રાજ્યના શ્રમિકો અને તેમના પરિવારોને આરોગ્ય તથા સામાજિક સુરક્ષાની વધુ સારી સુવિધાઓ ઉપલબ્ધ કરાવવાની દિશામાં મહત્વપૂર્ણ નિર્ણય લેવામાં આવ્યો છે. ગાંધીનગર સચિવાલય ખાતે શ્રમ અને રોજગાર મંત્રી તેમજ ESIC પ્રાદેશિક બોર્ડના ચેરમેન કુંવરજીભાઈ બાવળીયાના અધ્યક્ષસ્થાને કર્મચારી રાજ્ય વીમા નિગમ (ESIC)ની 94મી પ્રાદેશિક બોર્ડ બેઠક યોજાઈ હતી. બેઠકમાં રાજ્ય મંત્રી કાંતિલાલ અમૃતિયા વિશેષ ઉપસ્થિત રહ્યા હતા.
ગુજરાતમાં 21.68 લાખથી વધુ વીમાધારકો
શ્રમ અને રોજગાર મંત્રી કુંવરજીભાઈ બાવળીયાએ જણાવ્યું કે, 31 માર્ચ 2026ની સ્થિતિએ ગુજરાતમાં ESIC યોજના હેઠળ આશરે 21.68 લાખથી વધુ વીમાધારકો અને અંદાજે 84 લાખ લાભાર્થીઓને આવરી લેવામાં આવ્યા છે.
રાજ્યમાં ઔદ્યોગિક વિકાસની સાથે રોજગારીની તકોમાં પણ સતત વધારો થઈ રહ્યો છે. તેને ધ્યાનમાં રાખીને આગામી સમયમાં ગુજરાતના વધુ અંદાજે 8 લાખ કામદારોને ESICના સામાજિક સુરક્ષા કવચ હેઠળ આવરી લેવાની યોજના છે.
68થી વધુ ખાનગી હોસ્પિટલો ESIC પેનલમાં સામેલ
શ્રમિકો અને તેમના પરિવારજનોને ઝડપી અને ગુણવત્તાયુક્ત કેશલેસ સારવાર મળી રહે તે માટે ESICના હોસ્પિટલ નેટવર્કનો પણ વિસ્તાર કરવામાં આવ્યો છે.
મંત્રીના જણાવ્યા અનુસાર, છેલ્લા બે મહિનામાં રાજ્યની 68થી વધુ ખાનગી હોસ્પિટલોને ESICની પેનલમાં સામેલ કરવામાં આવી છે. આ પગલાથી ESICના લાભાર્થીઓને આરોગ્ય સેવાઓ વધુ સરળતાથી ઉપલબ્ધ થવાની અપેક્ષા છે.
રાજ્ય સરકાર દ્વારા શ્રમિકો અને તેમના પરિવારોને આરોગ્ય સેવાઓ, સામાજિક સુરક્ષા તથા વિવિધ કલ્યાણકારી યોજનાઓનો લાભ સરળતાથી મળી રહે તે માટે કામગીરી કરવામાં આવી રહી હોવાનું પણ બેઠકમાં જણાવાયું હતું.
દર ત્રણ મહિને યોજાશે બોર્ડ બેઠક
કુંવરજીભાઈ બાવળીયાએ જણાવ્યું કે, હવે દર ત્રણ મહિને પ્રાદેશિક બોર્ડની બેઠક યોજીને શ્રમિક કલ્યાણ, આરોગ્ય સેવાઓ અને સામાજિક સુરક્ષા સંબંધિત વિવિધ મુદ્દાઓની સમીક્ષા કરવામાં આવશે.
બે બેઠકો વચ્ચે શ્રમિકો તરફથી રજૂ થતી માંગણીઓ અને પ્રશ્નોનું પણ સમયબદ્ધ અને ઝડપી નિરાકરણ લાવવા માટે જરૂરી કાર્યવાહી કરવામાં આવશે.
ESIC સ્ટેટ સોસાયટીની રચના અંગે ચર્ચા
બેઠકમાં અગાઉ યોજાયેલી 93મી પ્રાદેશિક બોર્ડ બેઠકની કામગીરી અને અહેવાલ પણ રજૂ કરવામાં આવ્યો હતો. આ ઉપરાંત ESIC સાથે જોડાયેલા અનેક મહત્વપૂર્ણ વહીવટી અને માળખાકીય મુદ્દાઓ પર ચર્ચા કરવામાં આવી હતી.
પ્રાદેશિક બોર્ડનું પુનર્ગઠન, કો-ઓપ્ટ સભ્યોનું નામાંકન, ગુજરાતમાં ESIC સ્ટેટ સોસાયટીની રચના તેમજ હોસ્પિટલ માટે યોગ્ય જમીનની ફાળવણી સહિતના મુદ્દાઓ પર વિસ્તૃત વિચાર-વિમર્શ કરવામાં આવ્યો હતો.
શ્રમિકોના સ્વાસ્થ્ય અને સામાજિક સુરક્ષા પર ભાર
94મી પ્રાદેશિક બોર્ડ બેઠકમાં શ્રમિકો તથા તેમના પરિવારોને ગુણવત્તાયુક્ત તબીબી સેવાઓ સરળતાથી મળી રહે તેના પર વિશેષ ભાર મૂકવામાં આવ્યો હતો. ESIC હેઠળ વધુ કામદારોને આવરી લેવા અને ખાનગી હોસ્પિટલોના નેટવર્કમાં વધારો કરવાથી રાજ્યના શ્રમિકોને સામાજિક સુરક્ષા અને આરોગ્ય સેવાઓનો વ્યાપક લાભ મળવાની અપેક્ષા છે.
ESIC અમદાવાદના પ્રાદેશિક નિયામક હેમંતકુમાર પાંડેએ બેઠકમાં ઉપસ્થિત મહાનુભાવોનું સ્વાગત કરીને કાર્યક્રમની રૂપરેખા રજૂ કરી હતી.
બેઠકમાં પશ્ચિમ ક્ષેત્રના વીમા આયુક્ત રત્નેશકુમાર ગૌતમ, તબીબી સેવાઓના અધિક સચિવ મનીષ મોદી, ઔદ્યોગિક સલામતી અને આરોગ્ય નિયામક પી.એમ. શાહ, રાજ્ય ચિકિત્સા અધિકારી ડૉ. વિજયકુમાર ધાણક, SOHMના ચેરમેન, ભારતીય મજદૂર સંઘના પ્રતિનિધિઓ, એમ્પ્લોયર પ્રતિનિધિઓ, ESIC સંલગ્ન હોસ્પિટલોના ડીન અને મેડિકલ સુપરિન્ટેન્ડેન્ટ સહિત શ્રમ અને રોજગાર વિભાગ તથા ESICના ઉચ્ચ અધિકારીઓ ઉપસ્થિત રહ્યા હતા.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
