તૃણમૂલ કોંગ્રેસ (TMC) માટે રાજકીય રીતે મહત્વપૂર્ણ ગણાતી ક્ષણે પાર્ટીમાં આંતરિક અસંતોષના સંકેતો સામે આવી રહ્યા છે. TMC સુપ્રીમો મમતા બેનર્જી અને પાર્ટીના રાષ્ટ્રીય મહાસચિવ અભિષેક બેનર્જી INDI ગઠબંધનની બેઠક માટે દિલ્હીમાં હાજર છે ત્યારે પાર્ટીના કેટલાક સાંસદોની અલગ બેઠક ચર્ચાનો વિષય બની છે.
મીડિયા અહેવાલો અનુસાર, સોમવારે દિલ્હીમાં TMCના લગભગ 15થી 16 સાંસદો કેન્દ્રીય મંત્રી ભૂપેન્દ્ર યાદવના નિવાસસ્થાને પહોંચ્યા હતા. આ બેઠકની તસવીરો પણ સોશિયલ મીડિયા પર વાયરલ થઈ રહી છે, જેના કારણે પશ્ચિમ બંગાળના રાજકીય વર્તુળોમાં ચર્ચાઓ તેજ બની છે.
અલગ જૂથ બનાવવાની ચર્ચા?
અહેવાલો મુજબ બેઠકમાં હાજર સાંસદો બે મહત્વપૂર્ણ વિકલ્પો પર વિચાર કરી રહ્યા છે. પ્રથમ વિકલ્પ તરીકે તમામ સાંસદો એકસાથે રાજીનામું આપી શકે છે, જ્યારે બીજો વિકલ્પ લોકસભા અધ્યક્ષ ઓમ બિરલાને પત્ર લખીને પોતાને તૃણમૂલ કોંગ્રેસથી અલગ જૂથ તરીકે માન્યતા આપવાની માંગ કરવાનો છે.
હાલ લોકસભામાં TMCના નેતા તરીકે અભિષેક બેનર્જી કાર્યરત છે. જો સાંસદો અલગ જૂથની માંગ કરે તો તે પાર્ટી માટે મોટો રાજકીય પડકાર બની શકે છે.
The High Profile Meeting at Bhupendra Yadav's residence. Numbers suggest atleast 20 will switch. The Actors Dev & Koel is likely to resign & exit. https://t.co/EVzOkTdtMs pic.twitter.com/cemOUIkieF
— Sudhanidhi Bandyopadhyay (@SudhanidhiB) June 8, 2026
પક્ષપલટા કાયદો બનશે અવરોધ?
મમતા બેનર્જીના નજીકના સૂત્રોનું કહેવું છે કે હાલ બળવાખોર સાંસદોની સંખ્યા પક્ષપલટા વિરોધી કાયદા હેઠળ જરૂરી ગણાતી સંખ્યાથી ઓછી છે. જો જરૂરી સંખ્યામાં સાંસદો અલગ ન પડે તો તેમને સભ્યપદ ગુમાવવાનો ખતરો રહે છે.
તેમ છતાં રાજકીય વિશ્લેષકો માને છે કે હાલની સ્થિતિને હળવાશથી લઈ શકાય નહીં, કારણ કે અસંતુષ્ટ સાંસદોની સંખ્યા નોંધપાત્ર ગણાય છે અને આગામી દિવસોમાં તેમાં વધારો થઈ શકે છે.
પશ્ચિમ બંગાળમાં અગાઉ પણ થઈ ચૂક્યો છે બળવો
આ પહેલાં પશ્ચિમ બંગાળ વિધાનસભામાં પણ TMC સામે આંતરિક અસંતોષના સંકેતો જોવા મળ્યા હતા. લગભગ 60 ધારાસભ્યોએ વિધાનસભા અધ્યક્ષને પત્ર લખીને રિતબ્રતા બેનર્જીને વિપક્ષના નેતા તરીકે માન્યતા આપવા વિનંતી કરી હતી.
બાદમાં સ્પીકરે આ માંગણી સ્વીકારી હતી. નોંધનીય છે કે રિતબ્રતા બેનર્જીને TMC દ્વારા પક્ષવિરોધી પ્રવૃત્તિઓના આરોપસર સસ્પેન્ડ કરવામાં આવ્યા હતા.
મમતા અને અભિષેક માટે વધતી રાજકીય પડકારો
એક તરફ મમતા બેનર્જી અને અભિષેક બેનર્જી INDI ગઠબંધનની બેઠકમાં વિપક્ષી એકતા મજબૂત કરવાનો પ્રયાસ કરી રહ્યા છે, ત્યારે બીજી તરફ પાર્ટીની અંદરથી ઉઠી રહેલા અસંતોષના અવાજો TMC નેતૃત્વ માટે ચિંતાનો વિષય બની શકે છે.
જો આગામી દિવસોમાં સાંસદો અલગ જૂથ બનાવવાની દિશામાં આગળ વધે છે તો તે માત્ર TMC માટે જ નહીં પરંતુ પશ્ચિમ બંગાળની રાજનીતિ અને રાષ્ટ્રીય સ્તરે વિપક્ષી રાજકારણ માટે પણ મહત્વપૂર્ણ ઘટના બની શકે છે.
હાલ શું છે સ્થિતિ?
હાલ સુધી TMC અથવા સંબંધિત સાંસદો તરફથી કોઈ સત્તાવાર નિવેદન જાહેર થયું નથી. જોકે દિલ્હીમાં થયેલી આ બેઠકને લઈને રાજકીય વર્તુળોમાં ચર્ચાઓનો માહોલ ગરમાયો છે અને આગામી દિવસોમાં આ મુદ્દે વધુ સ્પષ્ટતા થવાની શક્યતા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
