સુરત શહેરના પોશ ગણાતા અડાજણ વિસ્તારમાં બુધવાર, 18 જૂનના રોજ સવારે મોટી આગની ઘટના સામે આવી હતી. અડાજણ ચાર રસ્તા નજીક અને BAPS હોસ્પિટલ પાસે આવેલી કોમર્શિયલ દુકાનોમાં અચાનક આગ ફાટી નીકળતા સમગ્ર વિસ્તારમાં ભારે અફરાતફરીનો માહોલ સર્જાયો હતો. આગ એટલી ભયાનક હતી કે દૂર સુધી ધુમાડાના ગોટેગોટા અને આગની જ્વાળાઓ દેખાઈ રહી હતી.
EV શો-રૂમમાંથી શરૂ થઈ આગ, 15થી વધુ વાહનો બળ્યા
પ્રાથમિક માહિતી મુજબ, આગ TVS EV શો-રૂમમાંથી શરૂ થઈ હતી. શો-રૂમમાં પાર્ક કરાયેલા ઇલેક્ટ્રિક વાહનો, બેટરી પેક અને અન્ય સ્પેર પાર્ટ્સને કારણે આગે ઝડપથી વિકરાળ સ્વરૂપ ધારણ કર્યું હતું. આગની ઝપેટમાં આવતા 15થી વધુ ઇલેક્ટ્રિક વાહનો બળીને સંપૂર્ણપણે ખાખ થઈ ગયા હોવાનું જાણવા મળ્યું છે.
એપોલો ફાર્મસી અને રેસ્ટોરન્ટમાં પણ આગ પ્રસરી
શો-રૂમમાં લાગેલી આગ થોડી જ વારમાં બાજુમાં આવેલી એપોલો ફાર્મસી તેમજ એક જાણીતી રેસ્ટોરન્ટ સુધી પ્રસરી ગઈ હતી. આગના કારણે આસપાસના વેપારીઓ અને સ્થાનિકોમાં ગભરાટનો માહોલ સર્જાયો હતો. આગને કારણે અનેક દુકાનોને નુકસાન પહોંચ્યું હોવાનું પણ સામે આવ્યું છે.
ગરમી એટલી પ્રચંડ કે લોખંડનું માળખું ઓગળી ગયું
આગની તીવ્રતા એટલી વધુ હતી કે દુકાનો ઉપર બનાવવામાં આવેલા પતરાના શેડ અને લોખંડના સ્ટ્રક્ચર પર તેની ગંભીર અસર જોવા મળી હતી. અસહ્ય ગરમીના કારણે લોખંડનું મજબૂત માળખું પણ ઓગળી ગયું અને નમી પડ્યું હતું. આ દૃશ્યોને કારણે ઘટનાસ્થળે હાજર લોકોમાં ભયનો માહોલ સર્જાયો હતો.
5 ફાયર સ્ટેશનની 10થી વધુ ગાડીઓ ઘટનાસ્થળે પહોંચી
આગની જાણ થતાં જ સુરત ફાયર વિભાગ હરકતમાં આવ્યું હતું. પરિસ્થિતિની ગંભીરતાને ધ્યાનમાં રાખીને પાલનપુર, જહાંગીરપુરા, મોરાભાગળ, મુગલીસરા સહિત પાંચ ફાયર સ્ટેશનમાંથી 10થી વધુ ફાયર ટેન્ડરો અને ફાયર ફાઈટરોની ટીમોને ઘટનાસ્થળે મોકલવામાં આવી હતી. ફાયર વિભાગે ચારેય તરફથી પાણીનો ભારે મારો ચલાવી આગને વધુ ફેલાતી અટકાવી હતી.
આગ પર કાબૂ, કુલિંગની કામગીરી યથાવત
ડેપ્યુટી ચીફ ફાયર ઓફિસર એસ. ડી. ધોબીના જણાવ્યા અનુસાર, ફાયર ટીમ સ્થળ પર પહોંચે તે પહેલાં આગ આજુબાજુની દુકાનોમાં પણ પ્રસરી ગઈ હતી. જોકે, ભારે જહેમત બાદ આગ પર સંપૂર્ણ કાબૂ મેળવી લેવામાં આવ્યો છે. હાલમાં સ્થળ પર કુલિંગની કામગીરી ચાલુ છે અને આગ લાગવાનું ચોક્કસ કારણ જાણવા તપાસ શરૂ કરવામાં આવી છે.
સદનસીબે જાનહાનિ ટળી, લાખો રૂપિયાનું નુકસાન
આગની ઘટના ભીડભાડવાળા વિસ્તાર અને હોસ્પિટલ નજીક બની હોવા છતાં સદનસીબે કોઈ જાનહાનિ નોંધાઈ નથી. જોકે, EV શો-રૂમ, એપોલો ફાર્મસી અને રેસ્ટોરન્ટમાં રાખવામાં આવેલા માલસામાન તેમજ વાહનોને કારણે લાખો રૂપિયાનું નુકસાન થયું હોવાનું અનુમાન વ્યક્ત કરવામાં આવી રહ્યું છે. ફાયર વિભાગની ઝડપી કામગીરીને કારણે મોટી દુર્ઘટના ટળી હોવાનું માનવામાં આવી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
