ગુજરાતમાં ઉદ્યોગોના સાતત્યપૂર્ણ વિકાસ અને શ્રમિકોના સર્વાંગી કલ્યાણને સુનિશ્ચિત કરવાના હેતુથી ગાંધીનગર ખાતે નવા શ્રમ કાયદાઓ અંગે જાગૃતિ કાર્યક્રમ યોજાયો હતો. શ્રમ અને રોજગાર મંત્રી કુંવરજીભાઈ બાવળીયાની અધ્યક્ષતામાં અને શ્રમ અને રોજગાર રાજ્યમંત્રી કાંતિલાલ અમૃતિયાની વિશેષ ઉપસ્થિતિમાં યોજાયેલા કાર્યક્રમમાં નવા લેબર કોડ્સ, શ્રમિક સુરક્ષા, સામાજિક સુરક્ષા, ઔદ્યોગિક શાંતિ અને ડિજિટાઈઝેશન સહિતના મુદ્દાઓ પર ચર્ચા કરવામાં આવી હતી.
કાર્યક્રમમાં ઉદ્યોગો અને શ્રમિકો વચ્ચે પરસ્પર વિશ્વાસ અને સહકાર વધારી ગુજરાતના ઔદ્યોગિક વિકાસને વધુ ગતિ આપવા પર ભાર મૂકવામાં આવ્યો હતો. ઉદ્યોગોની પ્રગતિની સાથે શ્રમિકોની સલામતી, આરોગ્ય અને કલ્યાણ પણ સુનિશ્ચિત થાય તે માટે નવા શ્રમ કાયદાઓની વિવિધ જોગવાઈઓ અંગે માર્ગદર્શન આપવામાં આવ્યું હતું.
29 જૂના કાયદાઓને સંકલિત કરીને 4 નવા લેબર કોડ્સ
કાર્યક્રમ દરમિયાન જણાવવામાં આવ્યું કે કેન્દ્ર સરકારે શ્રમ ક્ષેત્ર સાથે સંકળાયેલા 29 કેન્દ્રીય શ્રમ કાયદાઓને સંકલિત કરીને ચાર લેબર કોડ્સ તૈયાર કર્યા છે. તેમાં વેતન પરનો કોડ, ઔદ્યોગિક સંબંધોનો કોડ, સામાજિક સુરક્ષા પરનો કોડ અને વ્યવસાયિક સલામતી, આરોગ્ય અને કાર્યકારી પરિસ્થિતિઓનો કોડનો સમાવેશ થાય છે.
આ લેબર કોડ્સ દ્વારા અલગ-અલગ શ્રમ કાયદાઓની જટિલતા ઘટાડીને નિયમો અને કમ્પ્લાયન્સને વધુ સરળ બનાવવાનો હેતુ છે. સાથે જ શ્રમિકોના વેતન, સામાજિક સુરક્ષા, કાર્યસ્થળની સલામતી અને ઔદ્યોગિક સંબંધો જેવા મહત્વપૂર્ણ ક્ષેત્રોને આવરી લેવામાં આવ્યા છે.
નવા શ્રમ કાયદા ઉદ્યોગો અને શ્રમિકો બંને માટે હિતકારી: કુંવરજી બાવળીયા
શ્રમ અને રોજગાર મંત્રી કુંવરજી બાવળીયાએ કાર્યક્રમને સંબોધતાં જણાવ્યું હતું કે વર્ષોથી અમલમાં રહેલા વિવિધ જટિલ કાયદાઓને સંકલિત કરીને તૈયાર કરવામાં આવેલા ચાર નવા શ્રમ કાયદાઓ ઉદ્યોગપતિઓ અને શ્રમયોગીઓ બંને માટે હિતકારી સાબિત થશે.
તેમણે જણાવ્યું કે કોઈપણ ઉદ્યોગની સફળતા પાછળ શ્રમિકોનો પરસેવો અને પરિશ્રમ મહત્વની ભૂમિકા ભજવે છે. તેથી ઉદ્યોગપતિઓએ શ્રમિકોને પોતાના પરિવારના સભ્ય સમાન ગણી તેમની સલામતી અને આરોગ્યની ચિંતા કરવી જોઈએ. જ્યારે શ્રમિકોએ પણ સંપૂર્ણ નિષ્ઠાથી કામગીરી કરીને સંસ્થાની પ્રગતિમાં યોગદાન આપવું જોઈએ.
નવા શ્રમ કાયદાઓમાં શ્રમિકોની સલામતી, કાર્યસ્થળે યોગ્ય વાતાવરણ, શુદ્ધ પીવાનું પાણી, યોગ્ય વેતન અને સામાજિક સુરક્ષા જેવા મુદ્દાઓને મહત્વ આપવામાં આવ્યું હોવાનું તેમણે જણાવ્યું હતું.
‘ઉદ્યોગ અને શ્રમિકો એક સિક્કાની બે બાજુ’
શ્રમ અને રોજગાર રાજ્યમંત્રી કાંતિલાલ અમૃતિયાએ ઉદ્યોગ અને શ્રમિકોને ‘એક સિક્કાની બે બાજુ’ ગણાવ્યાં હતાં. તેમણે જણાવ્યું કે બંનેના પરસ્પર સહયોગથી જ ઔદ્યોગિક વિકાસને વધુ વેગ મળી શકે છે.
ઉદ્યોગો અને શ્રમિકો વચ્ચે નિયમિત સંવાદ, પરસ્પર સમજણ અને સહકાર જળવાઈ રહે તો રાજ્યમાં ઔદ્યોગિક શાંતિ મજબૂત બની શકે છે. સાથે જ શ્રમિકોના હિત અને ઉદ્યોગોના વિકાસ વચ્ચે યોગ્ય સંતુલન જાળવી શકાય છે.
શ્રમ વિભાગની સેવાઓના ડિજિટાઈઝેશન પર ભાર
શ્રમ, કૌશલ્ય વિકાસ અને રોજગાર વિભાગના સચિવ લોચન સહેરાએ નવા શ્રમ કાયદાઓ અંગે વિગતવાર માહિતી આપી હતી. તેમણે જણાવ્યું કે નવા કાયદાઓનો એક મહત્વપૂર્ણ હેતુ ઉદ્યોગો માટે Compliance Processને સરળ બનાવવાનો છે.
નાના પ્રકારના ગુનાઓમાં ફોજદારી જોગવાઈઓને બદલે સમાધાનકારી પ્રક્રિયા તરફ આગળ વધવા અને સમગ્ર સિસ્ટમમાં વધુ પારદર્શિતા લાવવાનો પ્રયાસ કરવામાં આવ્યો છે.
શ્રમ વિભાગની સેવાઓને આગામી સમયમાં વધુ વ્યાપક રીતે ઓનલાઈન પોર્ટલ સાથે જોડીને અરજીઓ અને વિવિધ પ્રક્રિયાઓને પારદર્શક તથા સરળ બનાવવાની દિશામાં કામગીરી કરવામાં આવી રહી હોવાનું પણ જણાવાયું હતું.
ઔદ્યોગિક અકસ્માતો ઘટાડવા Safety Rulesનું પાલન જરૂરી
ગુજરાત દેશના અગ્રણી ઔદ્યોગિક રાજ્યો પૈકીનું એક છે. રાજ્યમાં મોટા ઉદ્યોગોથી લઈને MSME એકમોમાં મોટી સંખ્યામાં શ્રમિકો કામ કરે છે. આવી સ્થિતિમાં ઔદ્યોગિક અકસ્માતો અટકાવવા માટે કાર્યસ્થળે સુરક્ષાના નિયમોનું ચુસ્ત પાલન કરવું જરૂરી હોવાનું કાર્યક્રમમાં જણાવવામાં આવ્યું હતું.
કામદારોને યોગ્ય સુરક્ષા સાધનો ઉપલબ્ધ કરાવવા, જોખમી કામગીરી માટે જરૂરી તાલીમ આપવા અને કાર્યસ્થળની નિયમિત સલામતી તપાસ કરવા જેવા પગલાં પર પણ ભાર મૂકવામાં આવ્યો હતો.
‘નમો ગુજરાત કૌશલ્ય અને રોજગાર મિશન’થી શ્રમિકોના Skill Development પર ભાર
શ્રમિકો અને યુવાનોને ઉદ્યોગોની જરૂરિયાત મુજબ તાલીમ આપીને રોજગારક્ષમ બનાવવા માટે રાજ્ય સરકાર દ્વારા ‘નમો ગુજરાત કૌશલ્ય અને રોજગાર મિશન’ શરૂ કરવામાં આવ્યું હોવાનું કાર્યક્રમમાં જણાવાયું હતું.
આ મિશન અંતર્ગત આપવામાં આવતી તાલીમનો ખર્ચ રાજ્ય સરકાર દ્વારા ઉઠાવવામાં આવે છે. તેનો હેતુ યુવાનોને નવી ટેક્નોલોજી અને ઉદ્યોગોની જરૂરિયાત અનુસાર કૌશલ્યવાન બનાવી વધુ સારી રોજગારીની તકો સાથે જોડવાનો છે.
PM-SETU હેઠળ ITIના આધુનિકીકરણમાં ઉદ્યોગોનો સહયોગ
કેન્દ્ર સરકારની PM-SETU યોજના હેઠળ ITIના આધુનિકીકરણ માટે ઉદ્યોગોના સહયોગને પણ મહત્વ આપવામાં આવી રહ્યું છે. ઉદ્યોગોની જરૂરિયાત અને તાલીમ વચ્ચેનું અંતર ઘટાડીને વિદ્યાર્થીઓને રોજગારલક્ષી કૌશલ્ય ઉપલબ્ધ કરાવવાનો પ્રયાસ કરવામાં આવી રહ્યો છે.
ઉદ્યોગો સાથે ભાગીદારી દ્વારા ITIમાં આધુનિક ટેક્નોલોજી અને તાલીમ વ્યવસ્થા વિકસાવવાથી વિદ્યાર્થીઓને ઉદ્યોગોની વાસ્તવિક જરૂરિયાત પ્રમાણે તૈયાર કરવામાં મદદ મળશે.
ઉદ્યોગ સંગઠનો અને અધિકારીઓ રહ્યા ઉપસ્થિત
ગાંધીનગર ખાતે યોજાયેલા આ જાગૃતિ કાર્યક્રમમાં ઔદ્યોગિક સલામતી અને આરોગ્ય નિયામક પી.એમ. શાહ, અધિક લેબર કમિશનર એમ.સી. કારિયા સહિત શ્રમ આયુક્ત કચેરીના અધિકારીઓ અને વિવિધ ઇન્ડસ્ટ્રી એસોસિએશનના પ્રતિનિધિઓ ઉપસ્થિત રહ્યા હતા.
કાર્યક્રમનો મુખ્ય ઉદ્દેશ નવા શ્રમ કાયદાઓ અંગે ઉદ્યોગો અને સંબંધિત પક્ષોમાં જાગૃતિ વધારવાની સાથે ઉદ્યોગ અને શ્રમિકો વચ્ચે સહયોગ, સલામતી અને સામાજિક સુરક્ષાને વધુ મજબૂત કરવાનો રહ્યો હતો.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
