ કરી રહ્યું છે. દક્ષિણ કોરિયા અને તૂર્કી પણ રાજદ્વારી ઉકેલ માટે પ્રયત્નશીલ છે, પરંતુ અત્યાર સુધી કોઈ સ્પષ્ટ સફળતા મળી નથી.
વિશ્લેષકોના મતે, ટ્રમ્પની આક્રમક ભાષા અને ઈરાનની અડગ સ્થિતિને કારણે રાજદ્વારી વાતચીત અટકી ગઈ છે અને ફરી એકવાર મોટા પાયે સૈન્ય સંઘર્ષની શક્યતા વધી રહી છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
