LPG ગેસ સિલિન્ડરના ભાવ અંગે ફરી એકવાર ગ્રાહકો માટે મોટી રાહતની ખબર સામે આવી છે. ઓઇલ માર્કેટિંગ કંપનીઓએ 19 કિલોગ્રામના કોમર્શિયલ LPG ગેસ સિલિન્ડરના ભાવમાં 51.50 રૂપિયાનો ઘટાડો કર્યો છે. આ બદલાવ બાદ દિલ્હીમાં હવે 19 કિલોગ્રામના કોમર્શિયલ સિલિન્ડરનો ભાવ 1580 રૂપિયા થયો છે, જે પહેલાના 1631.50 રૂપિયાથી ઓછો છે. આ નવી કિંમતો આજથી, એટલે કે 1 સપ્ટેમ્બર 2025 થી અમલમાં આવી ગઈ છે. ખાસ વાત એ છે કે આ ઘટાડો ફક્ત કોમર્શિયલ સિલિન્ડરમાં જ કરવામાં આવ્યો છે, જ્યારે ઘરેલુ ઉપયોગ માટેના 14.2 કિલોગ્રામના LPG સિલિન્ડરના ભાવમાં કોઈ ફેરફાર નથી. એટલે કે, ઘરેલુ ગ્રાહકોને હાલ કોઈ વધારાની રાહત મળી નથી, પણ હોટેલ, રેસ્ટોરન્ટ, કૅટરિંગ સહિતના વ્યાવસાયિક ક્ષેત્રોને સીધો ફાયદો થશે.
જો ભાવમાં છેલ્લા કેટલાક મહિનાના ફેરફારો પર નજર કરીએ તો સ્પષ્ટ થાય છે કે ઓઇલ કંપનીઓ સતત કોમર્શિયલ સિલિન્ડરના ભાવ ઘટાડવાની દિશામાં પગલાં લઈ રહી છે. 1 જાન્યુઆરી 2025 થી શરૂ થયેલી આ શ્રેણીમાં શરૂઆતમાં 14.50 રૂપિયાનો ઘટાડો થયો હતો. ત્યારબાદ ફેબ્રુઆરીમાં 7 રૂપિયાનો ઘટાડો કરવામાં આવ્યો હતો. જોકે, માર્ચમાં થોડો વિરામ આવી 6 રૂપિયાનો વધારો નોંધાયો હતો. એપ્રિલથી ફરી ઘટાડાની પ્રક્રિયા શરૂ થઈ હતી, જેમાં 41 રૂપિયાનો ઘટાડો કરવામાં આવ્યો. મેમાં 14 રૂપિયા, જૂનમાં 24 રૂપિયા, જુલાઈમાં સૌથી મોટો 58.50 રૂપિયાનો ઘટાડો અને ઓગસ્ટમાં 33.50 રૂપિયાનો ઘટાડો કરવામાં આવ્યો હતો. હવે સપ્ટેમ્બરમાં ફરીથી 51.50 રૂપિયાનો ઘટાડો કરવામાં આવ્યો છે.
આ સતત ઘટાડા પાછળનો મુખ્ય હેતુ કોમર્શિયલ ક્ષેત્રને થોડી રાહત આપવાનો છે, કારણ કે ગેસ સિલિન્ડરના વધતા ભાવનો સીધો અસર ખાવા-પીવાની વસ્તુઓના ભાવ પર થતો હતો. આ ઘટાડા સાથે વેપારીઓને તેમની કામગીરીમાં થોડી સહેલાઈ મળશે અને ગ્રાહકોને પણ આડકતરી રીતે ફાયદો થઈ શકે છે. હોટેલ અને રેસ્ટોરન્ટ ક્ષેત્રમાં ગેસનો મોટા પ્રમાણમાં ઉપયોગ થતો હોવાથી ભાવ ઘટવાથી તેમના ખર્ચામાં ઘટાડો થશે, જેનાથી સામાન્ય લોકોને પણ લાભ મળશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
