ગુજરાતની ભૂપેન્દ્ર પટેલ સરકાર દ્વારા નાગરિકોને સસ્તી વીજળી ઉપલબ્ધ થાય તે માટે મહત્વપૂર્ણ નિર્ણય લેવામાં આવ્યો છે. રાજ્યના ઊર્જામંત્રી કનુ દેસાઈએ 2 સપ્ટેમ્બર, 2025ના રોજ જાહેર કર્યું કે 1 જુલાઈ, 2025થી વીજળીના તમામ ગ્રાહકો માટે લાગુ પડતા ફ્યુઅલ સરચાર્જના દરમાં પ્રતિ યુનિટ 15 પૈસાનો ઘટાડો કરવામાં આવ્યો છે. આ નિર્ણયના અમલથી હવે ગ્રાહકો પાસેથી ફ્યુઅલ સરચાર્જ પ્રતિ યુનિટ ₹2.30ના ઘટાડેલા દરે વસૂલવામાં આવશે. આ રાહતના કારણે રાજ્યના લગભગ 1.75 કરોડ વીજ ગ્રાહકોને સીધો લાભ મળશે અને કુલ મળીને આશરે ₹400 કરોડ જેટલો આર્થિક બોજ નાગરિકો પરેથી ઉતરી જશે.
ઉલ્લેખનીય છે કે રાજ્ય સરકારે અગાઉથી પણ લોકોના હિતમાં વીજળીના ચાર્જમાં ઘટાડા કરવાના પગલાં લીધા હતા. જાન્યુઆરી 2024થી ફ્યુઅલ સરચાર્જ પ્રતિ યુનિટ 50 પૈસા ઓછો કરીને તેને ₹3.35થી ઘટાડી ₹2.85 કરવામાં આવ્યો હતો. ત્યારબાદ, ઓક્ટોબર 2024થી વધુ રાહત આપતા સરચાર્જમાં ફરી 40 પૈસાનો ઘટાડો કરીને તેને ₹2.45 પ્રતિ યુનિટ કરવામાં આવ્યો. વર્ષ 2025-26ના પ્રથમ ત્રિમાસિક ગાળામાં એટલે કે એપ્રિલથી જૂન દરમિયાન આ દર ₹2.45 પ્રતિ યુનિટ જાળવી રાખવામાં આવ્યો હતો. હવે સરકારના નવા નિર્ણયથી દર વધુ ઘટાડીને ₹2.30 પ્રતિ યુનિટ નક્કી કરવામાં આવ્યો છે. આ સતત મળતી રહેલી રાહતોને કારણે સામાન્ય ઘરેલુ વપરાશકર્તાઓથી લઈને નાના-મોટા ઉદ્યોગો સુધી સૌને રાહત મળી રહી છે.
ઊર્જામંત્રી કનુ દેસાઈએ જણાવ્યું કે રાજ્ય સરકારે આ ઘટાડાનો નિર્ણય ખૂબ જ વિચારવિમર્શ બાદ કર્યો છે. યોગ્ય અને કાર્યક્ષમ વીજ ખરીદીનું સંચાલન, સ્થિર વીજ ખરીદીના દર, મજબૂત નાણાકીય વ્યવસ્થાપન, ટેકનિકલ તથા વાણિજ્યિક નુકશાનમાં ઘટાડો અને માળખાકીય સુઘારા જેવા અનેક પરિબળોને ધ્યાનમાં રાખીને આ પગલું ભરવામાં આવ્યું છે. ખાસ કરીને વીજળી કંપનીઓ દ્વારા ઉત્પાદન અને વિતરણમાં આધુનિક ટેક્નોલોજીના ઉપયોગ તથા દેખરેખની પ્રણાલીને મજબૂત બનાવવાના કારણે વીજળીના વ્યર્થ નુક્સાનમાં ઘટાડો થયો છે, જેનાથી સરકારી ખજાનામાં બચત થઈ છે અને તે બચતનો લાભ સીધો નાગરિકોને આપવાનો સરકારનો પ્રયાસ છે.
સરકારે આ નિર્ણયથી સામાન્ય નાગરિકોને ઘરેલુ ખર્ચમાં રાહત મળશે, જ્યારે ખેડૂતો માટે કૃષિ ઉત્પાદનના ખર્ચમાં ઘટાડો થશે. સાથે જ ઉદ્યોગકારો માટે ઉત્પાદન ખર્ચ ઘટવાથી તેઓ સ્પર્ધાત્મક બની શકશે અને રાજ્યની આર્થિક પ્રવૃત્તિઓને પણ ગતિ મળશે. આ રીતે સરકારનો આ પગલું માત્ર સામાન્ય જનજીવનને સહેલુ બનાવનાર નથી, પરંતુ રાજ્યના લાંબા ગાળાના આર્થિક વિકાસ અને ઉદ્યોગપ્રવૃત્તિઓને પ્રોત્સાહન આપનાર નીતિગત સુધારો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
