પાકિસ્તાન તહરીક-એ-ઈન્સાફના (PTI)ના પ્રમુખ ઈમરાન ખાનની (Imran Khan) 9 મેની હિંસા અંગે રવિવારે ઈસ્લામાબાદ પોલીસે પૂછપરછ કરી હતી. આ દરમિયાન ઈમરાનને 25 થી વધારે સવાલો પૂછવામાં આવ્યા હતા. ઈમરાન ખાન વિરુદ્ધ આતંકવાદ વિરોધી અધિનિયમ (ATA) હેઠળ અલગ-અલગ પોલીસ સ્ટેશનમાં 12 કેસ નોંધાયેલા છે. આ કેસના સંબંધમાં ઈમરાન ખાન જોઈન્ટ ઈન્વેસ્ટિગેશન ટીમ (JIT) સમક્ષ હાજર થયો હતો.
ઈમરાન ખાને 9 મેના રોજ થયેલી હિંસાની ઘટનાની નિંદા કરી
ઈમરાન ખાનને JIT દ્વારા બે ડઝનથી વધારે સવાલો પૂછવામાં આવ્યા હતા. સૂત્રોના જણાવ્યા અનુસાર, પૂછપરછ દરમિયાન ઈમરાન ખાને 9 મેના રોજ થયેલી હિંસાની ઘટનાની નિંદા કરી હતી. તેમણે કહ્યું કે 9 મેની ઘટના સાથે મારે કે PTI કાર્યકરોને કોઈ લેવાદેવા નથી. તેમણે દાવો કર્યો હતો કે, આ તેમની અને તેમની પાર્ટી વિરુદ્ધ એક ષડયંત્ર હતું. તેમણે કહ્યું કે, હું આ ઘટનાની જવાબદારી ક્યારેય લઈશ નહીં.
PTIના કાર્યકરો 9 મેની ઘટનામાં સામેલ ન હતા
ઈમરાને કહ્યું કે, હું આ ઘટનાની જવાબદારી ક્યારેય સ્વીકારીશ નહીં કારણ કે આ કાવતરૂ સરકાર અને કાયદા અમલીકરણ એજન્સીઓ દ્વારા રચવામાં આવ્યું છે જે મને અને પક્ષને કાયદાકીય જાળમાં ફસાવવામાં વ્યસ્ત છે. JITના પ્રશ્નોના જવાબમાં, તેમણે વારંવાર કહ્યું, હું એ દાવા સાથે સહમત નથી કે પીટીઆઈના કાર્યકરો 9 મેની ઘટનામાં સામેલ હતા કારણ કે મારી પાસે ઘટના સાથે સંબંધિત ષડયંત્રના પુરાવા છે.
ઈમરાન ખાનને 25થી વધુ પ્રશ્નો પૂછવામાં આવ્યા
ઈમરાન ખાને કહ્યું કે, તેઓ મને રાજનીતિમાંથી ખતમ કરવાનો પ્રયાસ કરી રહ્યા છે, પરંતુ તેઓ તેમના ઈરાદામાં સફળ થઈ શકશે નહી. એક સવાલના જવાબમાં ઈમરાને કહ્યું કે, ગયા વર્ષે 25 મેના રોજ તેમની હત્યાનો પ્રયાસ કરવામાં આવ્યો ત્યારે તેમણે અત્યાચાર જોયા છે. SSP યાસિર આફ્રિદી અને SP રૂખસાર મેહદીની આગેવાની હેઠળની JIT એ ઈમરાનને 25 થી વધુ સવાલો પૂછ્યા હતા.
