નડિયાદ નજીકથી પસાર થતા એક્સપ્રેસ હાઇવે પાસે શુક્રવારની સમી સાંજે પસાર થતી એક ખાનગી લકઝરી બસ એકાએક રોડની સાઈડમાં પલટી ખાઇ ગઇ હતી. જેના કારણે અંદર બેઠેલા લોકોમાં બૂમરાણ મચી જવા પામી હતી. આ ઘટનામાં બે લોકોના ઘટના સ્થળે મોત નિપજ્યા હોવાની માહિતી મળી રહી છે. જ્યારે બનાવની જાણ થતાં ૧૦૮ એમ્બ્યુલન્સ બનાવ સ્થળે દોડી આવી હતી.આ લક્ઝરી બસ અમદાવાદથી પુના જઇ રહી હતી એ દરમિયાન જ નડિયાદ નજીક અકસ્માત સર્જાયો હતો. બસમાં સવાર કેટલાક પેસેન્જર ઘાયલ થતા તેઓને સારવાર માટે નડિયાદ સિવિલમાં ખસેડવામાં આવ્યા છે.
આ ઘટનામાં મરણ જનાર દિનેશભાઇ ભાવનીચકર શાહ (રહે.બારેજા) તથા દેવ દેવેન્દ્રભાઇ શાહ (રહે. બાપુનગર) હોવાનું જાણવા મળેલ છે, આ અંગે સ્થાનિક પોલીસ દ્વારા આગળની કાર્યવાહી હાથ ધરવામાં આવી છે.
