અમદાવાદ શહેરના હાટકેશ્વર વિસ્તારમાં ફિલ્મી ઢબે ચોરીની ઘટનાને અંજામ આપનાર 19 વર્ષીય યુવકને અમદાવાદ ક્રાઈમ બ્રાન્ચે ઝડપી લીધો છે. જ્વેલર્સની દુકાનમાં આધુનિક લોકિંગ સિસ્ટમ અને મજબૂત શટર હોવા છતાં, તેને અડ્યા વગર પાછળની દીવાલ તોડી ચોરી કરવામાં આવી હતી. પોલીસે આ અનોખી ચોરીનો ભેદ ઉકેલી રૂ. 1.75 લાખની કિંમતના ચાંદીના તમામ દાગીના જપ્ત કર્યા છે.
આ ચોરીની ઘટના 8 જાન્યુઆરીના રોજ વહેલી સવારે હાટકેશ્વર વિસ્તારમાં આવેલા સાગર એપાર્ટમેન્ટમાં સ્થિત એક સોનીની દુકાનમાં બની હતી. આરોપી અશ્વિન ખડીયાએ દુકાનના મુખ્ય દરવાજે લાગેલી લોખંડની જાળી કે શટરને નુકસાન પહોંચાડ્યા વિના, પાછળની દીવાલમાં બાકોરું પાડી અંદર પ્રવેશ કર્યો હતો. કડિયાકામમાં નિપુણ આરોપીએ ખૂબ જ સાવધાનીપૂર્વક દીવાલ તોડી ગણતરીની મિનિટોમાં ચાંદીના દાગીના ચોરી લીધા હતા.
૦૮ જાન્યુઆરી, ૨૦૨૬ની વહેલી સવારે અમદાવાદના હાટકેશ્વરના સાગર એપાર્ટમેન્ટમાં આવેલી એક જવેલર્સની દુકાનમાં એક ચોરે અત્યંત ચાલાકીપૂર્વક ચોરીને અંજામ આપ્યો હતો.
તેણે દુકાનના મજબૂત શટર કે આધુનિક લોક સિસ્ટમને અડવાને બદલે, પાછળની દિવાલમાં પોતાની કોઠાસૂઝથી 'બાકોરું' પાડી દીધું હતું. આ… pic.twitter.com/XS2eKJ2edJ
— Janak Dave (@dave_janak) January 17, 2026
ઘટનાની ગંભીરતા જોતા ક્રાઈમ બ્રાન્ચે તાત્કાલિક તપાસ શરૂ કરી હતી. શરૂઆતથી જ પોલીસને શંકા હતી કે આ કોઈ પ્રોફેશનલ ગેંગ નહીં, પરંતુ બાંધકામ અથવા કડિયાકામથી પરિચિત વ્યક્તિનું કામ હોઈ શકે. આ આધારે પોલીસે રામોલ કેનાલ અને જામફળવાડી વિસ્તારમાં ચાલી રહેલી વિવિધ કન્સ્ટ્રકશન સાઈટો પર ખાસ વોચ ગોઠવી હતી.
તપાસ દરમિયાન ક્રાઈમ બ્રાન્ચની ટીમે હાટકેશ્વરથી રામોલ સુધીના સેંકડો CCTV કેમેરાના ફૂટેજ તપાસ્યા હતા. ખાસ કરીને મોડી રાત્રે થેલો લઈને શંકાસ્પદ રીતે અવરજવર કરતા શખસો પર નજર રાખવામાં આવી હતી. બાતમીદારો અને ટેકનિકલ સર્વેલન્સની મદદથી આખરે જામફળવાડી ચાર રસ્તા નજીકથી આરોપી અશ્વિન ખડીયાને ઝડપી લેવામાં આવ્યો હતો.
આ કેસમાં પોલીસની સૌથી મોટી સફળતા એ રહી કે ચોરાયેલા તમામ દાગીના પૂર્ણ રૂપે રિકવર કરી લેવામાં આવ્યા છે. આ અંગે DCPએ જણાવ્યું હતું કે, “આરોપી પાસેથી ચોરીનો તમામ મુદ્દામાલ મળી આવ્યો છે, જેથી વેપારીને કોઈ આર્થિક નુકસાન ભોગવવું પડ્યું નથી.” હાલ ક્રાઈમ બ્રાન્ચે આરોપીની ધરપકડ કરીને કાયદેસરની કાર્યવાહી આગળ ધપાવી છે.
અમારી યુટ્યુબ ચેનલને લાઈક કરો, શેર કરો અને સબ્સ્ક્રાઇબ કરો
Like, Share and Subscribe our YouTube channel
